Mga Bilang 10
10
An Mga Platang Trompeta
1Nagtaram an Kagurangnan ki Moises, 2“Gumibo ka nin duwang trompeta sa pinulpog na plata, na gagamiton mo sa pag-apod kan mga tawo tanganing magtiripon asin tanganing magpadagos sa pagbaklay. 3Kun sabay na patanogon an duwa, matiripon an bilog na komunidad sa may pintoan kan Tabernakulo. 4Alagad kun saro sana an pinatanog, an mga pamayo sana kan mga kamaganakan an maatubang saimo. 5Kun patanogon an trompeta bilang alarma, malakaw an mga tribung nakakampo sa sirangan. 6Kun patanogon iyan nin ikaduwang beses, malakaw an mga tribung nakakampo sa habagat, kaya papatanogon an trompeta bilang alarma kun mapadagos sa pagbaklay, 7alagad kun aapodon an bilog na komunidad, papatanogon nin sabay an duwang trompeta. 8An mga trompeta papatanogon kan mga pading aki ni Aaron.
“An minasunod na pagsusundon kaipuhan otobon sa gabos na panahon. 9Kun kamo makigera sa mga kaiwal na nagsalakay saindo sa sadiri nindong daga, patanogon nindo an mga trompeta bilang alarma, tanganing ako, an Kagurangnan na saindong Dios, an matabang saindo asin maligtas sa saindo. 10Siring man sa aldaw nin kaogmahan, sa itinalaan na mga pyesta asin sa enot na aldaw kan lambang bulan, papatanogon nindo an mga trompeta kun idodolot na nindo an saindong mga tinutong na atang asin an saindong dolot para sa katoninongan. Dangan tatabangan ko kamo. Ako an Kagurangnan na saindong Dios.”
Naghale sa Sinai an mga Israelita
11Kan ikabeynteng aldaw kan ikaduwang bulan sa ikaduwang taon, magpoon kan maghale sinda sa Egipto, uminitaas hale sa ibabaw kan Tabernakulo an panganoron. 12Kaya naghale sa Sinai an mga Israelita asin nagpadagos sa pagbaklay. An panganoron nag-ontok sa kalangtadan nin Paran.
13Nagpoon sindang magbaklay sosog sa pagboot nin Kagurangnan ki Moises, 14asin sa lambang pagbaklay ninda, an nangengenot iyo an nasa irarom kan bandera kan dibisyon na pinapamayohan kan tribu ni Juda na an lider iyo si Nason na aki ni Amminadab. 15An lider kan tribu ni Issakar iyo si Netanel na aki ni Zuar, 16asin an lider kan tribu ni Zabulon iyo si Eliab na aki ni Helon.
17Masunod an mga kamaganakan ni Gerson asin ni Merari na mga paradara kan Tabernakulo, pakatangkas kaiyan.
18An masunod iyo an mga nasa irarom kan bandera kan dibisyon na pinamamayohan kan tribu ni Ruben na an lider iyo si Elizur na aki ni Sedeur. 19An lider kan tribu ni Simeon iyo si Selumiel na aki ni Zurisaddai, 20asin an lider kan tribu ni Gad iyo si Eliasaf na aki ni Deuel.
21Masunod an mga Levitang kamaganakan ni Kohat na dara an mga sagradong bagay. Pag-abot ninda sa bagong kampo, napatindog na an Tabernakulo.
22Masunod an nasa irarom kan bandera kan dibisyon na pinamamayohan kan tribu ni Efraim na an lider iyo si Elisama na aki ni Ammihud. 23An lider kan tribu ni Manases iyo si Gamaliel na aki ni Pedazur, 24asin an lider kan tribu ni Benjamin iyo si Abidan na aki ni Gideoni.
25An nasa irarom kan bandera kan dibisyon na pinamamayohan kan tribu ni Dan, na iyo an nasa hurihan asin iyo an panlikod na bantay kan gabos na dibisyon, iyo an huring malakaw, sa pamamayo ni Ahiezer na aki ni Ammisaddai. 26An lider kan tribu ni Aser iyo si Pagiel na aki ni Okran, 27asin an lider kan tribu ni Neftali iyo si Ahira na aki ni Enan. 28Iyo ini an orden kan banwaan nin Israel kun sinda nagpapadagos sa pagbaklay.
29Sinabihan ni Moises an saiyang bayaw na si Hobab na aki kan panugangan niyang si Jetro na Midianita, “Maduman na kami sa lugar na ipinanugang itatao samo nin Kagurangnan. Nanuga siya na tatawan nin mauswag na pamumuhay an Israel kaya umiba ka samo asin hihirasan mi ika kan biyayang samong makakamtan.”
30Nagsimbag si Hobab, “Dai ako maiba saindo; mapuli ako sa sadiri kong banwaan.”
31Nagsabi si Moises, “Nakikimaherak ako na dai mo kami pagbayaan. Aram mo kun saen kami pwedeng magkampo duman sa kalangtadan, asin pwede mo kaming giyahan. 32Kun ibahan mo kami, hihirasan mi ika kan gabos na biyayang itatao samo nin Kagurangnan.”
Nagbaklay an mga Tawo
33Pakahale kan mga Israelita sa Sinai, an banal na bukid, tolong aldaw sindang naglakaw. Naenot sainda an Kaban nin Tipan nin Kagurangnan tanganing maghanap nin lugar na saindang mapapahingaloan. 34Kun aldaw, linilindongan sinda kan panganoron nin Kagurangnan mantang sinda nagbabaklay.
35Kun ilalakaw na an Kaban nin Tipan minasabi si Moises, “Pagtindog, O Kagurangnan; magkawararak logod an saimong mga kaiwal asin magdurulag an mga anggot saimo!” 36Kun minaontok na an Kaban nin Tipan, minasabi si Moises, “Pagbalik, O Kagurangnan, sa ribo-ribong pamilya nin Israel.”#10:36 Pagbalik…Israel; o Pagbalik, Kagurangnan, ika na arog sa sarong hukbo nin minilyon para sa Israel.
Currently Selected:
Mga Bilang 10: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
