Josue 21
21
An Mga Syudad Kan Mga Levita
1An mga lider kan mga pamilya kan tribu ni Levi nagduruman ki Eleazar na padi, ki Josue na aki ni Nun, asin sa mga lider kan mga pamilya kan gabos na tribu nin Israel. 2Nagsabi sinda sainda duman sa Shilo, sa daga nin Canaan, “Nagboot an Kagurangnan huli ki Moises na tawan kami nin mga syudad na eerokan, siring man nin mga dagang pasabsaban para sa samong mga hayop.” 3Kaya sosog sa pagboot nin Kagurangnan, an mga Levita tinawan kan mga Israelita nin mga syudad saka mga dagang pasabsaban hale sa saindang mga kahirasan.
4An enot na tinawan nin mga syudad iyo an mga pamilya kan kamaganakan ni Kohat. An mga pamilya na gikan ki Aaron na padi tinawan nin treseng syudad hale sa daga ni Juda, Simeon, asin Benjamin. 5An ibang kamaganakan ni Kohat, tinawan nin sampolong syudad hale sa daga ni Efraim, Dan, asin Manases sa solnopan.
6An kamaganakan ni Gerson tinawan nin treseng syudad hale sa daga ni Issakar, Asher, Neftali, asin ni Manases sa sirangan.
7An mga pamilya kan kamaganakan ni Merari tinawan nin doseng syudad hale sa daga ni Ruben, Gad, asin Zabulon.
8Sa paagi nin pagripa, tinao kan mga Israelita sa mga Levita an mga syudad na idto kaiba an mga dagang pasabsaban, siring sa pagboot nin Kagurangnan ki Moises.
9Iyo ini an mga ngaran kan mga syudad sa mga daga ni Juda asin ni Simeon, na itinao 10sa mga kapagarakian ni Aaron na gikan sa kamaganakan ni Kohat na aki ni Levi. Sinda an enot na tinawan. 11Napasainda an syudad nin Arba (si Arba iyo an ama ni Anak), na ngunyan inapod Hebron, sa mabulod na daga nin Juda, kaiba an dagang pasabsaban. 12Alagad an mga oma asin an mga banwa kan syudad itinao na ki Caleb na aki ni Jefunne.
13Laen pa kan Hebron (saro kan mga syudad na pailihan), itinao man sa mga kapagarakian kan pading si Aaron an mga syudad na ini: an Libna, 14Jattir, Estemoa, 15Holon, Debir, 16Ain, Jutta, asin Bet-semes, kaiba an mga dagang pasabsaban: siyam na syudad gabos hale sa mga tribu ni Juda saka ni Simeon. 17Tinarawan sinda nin apat na syudad hale sa daga ni Benjamin: an Gibeon, Geba, 18Anatot, asin Almon, kaiba an mga dagang pasabsaban. 19Treseng syudad gabos, kaiba an mga dagang pasabsaban an itinao sa mga padi, na mga kapagarakian ni Aaron.
20An ibang mga pamilya kan Levitang kamaganakan ni Kohat tinawan nin nagkapirang syudad hale sa daga ni Efraim. 21Apat na syudad an itinao sainda: an Shekem asin an dagang pasabsaban duman sa mabulod na daga kan Efraim (saro kan mga syudad na pailihan), an Gezer, 22an Kibzaim, asin an Bet-horon, kaiba an mga dagang pasabsaban. 23Tinawan sinda nin apat na syudad hale sa daga ni Dan: an Elteke, Gibbeton, 24Aijalon, asin Gat-rimmon, kaiba an mga dagang pasabsaban. 25Tinawan sinda nin duwang syudad hale sa daga ni Manases sa solnopan kan Jordan: an Taanac asin an Gat-rimmon, kaiba an mga dagang pasabsaban. 26An mga pamilyang ini sa kamaganakan ni Kohat nag-arako nin sampolong syudad gabos, kaiba an mga dagang pasabsaban.
27An saro pang grupo nin mga Levita, an kamaganakan ni Gerson, nag-ako nin duwang syudad hale sa daga ni Manases sa sirangan: an Golan na nasa Basan (saro kan mga syudad na pailihan) asin an Beestera, kaiba an mga dagang pasabsaban. 28Hale sa daga ni Issakar, apat na syudad an inako ninda: an Kision, Daberat, 29Jarmut, asin an En-gannim, kaiba an mga dagang pasabsaban. 30Hale sa daga ni Asher, apat na syudad an inako ninda: an Misal, Abdon, 31Helkat, asin an Rehob, kaiba an mga dagang pasabsaban. 32Hale sa daga ni Neftali tolong syudad an inako ninda: an Kedes sa Galilea, kaiba an mga dagang pasabsaban (saro kan mga syudad na pailihan), an Hammot-dor, asin an Kartan, kaiba an mga dagang pasabsaban. 33Treseng syudad gabos kaiba an mga dagang pasabsaban an inako kan manlaen-laen na pamilya sa kamaganakan ni Gerson.
34An iba pang Levita, an kamaganakan ni Merari, tinawan nin apat na syudad hale sa daga ni Zabulon: an Jokneam, Karatan, 35Dimna, asin an Nahalal, kaiba an mga dagang pasabsaban. 36Hale sa daga ni Ruben, apat na syudad an inako ninda: an Bezer, Jahaz, 37Kedemot, asin Mefaat, kaiba an mga dagang pasabsaban. 38Hale sa tribu ni Gad, apat na syudad an inako ninda: an Ramot sa Gilead, kaiba an mga dagang pasabsaban (saro kan mga syudad na pailihan), an Mahanaim, 39an Hesbon, asin an Jazer, kaiba an mga dagang pasabsaban. 40Kaya, doseng syudad gabos an itinao sa kamaganakan ni Merari.
41-42Hale sa gabos na daga kan bilog na Israel, kwarenta y otsong syudad gabos, kaiba an mga dagang pasabsaban, an itinao sa mga Levita.
Sinadiri Kan Israel An Daga
43Itinao nin Kagurangnan sa Israel an gabos na dagang ipinanuga niya na itatao sa saindang mga ginikanan. Kaya kan masakop ninda ini, duman na sinda nag-erok. 44Tinawan sinda nin Kagurangnan nin katoninongan sa bilog na daga, siring sa ipinanuga niya sa saindang mga ginikanan. Dai sinda nadaog kan arin man sa saindang mga kaiwal, huli ta pinapanggana sinda nin Kagurangnan. 45Inotob nin Kagurangnan an lambang saro kan saiyang mga panuga sa banwaan nin Israel.
Currently Selected:
Josue 21: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
