Mga Bilang 13
13
An Mga Espiya
(Deut. 1:19-33)
1Nagtaram an Kagurangnan ki Moises, 2“Pumili ka nin sarong lider sa lambang tribu asin ipadara mo sinda bilang mga espiya tanganing magsiyasat sa daga nin Canaan, an dagang itatao ko sa banwaan nin Israel.” 3-15Nagkuyog si Moises asin hale sa kalangtadan nin Paran nagpadara siya nin mga lider. Iyo ini an mga ngaran ninda:
| Tribu | Pamayo |
|---|---|
| Ruben | si Sammua na aking lalaki ni Zaccur |
| Simeon | si Safat na aking lalaki ni Hori |
| Juda | si Caleb na aking lalaki ni Jefunne |
| Issakar | si Igal na aking lalaki ni Jose |
| Efraim | si Oseas na aking lalaki ni Nun |
| Benjamin | si Palti na aking lalaki ni Rafu |
| Zabulon | si Gaddiel na aking lalaki ni Sodi |
| Manases | si Gaddi na aking lalaki ni Susi |
| Dan | si Ammiel na aking lalaki ni Gemalli |
| Aser | si Setur na aking lalaki ni Miguel |
| Neftali | si Nabi na aking lalaki ni Vofsi |
| Gad | si Geuel na aking lalaki ni Maki |
16Sinda an mga espiya na ipinadara ni Moises tanganing magsiyasat kan daga. An ngaran ni Oseas na aki ni Nun rinibayan niya nin Josue.
17Kan palakawon na sinda ni Moises, nagsabi siya, “Hale digdi magduman kamo sa amihan pasiring sa habagat na parte kan daga nin Canaan asin magpadagos kamo sa mabulod na daga. 18Hilingon nindo kun ano an kamugtakan kan daga. Aramon nindo kun makokosog o maluluya an nag-eerok duman, asin kun dakul o dikit sinda. 19Hilingon nindo kun marahay o bako an daga na saindang pinag-eerokan asin kun nag-eerok sinda sa mga banwa na mayong kudal o sa mga syudad na nakukudalan. 20Hilingon nindo kun matubang o bako an daga; kun makahoy o bako. Pagmaisog kamo asin pagbalik nindo, magdara kamo nin nagkapirang prutas.” (Panahon kaidto nin paghinog kan ubas.)
21Kaya nagpasiring sa amihan an mga espiya asin siniyasat ninda an daga magpoon sa kalangtadan nin Zin sa parteng habagat sagkod sa Rehob, harani sa Dalan nin Hamat sa amihan. 22Nagduman ngona sinda sa habagat na parte kan daga nin Canaan dangan sa Hebron, saen nag-eerok an mga kamaganakan ni Ahiman, ni Sesai asin ni Talmai, an kapagarakian kan sarong rasa nin mga higante na inaapod Anakim. (Pinatindog an Hebron mga pitong taon bago mapatindog an Zoan sa Egipto.) 23Nakaabot sinda sa Kapantayan nin Escol, asin nagputol sinda duman nin sarong sanga nin ubas na igwa nin sarong pungot na huli sa kagabatan kaipuhan pagbuligan nin duwang tawo. Nagkua man sinda nin bunga kan granada asin higera. (24An lugar na idto nginaranan Kapantayan nin Escol#13:24 ESCOL: Sa Hebreyo, an ngaran na ini nangangahulogan pungot nin ubas. huli kan sarong pungot nin ubas na pinutol duman kan mga Israelita.)
25Pakasiyasat ninda kan daga sa laog nin kwarentang aldaw nagbalik sinda 26ki Moises, ki Aaron asin sa bilog na komunidad nin Israel duman sa Kades sa kalangtadan nin Paran. Inosip ninda an saindang nahiling dangan ipinahiling ninda an mga dara nindang prutas. 27Nagsabi sinda ki Moises, “Siniyasat mi an daga asin nahiling ming matubang idto; uya an mga prutas na kinua mi duman. 28Alagad mapangyari an mga nag-eerok duman. Darakula an saindang mga syudad sagkod matitibay an mga kudal. Laen pa kaiyan nahiling mi man an kapagarakian kan mga higante. 29An mga Amalekita nag-eerok sa habagat na parte kan daga nin Canaan; an mga Heteo, Jebuseo, asin Amoreo nag-eerok sa mabulod na daga, asin an mga Cananeo nag-eerok sa baybayon kan Dagat nin Mediteraneo dangan sa pangpang kan Salog nin Jordan.”
30Pinakaalo ni Caleb an mga tawo na nakapalibot ki Moises dangan nagsabi, “Salakayon na nyato ngunyan asin sakopon an daga; kaya tang sakopon idto.”
31Alagad nagsabi an mga lalaking kaibahan ni Caleb, “Dai ta pwedeng salakayon an mga tawong idto; mas makosog sinda ki sa sato.” 32Kaya pinalakop ninda sa mga Israelita an salang bareta manongod sa dagang siniyasat ninda. Olay ninda, “Hinahalon kan dagang siniyasat mi an mga nag-eerok duman. Haralangkaw an gabos na tawo na nahiling mi. 33Dangan nakahiling pa kami duman nin mga higante, an kapagarakian ni Anak. Sa paghiling mi, garo sana kami mga doron, asin arog man siguro kaiyan an paghona ninda samo.”
Currently Selected:
Mga Bilang 13: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
