Mga Talinhaga 26
26
1An kaomawan bakong angay sa sarong lolong, arog kan nyebe sa tig-init o kan uran sa panahon nin tig-ani.
2An mga maldisyon na bakong maninigo dai nagkakatotoo. Arog iyan sa gamgam na naglalayog asin dai nanggad minatugdon.
3An latigo para sa kabayo, an busal para sa asno, asin an pamakol para sa lolong na tawo.
4Dai ka magsimbag sa lolong sosog sa saiyang kalolongan ta tibaad magin siring ka man saiya.
5Simbagon mo an lolong sosog sa saiyang kalolongan, asin maiisip niyang bako siyang madonong arog kan paghona niya.
6Kun lolong man sana an papadarahon mo kan saimong mensahe, mas marahay pang putolon mo na sana an saimong mga bitis; karibokan an saimong hinahanap.
7Kun paanong an mga bitis na pilay mayo nin pakinabang, siring man an talinhaga sa ngoso kan lolong.
8An pag-omaw sa lolong arog sa paggakod kan gapo sa lagpitaw.
9An talinhaga sa ngoso kan lolong garo tonok na nakakatusok sa kamot kan paraburat.
10An minatandan sa arin man na minaaging lolong garo parapana na nakakalugad sa kiisay man.
11An lolong na minagibo liwat kan parehong kalolongan garo man sana ayam na minabalik sa saiyang isinuka.
12Igwa pa nin paglaom an sarong lolong ki sa tawong naghohona na siya madonong.
13Nagsasabi an hugakon, “May leon sa dalan! May leon sa mga tinampo!”
14Siring na an pinto naghihiro sa saiyang bisagra, siring man kaiyan an hugakon sa saiyang higdaan.
15Mapagal sa hugakon maski an paghungit kan saiyang kakanon.
16An paghona kan hugakon mas madonong siya ki sa pitong tawo na tataong magsimbag.
17Arog sa tawong minatakma na sana kan talinga kan arin man na minaaging ayam an tawong nakikiaram sa problema nin iba.
18-19An tawong nandadaya dangan minasabing nagsusuba sana siya, nakakaarog sa bua-bua na nagkakawat nin armas na nakakagadan.
20Nagagadan an kalayo kun mayo nin igatong; naoontok an iriwal kun mayo nin parasotsot.
21Nagdadanay na malaad an baga kun igwa nin oring, an kalayo kun igwa nin igatong, siring man an diriskutiran kun igwa nin nagpaparibok.
22An libak garo masiram na kakanon—boot ta nanggad iyan na halonon!
23An magayon na pagtaram na nagtatahob nin madayang puso garo makintab na pintura sa baratong tapayan.
24An pagkaongis itinatago kan parasagin-sagin sa likod nin magagayon na tataramon. 25Marahay iyan pagdangogon alagad dai ka magtubod saiya, huli ta an puso niya pano nin kaanggotan. 26Pwede niyang matahoban an saiyang kaanggotan, alagad mahihiling kan gabos an maraot niyang mga gibo.
27An nagbubugtak nin siod para sa iba iyo man sana an madadakop kaiyan. An nagpapaligid nin gapo iyo man sana an matatamaan kaiyan.
28An putikon na dila nakakapahamak kan mayo nin sala, asin an madayang tataramon nakakaraot sa kapwa.
Currently Selected:
Mga Talinhaga 26: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
