Mga Bilang 12
12
Pinadusahan si Miriam
1Taga Cus an naagom ni Moises kaya binasol siya ni Miriam asin ni Aaron. 2Olay ninda, “Nagtaram daw an Kagurangnan sa paagi sana nanggad ni Moises? Bakong nagtaram man siya sa paagi nyato?” Nadangog nin Kagurangnan an saindang sinabi. (3Si Moises sarong tawong orog na mapakumbaba ki sa kiisay man na nabubuhay sa kinaban.)
4Biglang nagtaram an Kagurangnan ki Moises, ki Aaron asin ki Miriam, “Magduman kamong tolo sa Tabernakulo.” Nagduman sinda 5dangan naghilig an Kagurangnan sa sarong hariging panganoron, nagtindog sa pintoan kan Tabernakulo dangan inapod si Aaron asin si Miriam. Nagrani sinda, 6dangan nagtaram an Kagurangnan, “Dangoga nindo an sakong itataram! Kun may mga propeta saindo, minapahiling ako sainda sa mga bisyon, asin kinakaolay ko sinda sa mga pangatorogan. 7Alagad bakong siring an ginigibo ko ki Moises na sakong sorogoon; siya an pinaniwalaan ko kan sakong banwaan. 8Hampangan ko siyang kinakaolay, maliwanag kong itinataram saiya an gabos asin bako sa mga paokod; nahiling niya an sakong porma. Tadaw ta nangahas kamong magtaram laban sa sorogoon kong si Moises?”
9Anggot sainda an Kagurangnan, kaya kan maghale siya, 10asin kan maghale sa Tabernakulo an panganoron, nalakop tolos an hawak ni Miriam kan nakakatakot na helang sa kublit asin nagputi siring sa ambon. Kan mahiling idto ni Aaron, 11nagtaram siya ki Moises, “Nakikimaherak ako saimo na dai mo kami pagpadusahan huli kan naginibo ming kalolongan asin kasalan. 12Dai mo siya pagpabayaan na makaarog sa sarong namundag na gadan, na an kabanga kan saiyang kublit mayo na.”
13Kaya namibi si Moises sa Kagurangnan, “Nakikimaherak ako, O Dios, na paomayan mo siya!”
14Nagsimbag an Kagurangnan, “Kun linutaban siya sa lalawogon kan saiyang ama, bakong dadarahon niya an kasosopgan sa laog nin pitong aldaw? Pabayaan nindo siya sa luwas kan kampo sa laog nin pitong aldaw; pakatapos kaiyan pwede na siyang makalaog.” 15Kaya pitong aldaw si Miriam sa luwas kan kampo, asin dai nagpadagos sa pagbaklay an mga Israelita sagkod na dai siya nakalaog giraray. 16Dangan naghale an mga Israelita sa Hazerot asin nagkampo sa kalangtadan nin Paran.
Currently Selected:
Mga Bilang 12: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
