Mga Bilang 30
30
Mga Pagsusundon Manongod sa mga Panuga
1Itinao ni Moises sa mga pamayo kan mga tribu nin Israel an minasunod na katukdoan. 2Kun an sarong lalaki manuga nin ano man sa Kagurangnan o manumpa na malikay sa sarong bagay, kaipuhan dai niya paglapason an saiyang panuga; kaipuhan gibohon niya an gabos sosog sa saiyang sinabi.
3Kun an sarong hoben na babae na nag-eerok pa sa harong kan saiyang ama manuga nin ano man sa Kagurangnan o manumpa na malikay sa sarong bagay, 4dangan madangog iyan kan saiyang ama, alagad dai ini maggirong, an lambang panuga asin sumpa kan babae magkakaigwa nin halaga. 5Alagad kun dai magtugot an saiyang ama pakadangog kan panuga, mayo nin halaga an panuga saka sumpa kan hoben na babae. Papatawadon siya nin Kagurangnan huli ta dai nagtugot an saiyang ama.
6Kun an sarong daraga, tuyo man o bakong saboot na manuga nin ano man o manumpa na malikay sa sarong bagay, dangan magpaagom, 7kun madangog iyan kan saiyang agom alagad dai maggirong, an mga panuga saka sumpa kan babae magkakaigwa nin halaga. 8Alagad kun dai magtugot an saiyang agom pakadangog kan panuga, mayo nin halaga an panuga saka sumpa, na tuyo man o bakong saboot na ginibo niya. Papatawadon siya nin Kagurangnan.
9Alagad an lambang panuga saka sumpa na ginibo nin sarong babaeng balo o nin sarong babaeng sinuhayan nin agom kaipuhan na otobon.
10Kun an sarong may agom na babae manuga nin ano man o manumpa na malikay sa sarong bagay, 11dangan madangog iyan kan saiyang agom, alagad dai ini maggirong ni magsalungat, an gabos niyang panuga saka sumpa magkakaigwa nin halaga. 12Alagad kun dai magtugot an saiyang agom pakadangog kan panuga, mayo nin halaga an panuga saka sumpa kan babae. Papatawadon siya nin Kagurangnan huli ta dai nagtugot an saiyang agom. 13Igwa nin deretso an saiyang agom na magtugot o magpawara nin halaga sa ano man na panuga o sumpa na ginibo niya. 14Kun an lalaki dai magsalungat sa aldaw na madangog niya an panuga kan saiyang agom, kaipuhan otobon kan babae an gabos niyang ipinanuga o isinumpa. An panuga pinapahalagahan kan lalaki huli sa dai niya pagsalungat sa aldaw na madangog niya an panuga. 15Alagad kun pakalihis nin nagkapirang aldaw pawaraan iyan nin halaga kan lalaki, siya an magtitios kun dai naotob an panuga.
16Iyo ini an mga pagsusundon na itinao nin Kagurangnan ki Moises manongod sa mga panuga nin sarong daraga na nag-eerok sa harong nin saiyang ama o nin sarong may agom na babae.
Currently Selected:
Mga Bilang 30: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
