Mga Bilang 9
9
An Ikaduwang Paskwa
1Kan enot na bulan kan ikaduwang taon pakahale kan mga Israelita sa Egipto, nagtaram an Kagurangnan ki Moises sa Desyerto nin Sinai, 2-3“Sabihan mo an mga Israelita na selebraron an Paskwa sa talaan na panahon, pagsinarom kan ikakatorseng aldaw kan bulan na iyan sosog sa gabos na pagsusundon.” 4Kaya sinabihan ni Moises an mga Israelita na selebraron an Paskwa, 5asin ginibo ninda iyan kan magsinarom na an ikakatorseng aldaw kan enot na bulan, duman sa Desyerto nin Sinai. An gabos ginibo kan mga Israelita sosog sa pagboot nin Kagurangnan ki Moises.
6Alagad igwa nin nagkapirang mga lalaking maati huli sa pakaduta sa gadan, asin dai sinda nakaselebrar kan Paskwa kan aldaw na idto. Nagdolok sinda ki Moises asin ki Aaron 7dangan nagsabi, “Maati kami huli sa pakaduta sa gadan, alagad tadaw ta pagbabawalan kaming magdara kan dolot sa Kagurangnan sa talaan na panahon kaiba kan ibang mga Israelita?”
8Nagsimbag si Moises, “Maghalat kamo ta dadangogon ko kun ano an ipagboboot nin Kagurangnan manongod saindo.”
9Tinaraman nin Kagurangnan si Moises, 10“Sabihan mo an mga Israelita na an siisay man saindo o sa saindong kapagarakian na nagin maati huli sa pakaduta sa gadan o kaya nagbabaklay sa harayong lugar, alagad boot magselebrar kan Paskwa, 11na tinutugotan na magselebrar kaiyan pakalihis nin sarong bulan. Andamon nindo an korderong Pangpaskwa sa ikaduwang bulan, pagsinarom kan ikakatorseng aldaw. Kakakanon nindo an kordero kaiba kan mga tinapay na mayo nin lebadura saka mapait na gulay. 12Dai kamo magtada nin pagkakan para sa masunod na aldaw, asin dai nindo pagbarian nin tolang an kordero. Selebraron nindo an Paskwa sosog sa gabos na pagsusundon. 13Alagad kun an tawong malinig asin dai nasa pagbaklay, magpabaya kan pagselebrar kan Paskwa, dai na siya ibibilang na kaayon sa sakuyang banwaan, huli ta dai niya idinolot sa talaan na panahon an dolot sa sako. Magdudusa an tawong iyan huli kan saiyang kasalan.
14“Kun an sarong dayuhan na nakikihimanwa saindo boot magselebrar kan Paskwa, kaipuhan gibohon niya iyan sosog sa gabos na pagsusundon. An pagboot na ini para sa gabos, Israelita man o dayuhan.”
An Naglalaad na Panganoron
(Exo. 40:34-38)
15-16Kan aldaw na itinindog an Tabernakulo, nagdatong an sarong panganoron asin tinahoban an Tabernakulo. Sa banggi, an panganoron garo kalayo. 17Kun minaitaas an panganoron, minapadagos sa paglakaw an mga Israelita asin minakampo sinda sa lugar na iniibabaan kaiyan. 18Sa pagboot nin Kagurangnan, minalakaw an mga Israelita, asin sa pagboot niya minaontok sinda. Sa gabos na aldaw na an panganoron nasa ibabaw kan Tabernakulo dai sinda minapadagos sa pagbaklay. 19Kun nahahaloy an panganoron sa ibabaw kan Tabernakulo, kinukuyog kan mga Israelita an Kagurangnan asin dai sinda minalakaw. 20Iyo man iyan an saindang ginigibo kun an panganoron nagkapirang aldaw sana sa ibabaw kan Tabernakulo; sa pagboot nin Kagurangnan dai sinda minahale sa kampo, asin sa pagboot nin Kagurangnan minapadagos sinda sa pagbaklay. 21Kun minsan, an panganoron minatahob sana magpoon sa hapon sagkod sa aga; pag-itaas kaiyan pagkaaga, minapadagos na sinda. Ano man na oras na minaitaas an panganoron, aldaw man o banggi, minalakaw sinda. 22Minsan iyan duwang aldaw sana, sarong bulan, sarong taon o labi pa, mantang an panganoron nasa ibabaw kan Tabernakulo dai sinda minapadagos; minalakaw sana sinda kun minaitaas na an panganoron. 23Minaontok sinda asin minapadagos sa pagbaklay sa pagkuyog kan mga pagboot na itinao nin Kagurangnan sa paagi ni Moises.
Currently Selected:
Mga Bilang 9: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
