Mga Talinhaga 28
28
1Nagdudulag an tampalasan maski mayong naglalamag, alagad an matanos maisog arog sa leon.
2Kun nagkakasala an sarong nasyon, nagkakaigwa ini nin dakul na kagsakop. Alagad magdadanay na pusog an sarong nasyon kun igwa iyan nin mga madonong asin may pakasabot na mga lider.
3An nag-aapi sa dukha garo makosog na doros na nagraraot sa mga tinanom.
4An tampalasan inoomaw kan mga tawong nagpapabaya kan katogonan, alagad laban sainda an mga tawong nagkukuyog kaiyan.
5Dai nasasabotan kan mga maraot an kahulogan kan hustisya, alagad nasasabotan ini nin marahay kan mga tawong nagsasamba sa Kagurangnan.
6Mas marahay an dukha na naglalakaw sa katanosan, ki sa tawong mayaman na biko an pamumuhay.
7Madonong an nagkukuyog kan katogonan, alagad an nakikipagkatood sa mga maraot kasosopgan kan saiyang ama.
8Kun magyaman ka huli sa pagpatubo asin pagbentahe sa iba, an saimong kayamanan mapapaduman sa sarong tawo na maheherakon sa dukha.
9Makauuyam maski an pamibi kan tawong habong maghinanyog sa katogonan.
10An magdagka sa matanos na maggibo nin maraot mahuhulog sa sadiri niyang kalot. Alagad an mga mayong kasalan magmamana nin mga marahay na bagay.
11Naghohona an mayaman na siya madonong, alagad mamimidbidan an tunay niyang pagkatawo kan dukhang may pakasabot.
12Kun marahay na tawo an nagkakapot nin kapangyarihan, nag-oogma an lambang saro, alagad kun an maraot iyo an namamayo, nagtatago an gabos.
13An nagtatago kan saiyang mga kasalan dai nag-uuswag, alagad an nagkukumpisal saka nagbabaya kaiyan maheherakan nin Dios.
14Paladan an tawong danay na may pagkatakot sa Kagurangnan, alagad mapapahamak an matagas an payo.
15Arog sa nag-uungal na leon o sa nagugutom na oso an hade na maringis sa mga dukha.
16Magigin makuri an pamayo na mayo nin toltol na kaisipan. An naoongis sa pandadaya maghahaloy sa pamamahala.
17Pabayaan nindong maglagalag sagkod na magadan an tawong nagkasala nin panggadan; dai nindo siya pagtabangan.
18An naglalakaw sa katanosan makakaligtas, alagad matutumba an may bikong pamumuhay.
19An mahigos na paraoma magkakaigwa nin dakul na kakanon, alagad an nagsasayang sana nin oras magdadanay sa kadukhaan.
20An onestong tawo mag-aako nin dakul na bendisyon, alagad an naghihidali sa pagyaman papadusahan.
21Bakong marahay an igwa nin pinapalaen; alagad sa halaga sana nin sarong tinapay minagibo nin maraot an tawo.
22Sa paghihidali kan kuripot na siya yumaman, dai niya naaaraman na maabot saiya an kadukhaan.
23Mas dakul an nagpapasalamat sa tawong nagsasagwe, ki sa tawong nag-oomaw maski bakong maninigo.
24An naghahabon sa saiyang magurang asin minasabing bako iyan kasalan nakakaarog man sana sa sarong parahabon.
25An paslo iyo an nagigin dahelan nin iriwal, alagad an nananarig sa Kagurangnan magigin mauswag an buhay.
26An nananarig sa sadiring kaisipan sarong lolong; alagad makakaligtas an naglalakaw sa dalan nin kadonongan.
27An nagtatao sa mga dukha dai magkukulang, alagad an nagbibinuta sa saindang kamugtakan mamaldisyonon.
28Minatago an mga tawo kun an kapangyarihan nasa kamot kan mga maraot, alagad pagbagsak ninda, maghahade giraray an mga matanos na tawo.
Currently Selected:
Mga Talinhaga 28: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
