Josue 17
17
Manases sa Solnopan
1Sarong parte kan daga sa solnopan kan Jordan an itinao sa nagkapirang pamilya na gikan ki Manases, an matuang aki ni Jose. An Gilead asin an Basan sa sirangan kan Jordan itinao ki Makir na aking matua ni Manases asin ama ni Gilead, huli ta si Makir sarong lalaking paralaban. 2An daga sa solnopan kan Jordan itinao sa natadang mga pamilya kan tribu ni Manases na iyo si Abiezer, Helek, Asriel, Shekem, Hefer, asin Semida. Sinda an mga aking lalaki ni Manases na aki ni Jose; mga pamayo sinda nin mga pamilya. 3Alagad mayo nin aking lalaki si Zelofehad na aki ni Hefer, asin makoapo ni Gilead na aki ni Makir saka makoapo ni Manases. Babae gabos an aki niya asin an ngaran ninda iyo si Mala, Noe, Hogla, Milca, asin Tirza. 4Nagduman sinda sa pading si Eleazar, ki Josue na aki ni Nun asin sa mga lider nin Israel dangan nagsabi, “Pinagbotan nin Kagurangnan si Moises na hirasan kami kan daga bilang pamana siring kan samong mga lalaking kadugo.” Kaya siring sa ipinagboot nin Kagurangnan, tinawan sinda nin daga arog kan saindang mga lalaking kadugo. 5Ini an dahelan kun tano ta si Manases nagkaigwa nin sampolong parte, laen pa kan Gilead asin Basan sa sirangan kan Jordan, 6huli ta an kapagarakian niyang mga babae hinirasan man nin daga arog kan kapagarakian niyang mga lalaki. An daga nin Gilead napaduman sa ibang kapagarakian ni Manases.
7An daga ni Manases minapoon sa Asher sagkod sa Micmetat, sa sirangan nin Shekem. Dangan minapahabagat, kaya nasasakopan an mga nag-eerok sa En-tappua. 8An daga sa palibot kan Tappua sadiri ni Manases, alagad an banwa kan Tappua na nasa pagdolonan, sadiri kan kapagarakian ni Efraim. 9Dangan an pagdolonan minapaibaba sa sapa nin Kana. Sadiri ni Efraim an mga syudad na nasa habagat kan sapa, maski nasa daga ni Manases an mga idto. An pagdolonan ni Manases minadagos sa amihan na parte kan sapa, asin minatapos sa Dagat nin Mediteraneo. 10Nasa habagat an daga ni Efraim asin nasa amihan an daga ni Manases. An Dagat nin Mediteraneo iyo an saindang pagdolonan sa solnopan. Nasa amihan-solnopan an daga ni Asher asin nasa amihan-sirangan an daga ni Issakar. 11Sa laog kan daga ni Issakar asin ni Asher, nasadirihan ni Manases an mga syudad kan Bet-sean asin Ibleam, kaiba an mga banwa sa palibot kan mga iyan, siring man an Dor (an nasa baybayon), Endor, Taanac, Megido, asin an mga banwa sa palibot kan mga iyan. 12Alagad dai napahale kan kapagarakian ni Manases an mga Cananeo, kaya padagos sindang nag-erok duman. 13Maski kan makosog na an mga Israelita, dai ninda pinahale an gabos na Cananeo, alagad inoripon ninda an mga ini.
Naghagad pa nin Daga si Efraim asin si Manases sa Solnopan
14Nagsabi ki Josue an mga kapagarakian ni Jose, “Tano ta sarong parte sana kan daga an itinao mo samo bilang pamana? Kadakul mi nang marahay huli ta benendisyonan kami nin Kagurangnan.”
15Nagsimbag si Josue, “Kun dakul na kamong marahay asin sadit na para saindo an mabulod na daga ni Efraim, magduman kamo sa kadlagan asin hawanan nindo para saindo an daga kan mga Perezeo saka kan mga Refaim.”
16Nagsimbag sinda, “Dai magkakanigo para samo an mabulod na daga, alagad igwa nin mga karwaheng lansang an mga Cananeo na nag-eerok sa kapatagan; igwa man an mga nag-eerok sa Bet-sean asin sa mga banwa sa palibot kaiyan, siring man an mga nag-eerok sa Kapantayan nin Jezreel.”
17Sinabihan ni Josue an mga tribu ni Efraim asin ni Manases sa solnopan, “Dakul na mananggad kamo asin mapangyari. Magkakaigwa kamo nin sobra sa sarong kahirasan. 18Mapapasaindo an mabulod na daga. Maski iyan sarong kadlagan, hahawanan nindo asin sasadirihon iyan magpoon sa sarong poro sagkod sa ibong na poro. Papahaleon nindo an mga Cananeo maski igwa sinda nin mga karwaheng lansang asin maski makokosog sinda.”
Currently Selected:
Josue 17: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
