Levitico 21
21
An Kabanalan kan mga Padi
1Tinaraman nin Kagurangnan si Moises, “Sabihan mo an mga pading aki ni Aaron na dai nin siisay man sainda na mag-ati sa sadiri huli sa pakipaglubong sa sarong kadugo, 2pwera kun saiyang ina, ama, aking lalaki o babae, tugang na lalaki o 3tugang na babae na mayong agom na nag-eerok sa saiyang harong. 4Dai siya dapat na magpaati sa pagkagadan kan sarong nagin kadugo niya huli sa pag-inagoman.
5“Dai nin siisay man na padi na mag-aris kan arin man na parte kan saiyang payo o magputol kan saiyang barabas o maglugad kan saiyang hawak sa pagpahiling na siya nagmomondo. 6Kaipuhan na magin banal sinda asin dai ipasopog an sakong ngaran, huli ta sinda an nagdodolot kan mga dolot na pagkakan sa sako; kaya maninigo na sinda magin banal. 7An sarong padi dai dapat mag-agom nin sarong babaeng dating maraot na babae o sarong babaeng bako nang birhen o sarong babaeng sinuhayan nin saiyang agom; an sarong padi banal sa saiyang Dios. 8Kaipuhan na midbidon kan banwaan na an padi banal huli ta siya an minadara sako kan mga dolot na pagkakan. Ako an Kagurangnan; ako banal asin ako an nagpapabanal sa sakong banwaan. 9Kun an aking babae nin sarong padi magin sarong maraot na babae, ipinapasopog niya an saiyang ama kaya dapat na suloon siya sagkod na magadan.
10“An Halangkaw na Padi inulaan sa payo kan lanang panlahid asin kinonsagra tanganing magsulot kan mga gubing na sa padi, kaya kaipuhan dai niya pagbayaan na dai masukray an saiyang buhok o na paggision an saiyang gubing sa pagpahiling na siya nagmomondo. 11Kaya maski an gadan iyo an saiyang ama o ina, dai siya dapat na magdolok; magigin maati siya kun gibohon niya iyan. 12Dai man siya dapat na magluwas sa Tabernakulo asin dai niya iyan pagdigtaan; huli ta kinonsagra siya kan panlahid na lana kan saiyang Dios. 13Sarong birhen an dapat niyang agomon, 14bakong sarong babaeng balo o sarong sinuhayan kan saiyang agom o sarong dating maraot na babae. Sarong birhen nanggad sana an dapat niyang agomon asin kaipuhan hale sa saiyang tribu, 15tanganing dai madigtaan an saiyang mga aki sa tahaw kan saiyang banwaan; huli ta ako an Kagurangnan, asin ako an naglaen saiya bilang Halangkaw na Padi.”
16Tinaraman nin Kagurangnan si Moises, 17“Sabihan mo si Aaron na mayo nin siisay man sa saiyang kapagarakian na may kaninan sa hawak an pwedeng magdara sako kan dolot na pagkakan sa gabos na panahon. 18An siisay man na may kaninan sa hawak dai pwedeng magdolot nin atang: an buta, an pilay, an may pinilaan sa lalawogon o hawak, 19an bari an kamot o bitis; 20an buktot o an mongan, an may helang sa mata o sa kublit, asin an kinapon. 21An siisay man sa kapagarakian ni Aaron na may kaninan dai pwedeng magdara kan dolot na pagkakan sa sako. 22Pwede siyang magkakan kan banal na dolot na pagkakan asin kan pinakabanal na pagkakan na idinolot sa sako, 23alagad nin huli ta may kaninan siya, dai siya pwedeng magrani sa panlipod na kurtina o sa altar. Dai niya dapat pagdigtaan an mga banal na bagay na ini, huli ta ako an Kagurangnan, asin ako an nagpapabanal kan mga iyan.”
24Iyo ini an isinabi ni Moises ki Aaron, asin sa mga aki kaini patin sa bilog na banwaan nin Israel.
Currently Selected:
Levitico 21: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
