Mga Talinhaga 27
27
1Dai mo ipaghambog an noodma, huli ta dai mo aram kun ano an mangyayari sa aldaw na iyan.
2Pabayaan mong iba an mag-omaw saimo; dai mo nanggad paggibohon iyan sa saimong sadiri.
3Magabat an gapo, asin may timbang an baybay, alagad an problemang bunga nin kalolongan mas magabat sa duwang iyan.
4Makuri saka nakakatakot an kaanggotan, alagad siisay an makakatagal sa pag-imon?
5Mas marahay an hayag na pagsagwe ki sa natatagong pagkamoot.
6May karahayan an hampak nin maimbod na katood ki sa hadok nin kaiwal.
7Kun basog an sarong tawo, hinahaboan niya an dugos, alagad kun nagugutom siya maski mapait na kakanon mahamis sa pagnamit niya.
8An tawong harayo sa saiyang harong arog sa gamgam na harayo sa saiyang salagan.
9An lana asin an pahamot nagpapaogma sa puso, alagad an kahandalan nagpapagabat sa isip.
10Dai mo paglingawan an saimong mga katood, ni an mga katood kan saimong ama. Kun igwa ka nin problema, dai ka magpatabang sa saimong tugang. Orog na matatabangan ka kan katood na nasa harani ki sa tugang na nasa harayo.
11Magin madonong ka, aki ko, tanganing mag-ogma an sakong puso asin magkaigwa ako nin isisimbag sa mag-oolog-olog sako.
12Minatago an madonong kun may nahihiling na pag-alaman, alagad dai minalikay an mangmang asin pinagdudusahan niya iyan.
13An tawong nanunuga para sa utang nin iba dapat na kuahan nin rogaring bilang garantiya.
14Mas marahay pang maldisyonon mo an saimong katood ki sa pukawon mo siya pagkaaga sa paagi nin makosog na pangongomusta.
15An maribok na babae garo uran na dai naghuhuraw. 16An pagpaontok saiya garo pagpaontok sa doros o pagpugol sa lana.
17Lansang an minapatarom sa lansang, asin tawo an minapatarom sa isip kan kapwa niya tawo.
18An nag-aataman nin higera magkakakan kan bunga kaiyan, asin an oripon na nagbabantay kan saiyang kagurangnan oomawon.
19Sadiri mong lalawogon an mahihiling mong nalaladawan sa tubig asin an tunay mong pagkatawo an mahihiling mo sa saimong puso.
20An kinaban kan mga gadan dai nanggad nakokontento; siring man kaiyan an mga kamawotan nin tawo.
21An bulawan saka an plata binabalo sa kalayo; an tawo hinuhukoman huli kan saiyang dangog.
22Maski pa bayohon sa lubang an lolong na garo trigo, dai nanggad mahahale an saiyang kalolongan.
23Atamana nin marahay an saimong mga karnero asin mga baka, 24huli ta an kayamanan dai nagdadanay. Maski an mga nasyon igwa nin kataposan. 25Putola an mga dagami saka mga doot sa kabubuldan mantang nagtatalubo an dagaming sunod na puputolon. 26Makakagibo ka nin gubing hale sa balukag kan saimong mga karnero asin makakabakal ka nin daga hale sa kwartang kabaklan kan nagkapira mong kanding. 27Magkakaigwa ka asin an saimong pamilya saka mga sorogoon nin dakul na gatas hale sa natatadang mga kanding.
Currently Selected:
Mga Talinhaga 27: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
