Mga Bilang 29
29
An mga Dolot kun Bagong Taon
(Lev. 23:23-25)
1Sa enot na aldaw kan ikapitong bulan magtiripon kamo sa pagsamba asin dai kamo magtrabaho. Papatanogon an mga trompeta sa aldaw na iyan. 2Magdolot kamo nin tinutong na atang, sarong parong na nakakawili sa Kagurangnan: sarong torilyong baka, sarong lalaking karnero, asin pitong lalaking kordero na manangtaon an edad, na gabos mayo nin ano man na kaninan. 3Idolot nindo an mga iyan kaiba an dolot na pagkakan na arinang sinalakan nin lana nin oliba: tolong kilong arina para sa torilyo, duwang kilo para sa lalaking karnero, 4asin sarong kilo para sa lambang kordero. 5Magdolot man kamo nin sarong lalaking kanding bilang dolot para sa kasalan, sa pagtubos saindo. 6Idolot nindo an mga iyan, laen pa kan tinutong na atang para sa enot na aldaw kan lambang bulan asin kan dolot na pagkakan, laen pa man kan aroaldaw na tinutong na atang saka dolot na pagkakan sagkod arak. An mga dolot na pagkakan na iyan, sarong parong na nakakawili sa Kagurangnan.
An mga Dolot sa Aldaw nin Pagtubos
(Lev. 23:26-32)
7Sa ikasampolong aldaw kan ikapitong bulan magtiripon kamo sa pagsamba; mag-ayuno kamo saka dai magtrabaho. 8Magdolot kamo nin tinutong na atang, sarong parong na nakakawili sa Kagurangnan: sarong torilyong baka, sarong lalaking karnero, asin pitong lalaking kordero na manangtaon an edad, na gabos mayo nin ano man na kaninan. 9Idolot nindo an mga iyan kaiba an dolot na pagkakan na arinang sinalakan nin lana nin oliba: tolong kilong arina para sa torilyo, duwang kilo para sa karnero, 10asin sarong kilo para sa lambang kordero. 11Magdolot man kamo nin sarong lalaking kanding bilang dolot para sa kasalan, laen pa kan kanding na idodolot sa seremonya nin paglinig para sa mga tawo, asin kan aroaldaw na tinutong na atang kaiba kan dolot na pagkakan saka arak.
An mga Dolot sa Pyesta nin mga Harong-harong
(Lev. 23:33-44)
12Sa ikakinseng aldaw kan ikapitong bulan magtiripon kamo sa pagsamba. Selebraron nindo an pyestang iyan para sa Kagurangnan sa laog nin pitong aldaw asin dai kamo magtrabaho. 13Sa enot na aldaw, magdolot kamo sa Kagurangnan nin dolot na pagkakan, sarong parong na nakakawili saiya: treseng torilyong baka, duwang lalaking karnero, asin katorseng lalaking kordero na manangtaon an edad, na gabos mayo nin ano man na kaninan. 14Idolot nindo an maninigong dolot na pagkakan na arinang sinalakan nin lana nin oliba: tolong kilong arina para sa lambang torilyo, duwang kilo para sa lambang lalaking karnero, 15asin sarong kilo para sa lambang kordero. 16Magdolot man kamo nin sarong lalaking kanding bilang dolot para sa kasalan, laen pa kan aroaldaw na tinutong na atang kaiba an dolot na pagkakan saka arak.
17Sa ikaduwang aldaw, magdolot kamo nin doseng torilyong baka, duwang lalaking karnero, asin katorseng lalaking kordero na manangtaon an edad, na gabos mayo nin ano man na kaninan. 18-19Kaiba kan mga iyan, idolot nindo an gabos na dolot na hinahagad para sa enot na aldaw.
20Sa ikatolong aldaw, magdolot kamo nin onseng torilyong baka, duwang lalaking karnero, asin katorseng lalaking kordero na manangtaon an edad, na gabos mayo nin ano man na kaninan. 21-22Kaiba kan mga iyan, idolot nindo an gabos na dolot na hinahagad para sa enot na aldaw.
23Sa ikaapat na aldaw, magdolot kamo nin sampolong torilyong baka, duwang lalaking karnero, asin katorseng lalaking kordero na manangtaon an edad, na gabos mayo nin ano man na kaninan. 24-25Kaiba kan mga iyan, idolot nindo an gabos na dolot na hinahagad para sa enot na aldaw.
26Sa ikalimang aldaw, magdolot kamo nin siyam na torilyong baka, duwang lalaking karnero, asin katorseng lalaking kordero na manangtaon an edad, na gabos mayo nin ano man na kaninan. 27-28Kaiba kan mga iyan, idolot nindo an gabos na dolot na hinahagad para sa enot na aldaw.
29Sa ikaanom na aldaw, magdolot kamo nin walong torilyong baka, duwang lalaking karnero, asin katorseng lalaking kordero na manangtaon an edad, na gabos mayo nin ano man na kaninan. 30-31Kaiba kan mga iyan, idolot nindo an gabos na dolot na hinahagad para sa enot na aldaw.
32Sa ikapitong aldaw, magdolot kamo nin pitong torilyong baka, duwang lalaking karnero, asin katorseng lalaking kordero na manangtaon an edad, na gabos mayo nin ano man na kaninan. 33-34Kaiba kan mga iyan, idolot nindo an gabos na dolot na hinahagad para sa enot na aldaw.
35Sa ikawalong aldaw, magtiripon kamo sa pagsamba asin dai kamo magtrabaho. 36Magdolot kamo nin tinutong na atang bilang sarong dolot na pagkakan sa Kagurangnan, sarong parong na nakakawili saiya: sarong torilyong baka, sarong lalaking karnero, asin pitong lalaking kordero na manangtaon an edad, na gabos mayo nin ano man na kaninan. 37-38Kaiba kan mga iyan, idolot nindo an gabos na dolot na hinahagad para sa enot na aldaw.
39Iyo ini an mga pagsusundon manongod sa mga tinutong na atang, mga dolot na pagkakan, mga dolot na arak, saka mga dolot para sa katoninongan na idodolot nindo sa Kagurangnan sa saindong itinalaan na mga pyesta. Laen pa iyan kan mga dolot na itatao nindo sa pag-otob nin sarong panuga o bilang mga boluntad na dolot.
40Kaya isinabi ni Moises sa mga Israelita an gabos na ipinagboot saiya nin Kagurangnan.
Currently Selected:
Mga Bilang 29: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
