Levitico 20
20
Mga Padusa sa Dai Pagsunod
1Tinaraman nin Kagurangnan si Moises 2na sabihan an mga Israelita, “An siisay man saindo o sa mga dayuhan na nakikihimanwa sa saindo, na magtao kan arin man sa mga aki niya tanganing gamiton sa pagsamba ki Molec, gagapoon kan bilog na komunidad sagkod na magadan. 3Magigin kaiwal ko siya asin dai na ibibilang na kaayon sa sakuyang banwaan, huli ta dinidigtaan niya an sakong Tabernakulo asin sinosopog niya an sakong ngaran sa pagtao kan saro niyang aki ki Molec. 4Kun pabayaan kan komunidad an saiyang ginibo asin dai siya gadanon, 5ako mismo an mapadusa saiya asin sa saiyang pamilya patin sa gabos na nakisumaro saiya sa pagtalikod sako tanganing sambahon si Molec. Dai ko sinda ibibilang na kaayon sa sakuyang banwaan.
6“An siisay man na magduman sa mga espiritista asin maghagad sainda nin hatol, magigin kaiwal ko asin dai ko na ibibilang na kaayon sa sakuyang banwaan. 7Kaya magpakabanal kamo huli ta ako an Kagurangnan na saindong Dios. 8Kuyogon nindo an sakong mga togon, huli ta ako an Kagurangnan, asin ako an nagpapabanal saindo.”
9Itinao nin Kagurangnan an minasunod na pagsusundon. An siisay man na magsumpa kan saiyang ama o ina gagadanon; responsable siya kan saiyang kagadanan.
10An siisay man na lalaking magdorog sa agom kan saiyang kapwa, gagadanon kaiba kan babae. 11An siisay man na lalaking magdorog sa saro kan mga agom kan saiyang ama, nagdadara nin kasosopgan sa saiyang ama asin dapat gadanon kaiba kan babae. Sinda an responsable kan sadiri nindang kagadanan. 12An siisay man na magdorog sa saiyang manugang na babae, gagadanon kaiba kan babae; nakaginibo sinda nin orog karaot na bagay asin responsable sinda kan saindang kagadanan. 13Kun an sarong lalaki magdorog sa kapwa niya lalaki, na garo ini sarong babae, nakaginibo sinda nin karigsokan; gagadanon sindang duwa; sinda an responsable kan saindang kagadanan. 14Kun agomon nin sarong lalaki an sarong babae asin an ina kaini, susuloon sindang tolo sagkod na magadan huli ta guminibo sinda nin sarong bagay na makasosopog; dai kamo magtugot na mangyari an siring sa saindo. 15-16Kun magdorog an siisay man na lalaki o babae sa sarong hayop, gagadanon siya kaiba kan hayop. Siya an responsable kan saiyang kagadanan.
17Kun agomon nin sarong lalaki an saiyang tugang na babae o maski an tugang niya sa ama o ina, guminibo sinda nin makasosopog na bagay asin maninigo na sopogon sa mata kan publiko dangan pahaleon sa komunidad. Dinorogan niya an saiyang tugang na babae asin dapat na padusahan. 18Kun an sarong lalaki nakidorog sa sarong babaeng nareregla, papahaleon sinda sa komunidad huli ta linapas ninda an mga pagsusundon manongod sa pagigin maati.
19Kun dinorogan kan sarong lalaki an saiyang tiyaon sa ama o sa ina, nagkasala sindang duwa asin maninigong magdusa huli ta naggibo sinda nin orog karaot na bagay. 20Kun dinorogan kan sarong lalaki an agom kan saiyang tiyo, sinopog niya an saiyang tiyo; siya asin an babae mabayad kan saindang kasalan; dai sinda magkakaigwa nin aki sagkod na sinda magadan. 21Kun agomon kan sarong lalaki an agom kan saiyang tugang, dai sinda magkakaigwa nin aki sagkod na sinda magadan. Guminibo an lalaki nin sarong bagay na maati asin sinopog niya an saiyang tugang.
22Nagtaram an Kagurangnan, “Otobon nindo an gabos kong mga togon asin mga pagboot, tanganing dai kamo isuka kan daga nin Canaan na pagdadarahan ko saindo. 23Dai nindo pag-arogon an mga kaugalean kan mga nag-eerok duman; isinusuka ko sinda, tanganing makalaog kamo sa saindang daga. Naggibo sinda nin mga karigsokan, kaya nauyam ako sainda. 24Ipinangako ko saindo an mayaman saka matubang na dagang ini na magin sadiri nindo, asin itatao ko iyan saindo. Ako an Kagurangnan na saindong Dios, asin linaen ko kamo sa ibang mga nasyon. 25Kaya tandaan nindo an kalaenan kan mga hayop asin mga gamgam na malinig saka maati. Dai kamo magkakan kan mga hayop o gamgam na maati. Ipinahayag ko na maati an mga iyan, asin makakapaati sa saindo an pagkakan kaiyan. 26Magin banal kamo huli ta ako an Kagurangnan banal, asin linaen ko kamo sa ibang mga nasyon tanganing magin sadiri ko.
27“An siisay man na lalaki o babaeng magkonsulta sa espiritu kan mga gadan, gagapoon sagkod na magadan; siya an responsable kan saiyang kagadanan.”
Currently Selected:
Levitico 20: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
