Mga Talinhaga 25
25
Iba pang mga Talinhaga ni Solomon
1Uya an iba pang mga talinhaga ni Solomon, na kinopya kan mga tawohan ni Ezekias na hade nin Juda.
2An kamurawayan nin Dios yaon sa pagtago nin mga bagay, alagad an kamurawayan nin mga hade yaon sa pagsiyasat kaiyan.
3An kaisipan nin sarong hade masakit na marorop, huli ta arog iyan kahalangkaw kan langit asin arog kahararom kan dagat.
4Halea an mga ati sa plata, asin may magigibo nang magayon na kagamitan an panday. 5Halea sa hade an maraot na mga parahatol, asin magdadanay sa kahadean an hustisya.
6Dai ka maghambog sa atubangan kan hade, ni magsagin-sagin na saro kang dakulang tawo. 7Mas marahay pang sabihan ka niya, “Digdi ka sa itaas,” ki sa sopogon ka sa atubang nin mga prinsipe.
8Dai ka magmadali sa pagdara sa hukoman kan ano man na nahiling mo. Huli ta kun may magpatotoo na nasasala ka, ano an saimong gigibohon?
9Kun ika asin an saimong kanatad igwa nin dai pagkasinabotan, pag-olayan ngona nindo iyan, saka dai mo ipagluwas an anoman na sekreto. 10Huli ta kun dai, maaaraman kan gabos na dai ka tataong magtago nin sekreto, asin dai mahahale an saimong kasosopgan.
11Tampok na bulawan sa alahas na plata an kabaing kan tataramon na isinabi sa tamang panahon.
12An patanid nin madonong sa tataong magdangog orog na mahalaga ki sa bulawan na singsing o alahas na gibo sa pinakapinong bulawan.
13An maimbod na sugo kaginhawahan kan nagsugo, arog kan malipot na tubig sa panahon nin tig-init.
14Garo man sana panganoron saka doros na mayo nin darang uran an tawong nanunuga nin regalo na dai man itinatao.
15An marahay na pakiolay nakakapalumoy sa matagas na puso, asin nakakakombenser maski sa hade.
16Dai ka magpangana sa pag-inom nin dugos huli ta kun masobrahan ka, isusuka mo iyan. 17Dai mo pag-aroaldawon an pagdalaw sa saimong kanatad huli ta tibaad mauyam siya saimo.
18Garo espada, pamukpok, saka bosog na matarom an tawong nagsasaksi nin kaputikan laban sa saiyang kapwa.
19Garo ngipon na naggigilo-gilo o bitis na pilay an parapasaluib na sinasarigan sa panahon nin kahaditan.
20An pag-awit sa tawong may kamondoan garo man sana paghuba saiya kun tiglipot, o garo pagbugtak nin asin sa lugad niya.
21Kun nagugutom an saimong kaiwal, pakakana siya; kun siya napapaha painoma siya. 22Sa siring na paagi mapapasopog siya, asin babalosan ka kan Kagurangnan.
23Kun paano nagdadara nin uran an amihan na doros, nagdadara man nin kaanggotan an paglibak.
24Marahay pang mag-erok sa atop kan harong ki sa mag-erok sa laog kaiyan sa kaibahan nin maribok na babae.
25Arog sa malipot na tubig sa napapahang kalag an marahay na bareta hale sa harayong lugar.
26Malaboy na burabod o maating bubon an kabaing kan matanos na tawo na nagpapahunod sa tawong maraot.
27An pag-inom nin dakul na dugos bakong marahay, siring man an paghanap nin sobrang kaomawan.
28An tawo na dai tataong magpugol sa sadiri garo syudad na sinalakay nin kaiwal saka binayaan na mayo nin kudal.
Currently Selected:
Mga Talinhaga 25: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
