Mga Bilang 11
11
An Lugar na Nginaranan Tabera
1Nagpoon pagreklamo sa Kagurangnan an mga Israelita manongod kan saindang mga kasakitan. Kan nadangog sinda nin Kagurangnan, naanggot siya asin pinadarahan niya sinda nin kalayo. Nasulo an nagkapira sainda saka an sarong poro kan kampo. 2Nakimaherak an mga tawo ki Moises; namibi siya sa Kagurangnan asin napalsok an kalayo. 3Kaya an lugar nginaranan Tabera#11:3 TABERA: Sa pandangog, an ngaran na ini nakakaarog sa Hebreyong tataramon na nagkakalayo. huli ta sinulo sinda duman kan kalayo nin Kagurangnan.
Nagpili si Moises nin Setentang Lider
4Igwa nin mga dayuhan na nagbabaklay kaiba kan mga Israelita. An mga dayuhan nagkaigwa nin sobrang pagmawot na makakakan nin karne asin maski an mga Israelita nagpoon man magreklamo, “Kun igwa kutana kita nin makakakan na karne! 5Sa Egipto daing bayad kitang nagkakan nin sira. Duman igwa kita nin mga pipino, melon, sibulyas asin mga bawang. 6Ngunyan mayo na an satong kosog. Mayo kita nin kinakakan sa aroaldaw kundi an mannang ini!”
(7An manna garo pisog nin kulantro na krema an kolor. 8-9Kun banggi, minahugpa iyan sa kampo kaiba kan ambon. Pagkaaga, pinupurot iyan kan mga Israelita, ginigiling o binabayo tanganing magin arina, dangan linalabonan asin ginigibong tinapay. An namit kaiyan garo tinapay na sinalakan nin lana nin oliba.)
10Nadangog ni Moises an reklamo kan gabos na tawo na nakatindog sa pintoan kan saindang mga tolda. Naanggot nin marahay an Kagurangnan, kaya namondo si Moises. 11Nagsabi si Moises sa Kagurangnan, “Tadaw ta maraot an pagtratar mo sako? Tano ta dai mo ako nawilihan? An mga tawong ini sarong pasanon na magabat nin marahay. Tadaw ta ibinugtak mo sinda sako? 12Ipinangidam ko daw sinda? Ako daw an nangaki sainda tanganing taraman mo ako na kilikon ko sinda, siring kan pagkilik sa sarong aki na nagsososo, pasiring sa daga na ipinanuga mo sa saindang magurang? 13Saen ako makua nin karne na ipapakakan sainda gabos? Padagos sinda sa paghibi sa paghagad nin karne. 14An mga tawong ini sarong pasanon na magabat nin marahay para sako; dai ko sinda madadara na ako sanang saro! 15Kun iyan an gigibohon mo, maherak ka sako asin gadanon mo na ako tanganing dai na ako magtios kan saimong pasakit.”
16Tinaraman nin Kagurangnan si Moises, “Pumili ka nin setentang mga gurang sa Israel, idtong minimidbid na mga lider kan komunidad. Darahon mo sinda sako sa Tabernakulo, asin sabihan mo sinda na magtindog sa kataed mo. 17Mahilig ako dangan makikiolay saimo duman. Kukuahon ko an ibang espiritu na itinao ko saimo asin itatao ko sainda tanganing makatabang sinda sa pag-otob mo sa saimong katongdan para sa mga tawong ini; dangan dai ka na magsosolo sa pag-otob kaiyan. 18Sabihan mo an mga tawo na maglinig sinda para sa aga asin makakan na sinda nin karne. Nagreklamo sinda asin naghapot kun siisay an matao sainda nin karne. Nagsabi pa sinda na mas marahay an saindang buhay sa Egipto. Kaya tatawan ko sinda nin karne dangan makakan sinda. 19Bako sana para sa saro, duwa, lima, sampolo o sa beynteng aldaw an itatao ko sainda, 20kundi para sa sambulan, sagkod na magluwas iyan sa saindang dungo dangan mauyam sinda. Ini an mangyayari huli ta isinikwal ninda ako na kaiba ninda asin nagsabi sinda na marahay pang dai na sinda naghale sa Egipto.”
21Nagsimbag si Moises, “An bilang kan mga tawong kairiba ko minaabot sa seis syentos mil, asin nagtaram ka na tatawan mo sinda nin karne na makakakan ninda sa laog nin sambulan! 22May magkanigo daw na baka saka karnero na bubunoon tanganing magkanigo sainda? Kun madakop an gabos na sira sa dagat, magkanigo daw iyan sainda?”
23Tinaraman nin Kagurangnan si Moises, “Igwa daw nin kasagkoran an sakong kapangyarihan? Mahihiling mo ngunyan kun mangyayari an sakong itinaram o dai!”
24Kaya nagluwas si Moises asin ibinareta sa mga tawo an itinaram nin Kagurangnan. Nagpili siya nin setentang mga lider asin pinatindog sa palibot kan Tabernakulo. 25Dangan naghilig sa panganoron an Kagurangnan asin kinaolay si Moises. Kinua nin Kagurangnan an ibang espiritu na itinao niya ki Moises asin itinao sa setentang mga lider. Kan maghilig sainda an espiritu, nagpoon sindang magpropesiya siring sa mga propeta, alagad dai iyan nahaloy.
26Kan oras na iyan nawalat sa kampo si Eldad saka si Medad, duwang lalaki na kairiba man sa setenta. Alagad minsan dai sinda nagduman sa Tabernakulo, naghilig man sainda an espiritu asin nagpropesiya sinda duman sa kampo. 27Nagdalagan an sarong lalaki tanganing ipaisi ki Moises an ginigibo ni Eldad saka ni Medad.
28Huli kaini, nagsabi si Josue na aki ni Nun, asin katabang ni Moises magpoon kan siya hoben pa, “Kagurangnan kong Moises, paontokon mo sinda!”
29Nagsimbag si Moises, “Nagmamakulog ka daw sako? Tawan logod nin Kagurangnan kan saiyang espiritu an gabos na tawo asin gibohon na propeta sinda gabos!” 30Dangan nagbalik sa kampo si Moises asin an setentang lider nin Israel.
Nagpadara nin mga Pugo an Kagurangnan
31An Kagurangnan nagpadara nin doros na may darang mga pugo hale sa dagat, asin an mga iyan nagralayog sa langkaw na kulang sa sarong metro hale sa daga. Naghurugpa an mga pugo sa kampo asin sa mga lugar sa palibot kaiyan, dakul na kilometro an kahiwasan pasiring sa gabos na direksyon.#11:31 dagat, asin an mga iyan nagralayog…direksyon; o dagat. An mga pugo naghurugpa sa kampo asin sa mga lugar sa palibot kaiyan, dakul na kilometro an kahiwasan pasiring sa gabos na direksyon, sagkod na natambak sa daga an mga pugo na haros sarong metro an langkaw. 32Kaya nandakop nin mga pugo an mga Israelita kan aldaw asin kan bangging idto patin kan suminunod pang aldaw; dai makulang sa sangribong kilo an nadakop kan lambang saro. Binalad ninda an mga pugo sa palibot kan kampo. 33Alagad dai pa ngani ninda nauubos an karne, naanggot na sainda an Kagurangnan asin nagdara siya sainda nin peste. 34Kaya an lugar nginaranan Kibrot-Hattaava huli ta duman ninda ilinubong an mga tawong nagin sobra an pagmawot sa karne.
35Hale duman, nagbaklay sinda pasiring sa Hazerot asin nagkampo duman.
Currently Selected:
Mga Bilang 11: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
