Josue 20
20
Mga Syudad Na Pailihan
1Dangan tinaraman nin Kagurangnan si Josue 2na sabihan an mga Israelita, “Magpili kamo nin mga syudad na pailihan, na itinaram ko saindo huli ki Moises. 3An sarong tawo na dai tuyong makagadan nin kapwa, pwedeng magdulag pasiring duman tanganing makaligtas sa tawong boot magbalos saiya. 4Pwede siyang magdulag pasiring sa arin man kan mga syudad na idto, magduman sa lugar na paghuhukoman na yaon sa may trangkahan kan syudad asin magpaliwanag sa mga lider dapit kan nangyari. Dangan papalaogon siya ninda sa syudad, tatawan nin lugar tanganing duman siya mag-erok sa kaibahan ninda. 5Kun lamagon siya duman kan boot magbalos, dai ninda siya dapat itao saiya huli ta nakagadan siya na dai tinutuyo asin bakong huli sa kaanggotan. 6Duman ngona siya sa syudad sagkod na hukoman siya sa atubang kan banwaan, asin sagkod na buhay pa an Halangkaw na Padi kan panahon na iyan. Dangan pwede na siyang magbalik sa banwaan na saiyang pinaghalean.”
7Kaya, sa solnopan kan Salog nin Jordan linaen ninda an Kedes sa Galilea, sa mabulod na daga kan Neftali; an Shekem, sa mabulod na daga kan Efraim; asin an Hebron, sa mabulod na daga kan Juda. 8Sa sirangan kan Salog nin Jordan, sa kapatagan nin bukid sa desyerto, na nasa sirangan kan Jerico, pinili ninda an Bezer sa teritoryo ni Ruben; an Ramot sa Gilead, sa teritoryo nin Gad; asin an Golan sa Basan, sa teritoryo ni Manases. 9Iyo ini an mga syudad na pailihan na pinili para sa mga Israelita asin para sa kiisay man na dayuhan na nakikihimanwa sainda. An siisay man na dai tuyong makagadan nin kapwa, pwedeng dumulag pasiring duman tanganing dai siya magadan kan boot magbalos, sagkod na hukoman siya sa atubang kan banwaan.
Currently Selected:
Josue 20: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
