Mga Talinhaga 24
24
-19-
1Dai ka maori sa mga tawong maraot, ni maghingowa na magin katood sinda. 2Danay sindang nag-iisip nin kadahasan; sa oras na ibuka ninda an saindang ngoso igwa nin makukulogan.
-20-
3Huli sa kadonongan napapatindog an sarong harong, asin napapapusog ini huli sa pakasabot. 4Huli sa pakaaram, an mga kwarto kan harong napapano nin mahahalaga saka magagayon na bagay.
-21-
5Mas marahay an madonong ki sa makosog; totoong mas mahalaga an pakaaram ki sa kosog. 6Huli ta kaipuhan mo an maingat na pagplano bago ka makigera, asin huli sa dakul na marahay na hatol, orog an paglaom mo na ika manggagana.
-22-
7An hararom na kasabihan dai masasabotan kan mangmang. Mayo siya nin ikakataram kun igwa nin mahalagang pag-orolay.
-23-
8An danay na nag-iisip nin maraot aapodon na paraparibok. 9Makasalan an ano man na plano na isipon kan lolong. Ikinakaongis nin mga tawo an nag-oolog-olog sa kapwa.
-24-
10Kun ika manluya sa panahon nin kasakitan, maluya ka man nanggad.
-25-
11Dai ka magduwa-duwa sa pagligtas sa tawong gagadanon na mayo nin sala. 12Pwede kang magsabi, “Dai ako dapat makiaram,” alagad nakakaaram an Dios asin naghuhukom kan nasa saimong puso. Aram iyan kan Dios na nagmamasid saimo. Babalosan ka niya sosog sa saimong ginigibo.
-26-
13Aki ko, uminom ka nin dugos huli ta marahay iyan. Kun an dugos mahamis sa pagnamit, 14siring man an kadonongan sa kalag. Hanapon mo an kadonongan asin may paglalaomon ka sa huring aldaw.
-27-
15Dai ka mag-arog sa tampalasan na nananalakat nin harong nin matanos asin nananamsam kan saiyang rogaring. 16Huli ta an matanos nakakatindog giraray maski siya matumba nin nagkapirang beses, alagad an tampalasan ibabagsak kan kasakitan.
-28-
17Dai mo ipag-ogma an pagbagsak kan saimong kaiwal, ni ipaggayagaya an saiyang pagkatumba. 18Aram nin Kagurangnan kun nagngingisi ka, asin dai ka niya mawiwilihan; nin huli kaiyan, tibaad dai na niya padusahan an saimong kaiwal.
-29-
19Dai ka mahandal huli kan mga tawong naggigibo nin karatan; dai ka maori sa sainda. 20An tampalasan mayong paglalaomon sa huring aldaw.
-30-
21Aki ko, matakot ka sa Kagurangnan saka omawon mo an hade. Dai ka mag-ayon sa mga tawong nagtutumang sainda; 22biglang mapapahamak an mga siring na tawo. Aram mo daw an kasakitan na maghahale sa Dios o sa hade?
Iba Pang Kasabihan
23An mga madonong nagtaram man kan mga bagay na ini:
Bakong marahay para sa sarong hukom may pinapalaen. 24Kun pawaraan niya nin sala an may kasalan, mamaldisyonon asin ikakaongis siya kan mga tawo. 25Alagad an hukom na nagpapadusa sa may kasalan magigin mauswag asin gagalangan.
26An onestong simbag tanda nin tunay na pagkakatood.
27Bago ka magtugdok nin harong saka mag-isip na mag-agom, andama ngona an saimong oma, tanganing igwa ka nin pagkukuahan nin kakanon.
28Dai ka magsaksi laban sa saimong kapwa na mayo nin dahelan, ni magsabi nin kaputikan manongod saiya. 29Dai ka magtaram nin, “Gigibohon ko saiya an ginibo niya sako tanganing makabalos ako!”
30Nag-agi ako sa oma saka sa ubasan kan hugakon asin mangmang na tawo. 31Gabos tonok saka doot an nagtatalubo duman. Gaba an gapong kudal kaini. 32Minasdan ko asin pinaghorophorop an bagay na ini dangan may nakua akong magayon na adal: 33kadikit na pagkatorog, kadikit na pagtungka, kadikit na pagkurumo sa pagpahingalo, 34dangan masalakay saimo an kadukhaan siring sa armadong mahabon.
Currently Selected:
Mga Talinhaga 24: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
