Mga Talinhaga 20
20
1An arak mayo nin karahayan na itinatao sa tawo; asin kamangmangan an magpakaburat sa arak.
2An kaanggotan nin hade garo ungal kan leon; an minapaanggot saiya nawawaraan kan sadiring buhay.
3Kaomawan para sa tawo an paglikay sa iriwal; alagad an mga lolong mag-iiriwal.
4An sarong paraoma na habong mag-arado sa tamang panahon mayo nin aanihon.
5Arog sa tubig na hararom an kaisipan nin tawo, alagad malaladop iyan nin sarong madonong.
6Dakul na tawo an nagpapahayag kan saindang kaimbodan, alagad may makukua pa daw na maimbod na tawo?
7Paladan an mga aki na igwa nin ama na onesto saka matanos.
8Kun an hade magtukaw sa paghukom, mayo nin karatan na makakalampas sa saiyang panhiling.
9Siisay an makakasabi na malinig an saiyang puso, asin mayo siya nin kasalan?
10Naoongisan nin Kagurangnan an mga tawong naggagamit nin may dayang timbangan saka sukolan.
11Maski an aki namimidbid huli sa saiyang gibo; maaaraman mo sa saiyang gibo kun siya marahay asin onesto.
12Parehong ginibo nin Kagurangnan an talingang nakakadangog saka an matang nakakahiling.
13Kun uboson mo an saimong panahon sa pagkatorog, magigin dukha ka. Alagad magmahigos ka asin magkakaigwa ka nin dakul na kakanon.
14Minasabi an parabakal, “Halangkaw an saimong presyo.” Alagad paghale niya, ipinaghahambog niya na nakabakal siya sa hababang presyo.
15Kadakul kan bulawan asin kan mamahalon na mga bato, alagad an tataramon na may kadonongan sarong pambihirang kayamanan.
16An tawong minaako kan utang nin iba, dapat na kuahan nin rogaring bilang garantiya.
17An anoman na nakua sa daya garo masiram na kakanon para sa sarong tawo, alagad maabot an panahon na garo iyan baybay sa saiyang ngoso.
18Maootob an mga plano kun may matanos na hatol; makigera kun igwa nin matanos na plano.
19An tsismoso dai nakakatago nin sekreto. Maglikay sa tawong matabil.
20An magmaldisyon sa magurang, matatapos an buhay na garo pinalsok na ilawan sa kadikloman.
21An kayamanan na dai pinagpagalan, kadikit an itataong karahayan.
22Dai ka mag-isip na balosan nin maraot an maraot; halaton mo an Kagurangnan, asin tatabangan ka niya.
23Naoongisan nin Kagurangnan an mga tawong naggagamit nin salang timbangan asin sukolan.
24Itinalaan nin Kagurangnan an mga lakad kan tawo kaya paano masasabotan nin siisay man an dalan na saiyang linalakawan?
25Isipa ngona nin marahay bago ka manuga nin dolot sa Dios. Tibaad magbasol ka ngapit.
26Aram kan hadeng madonong an naggigibo nin karatan, asin mayo nin pagkaherak na papadusahan niya an siring na tawo.
27Tinawan kita kan Kagurangnan nin isip saka konsyensya, kaya dai ta madadaya an satong sadiri.
28Magdadanay na pusog an trono kan hade kun maghahade siya sa katotoohan, kaimbodan, asin sa katanosan.
29An kamurawayan kan mga hoben iyo an saindang kosog, alagad an kagayonan kan mga gurang iyo an saindang puting buhok.
30Kun minsan kaipuhan na makulogan an sarong tawo tanganing maaraman an sala niyang gibo.
Currently Selected:
Mga Talinhaga 20: MBBBIK92
Highlight
Share
Compare
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
