Levitico 22
22
An Kabanalan kan mga Dolot
1Tinaraman nin Kagurangnan si Moises, 2“Sabihan mo si Aaron asin an saiyang mga aki na dai ninda pagdarahan nin kasosopgan an banal kong ngaran, kaya galangan ninda an mga banal na dolot na dinadara sako kan mga Israelita. Ako an Kagurangnan. 3Kun an siisay man sa saiyang kapagarakian sa gabos na henerasyon, mantang maati, magdolok sa banal na mga dolot na dinara sako kan mga Israelita, siya dai na nanggad makapaglilingkod sa altar. Ako an Kagurangnan.
4“Mayo nin siisay man sa kapagarakian ni Aaron na igwang nakakatakot na helang sa kublit o helang na turo an pwedeng magkakan kan arin man sa mga banal na dolot, sagkod na dai pa siya nagigin malinig. Magigin maati an siisay man na padi kun makadotdot siya nin ano man na maati arog baga sa sarong gadan o sa sarong lalaking linuluwasan nin sadiring banhi, 5o sa ano man na maating hayop o tawo. 6An padi na nagin maati magdadanay na maati sagkod magbanggi asin dai pwedeng kumakan kan banal na mga dolot sagkod na dai pa siya nagkakarigos. 7Pakasolnop kan aldaw, magigin malinig na siya, asin pwede na siyang magkakan kan banal na mga dolot, huli ta iyo ini an saiyang pagkakan. 8Dai siya dapat magkakan kan karne kan arin man na hayop na nagadan o ginadan kan mga maringis na hayop; makakaati iyan saiya. Ako an Kagurangnan.
9“Kaipuhan otobon kan gabos na padi an itinao kong mga pagboot, tanganing dai sinda magkasala asin magadan huli sa paglapas ninda kaiyan. Ako an Kagurangnan na nagpapabanal sainda.
10“An mga kaayon sana kan pamilya kan padi an pwedeng kumakan kan mga banal na dolot. Dai pwedeng kumakan kaiyan maski an dayuhan na nag-eerok sa harong kan padi o an saiyang tinandanan na sorogoon. 11Alagad an mga oripon na nabakal kan padi kan sadiri niyang kwarta o an namundag duman sa saiyang harong, pwedeng kumakan kan pagkakan na inako kan padi. 12An aking babae kan padi na naagom nin bakong padi, dai pwedeng kumakan kan arin man kan mga banal na dolot. 13Alagad kun an aking babae kan padi nabalo o sinuhayan kan saiyang agom asin dai nag-aki, dangan buminalik sa harong nin saiyang ama arog kan daraga pa siya, pwede siyang kumakan kan pagkakan kan saiyang ama. An kaayon sana kan pamilya kan padi an pwedeng kumakan kaini.
14“Kun an sarong tawo na bako man kaayon kan pamilya kan padi dai tuyong makakakan kan arin man sa mga banal na dolot, kaipuhan bayadan niya an padi kan bilog na kantidad kaiyan asin madagdag pa siya nin beynte porsyento. 15Dai nanggad paglanghadan kan mga padi an mga banal na dolot sa Kagurangnan kan banwaan nin Israel, 16huli sa pagpakakan kaiyan sa mga bakong maninigo; magdadara iyan nin kasalan asin padusa sa tawong iyan. Ako an Kagurangnan asin ako an nagpapabanal kan mga dolot.”
17Dangan tinaraman nin Kagurangnan si Moises, 18“Sabihan mo si Aaron asin an saiyang mga aki patin an bilog na banwaan nin Israel na kun an sarong Israelita o an siisay man na dayuhan na nag-eerok sa Israel magdara nin sarong atang sa pag-otob nin sarong panuga o bilang sarong boluntad na dolot, kaipuhan mayo nin ano man na kaninan an hayop. 19Tanganing akoon ko an dolot, kaipuhan lalaki an hayop asin mayo nin kaninan. 20Dai kamo magdolot nin hayop na igwa nin kaninan, huli ta dai ko iyan aakoon. 21Kun may magdara sa Kagurangnan nin dolot para sa katoninongan sa pag-otob nin sarong panuga o bilang sarong boluntad na dolot, kaipuhan mayo nin kaninan an hayop, tanganing akoon ko iyan. 22Dai kamo magdolot sa Kagurangnan nin arin man na hayop na buta o pilay o igwang pinutolan sa hawak, o may gatok sa kublit o pigsa o sangaw. Dai nanggad kamo magdolot nin siring na hayop sa altar bilang dolot na pagkakan. 23Bilang boluntad na dolot, pwede nindong idolot an sarong hayop na dai nagdakula o may makanos na hawak; alagad dai iyan aakoon kun idolot nindo iyan sa pag-otob nin sarong panuga. 24Dai man kamo magdara sa Kagurangnan nin ano man na hayop na an bayag naronot o naputol, nalugad o nahale. Dai iyan itinutugot sa saindong daga.
25“Dai kamo magdolot nin hayop na hale sa sarong dayuhan bilang dolot na pagkakan. An mga siring na hayop ibibilang na may kaninan asin dai iyan aakoon.”
26Dangan tinaraman nin Kagurangnan si Moises, 27“Kun mamundag an sarong baka o karnero o kanding, papabayaan ngona nindo iyan sa kaibahan kan saiyang ina sa laog nin pitong aldaw, alagad poon sa ikawalong aldaw, pwede nang akoon iyan bilang dolot na pagkakan sa Kagurangnan. 28Dai nindo pagbunoon sa parehong aldaw an mag-inang hayop, baka man o karnero o kanding. 29Kun magdolot kamo nin sakripisyo nin pasasalamat sa Kagurangnan, sunodon nindo an mga pagboot tanganing akoon iyan. 30Kaipuhan kakanon nindo iyan sa aldaw man sanang iyan asin dai kamo magtada para sa masunod na aldaw.
31“Kuyogon nindo an sakong mga pagboot; ako an Kagurangnan. 32Dai nindo pagdarahan nin kasosopgan an sakong banal na ngaran; kaipuhan mamidbidan kan bilog na Israel na ako banal. Ako an Kagurangnan, asin ako an nagpapabanal saindo. 33Ako an kuminua saindo hale sa Egipto tanganing magin saindong Dios. Ako an Kagurangnan.”
Currently Selected:
Levitico 22: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
