Mga Bilang 28
28
An Aroaldaw na mga Dolot
(Exo. 29:38-46)
1Pinagbotan nin Kagurangnan si Moises 2na tukdoan an mga Israelita na magdolot sa Dios sa talaan na panahon kan mga dolot na pagkakan na nakakawili sa saiya.
3Iyo ini an mga dolot na pagkakan na idodolot sa Kagurangnan aroaldaw: para sa tinutong na atang, duwang lalaking kordero na manangtaon an edad, na gabos mayo nin ano man na kaninan. 4Idolot nindo an saro pagkaaga dangan an saro pagkabanggi; 5an lambang saro iibahan nin sarong kilo kan pinakamarahay na arinang trigo na minasa sa sarong litro kan pinakamarahay na lana nin oliba. 6Iyo iyan an dolot sa aroaldaw na tututongon nanggad siring kan enot na idinolot sa Bukid nin Sinai bilang sarong dolot na pagkakan, sarong parong na nakakawili sa Kagurangnan. 7Bilang dolot na arak na kaiba kan enot na kordero, iula nindo sa altar an sarong litrong arak. 8An saro pang kordero idolot nindo pagkabanggi asin siring kan pagkaagang dolot, ibahan nindo nin dolot na arak. Saro man iyan na dolot na pagkakan, sarong parong na nakakawili sa Kagurangnan.
An Dolot kun Sabbath
9Sa aldaw nin Sabbath, magdolot kamo nin duwang lalaking kordero na manangtaon an edad asin mayo nin ano man na kaninan, duwang kilong arina na sinalakan nin lana nin oliba bilang sarong dolot na pagkakan, saka an dolot na arak. 10An tinutong na atang na iyan idodolot nindo sa lambang Sabbath, laen pa kan aroaldaw na tinutong na atang saka dolot na arak.
An Dolot kun Enot na Aldaw kan Bulan
11Sa pagpoon kan lambang bulan, magdolot kamo sa Kagurangnan nin tinutong na atang: duwang torilyong baka, sarong lalaking karnero, pitong lalaking kordero na manangtaon an edad, na gabos mayo nin ano man na kaninan. 12Bilang dolot na pagkakan, magdolot man kamo nin arinang sinalakan nin lana nin oliba; tolong kilong arina para sa lambang torilyo; duwang kilo para sa lalaking karnero; 13asin sarong kilo para sa lambang kordero. An mga tinutong na atang na iyan mga dolot na pagkakan, sarong parong na nakakawili sa Kagurangnan. 14Kaiba kaiyan iyo an mga dolot na arak; duwang litrong arak para sa lambang torong baka, saro may kabangang litro para sa lalaking karnero, asin sarong litro para sa lambang kordero. Iyo ini an pagsusundon para sa tinutong na atang kun enot na aldaw kan lambang bulan kan taon. 15Laen pa kan aroaldaw na tinutong na atang saka dolot na arak, magdolot man kamo nin sarong lalaking kanding bilang dolot para sa kasalan.
An mga Dolot sa Pyesta nin Tinapay na mayo nin Lebadura
(Lev. 23:5-14)
16Selebraron nindo an Paskwa nin Kagurangnan sa ikakatorseng aldaw kan enot na bulan. 17Mapoon an pyesta sa ikakinseng aldaw asin mapadagos sa laog nin pitong aldaw; sa mga aldaw na iyan, kakanon nindo an tinapay na mayo nin lebadura. 18Sa enot na aldaw kan pyesta magtiripon kamo sa pagsamba asin dai kamo magtrabaho. 19Magdolot kamo sa Kagurangnan nin sarong tinutong na atang bilang dolot na pagkakan: duwang torilyong baka, sarong lalaking karnero, asin pitong lalaking kordero na manangtaon an edad, na gabos mayo nin ano man na kaninan. 20Idolot nindo an mga iyan kaiba an dolot na pagkakan na arinang sinalakan nin lana nin oliba: tolong kilo para sa lambang torilyo, duwang kilo para sa lalaking karnero, 21asin sarong kilo para sa lambang kordero. 22Magdolot man kamo nin sarong lalaking kanding bilang dolot para sa kasalan sa pagtubos saindo. 23Idolot nindo an mga iyan laen pa kan aroaldaw na tinutong na atang sa pagkaaga. 24Sa parehong paagi, sa laog nin pitong aldaw magdolot kamo sa Kagurangnan nin dolot na pagkakan, sarong parong na nakakawili saiya. Idolot nindo iyan laen pa kan aroaldaw na tinutong na atang saka dolot na arak. 25Sa ikapitong aldaw, magtiripon kamo sa pagsamba asin dai kamo magtrabaho.
An mga Dolot sa Pyesta nin Pag-ani
(Lev. 23:15-22)
26Sa enot na aldaw kan Pyesta nin Pag-ani, pagdara nindo sa Kagurangnan kan dolot na bagong trigo, magtiripon kamo sa pagsamba asin dai kamo magtrabaho. 27Magdolot kamo nin tinutong na atang, sarong parong na nakakawili sa Kagurangnan: duwang torilyong baka, sarong lalaking karnero, asin pitong lalaking kordero na manangtaon an edad, na gabos mayo nin ano man na kaninan. 28Idolot nindo an mga iyan kaiba an dolot na pagkakan na arinang sinalakan nin lana nin oliba: tolong kilo para sa lambang torilyo, duwang kilo para sa lalaking karnero, 29asin sarong kilo para sa lambang kordero. 30Magdolot man kamo nin sarong lalaking kanding bilang dolot para sa kasalan, asin sa paaging ini ginigibo nindo an seremonya nin paglinig para sa mga tawo. 31Idolot nindo an mga iyan saka an dolot na arak laen pa kan aroaldaw na tinutong na atang asin kan dolot na pagkakan.
Currently Selected:
Mga Bilang 28: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
