Josue 16
16
An Dagang Itinao ki Efraim asin ki Manases sa Solnopan
1An pagdolonan sa habagat kan dagang itinao sa kapagarakian ni Jose minapoon sa Jordan harani sa Jerico, sa sirangan kan mga burabod nin Jerico, asin minaabot sa kalangtadan. Hale sa Jerico, minatukad an pagdolonan sa mabulod na daga sagkod sa Betel. 2Hale sa Betel minapadagos sa Luz dangan sa Atarot Addar, saen nag-erok an mga Arkita. 3Dangan minapasolnopan sa daga kan mga Jafaletita, sagkod sa daga kan Ibabang Bet-horon. Hale duman, minapadagos sa Gezer sagkod sa Dagat nin Mediteraneo.
4An dagang idto inako bilang pamana kan kapagarakian ni Jose, an mga tribu ni Efraim asin ni Manases sa solnopan.
Efraim
5Ini an daga kan mga pamilya ni Efraim: an pagdolonan kan saindang daga minapoon sa Atarot Addar pasiring sa Itaas na Bet-horon, 6asin sagkod sa Dagat nin Mediteraneo. Nasa amihan ninda an Micmetat. Sa parteng sirangan, an pagdolonan minaliko pasiring sa Taanat-silo, asin minadagos sa Janoa. 7Hale sa Janoa, minapaibaba sa Atarot asin Naara, minaduta sa Jerico asin minatapos sa Jordan. 8Hale sa Tappua, an pagdolonan minapasiring sa solnopan sagkod sa sapa nin Kana asin minatapos sa Dagat nin Mediteraneo. Iyo ini an daga na itinao bilang pamana sa mga pamilya kan tribu ni Efraim, 9kaiba an nagkapirang banwa saka mga baryo na yaon sa laog kan mga pagdolonan ni Manases, alagad itinao sa mga Efraimita. 10Alagad dai ninda pinahale an mga Cananeo na nag-erok sa Gezer kaya sagkod ngunyan an mga Cananeo nag-eerok kaiba kan mga Efraimita, alagad pinirit sindang maglingkod bilang mga oripon.
Currently Selected:
Josue 16: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
