Josue 15
15
An Dagang Itinao ki Juda
1An mga pamilya kan tribu ni Juda nag-ako kan kahirasan na daga na ilinaladawan siring kaini:
An daga minapasiring sa habagat sa pinakaporo kan kalangtadan nin Zin, sa pagdolonan kan Edom. 2An pagdolonan na ini sa habagat minapoon sa poro kan Gadan na Dagat, 3minapadagos sa Dalan nin Akrabim sagkod sa Zin. Minapasiring sa habagat kan Kades-barnea, dangan sa Hezron saka sa Addar; minaliko pasiring sa Karka, 4padagos sa Asmon, asin minasunod sa sapa na nasa pagdolonan nin Egipto dangan minatapos sa Dagat nin Mediteraneo. Iyo ini an pagdolonan sa habagat kan daga ni Juda.
5An pagdolonan kan daga sa sirangan iyo an Gadan na Dagat sagkod sa sadit na sapa na binubulosan kan Salog nin Jordan.
An pagdolonan kan daga sa amihan minapoon sa sadit na sapa, 6padagos sa Bet-hogla, asin minaagi sa amihan kan Bet-Araba. Dangan minatukad sa Gapo ni Bohan (si Bohan sarong aki ni Ruben); 7hale sa Kapantayan nin Acor minapasiring sa Debir, dangan minaliko paamihan pasiring sa Gilgal, na kahampang kan Dalan nin Adummim sa habagat na parte kan kapantayan. An pagdolonan minaabot sa mga burabod nin En-semes, asin minatapos sa En-rogel; 8dangan minatukad sa may Kapantayan nin Hinnom, na nasa habagat kan bulod na pinatindogan kan Jerusalem, an Jebuseong syudad. Dangan minadagos an pagdolonan sa alitoktok kan bulod na nasa solnopan kan Kapantayan nin Hinnom, sa amihan na poro kan Kapantayan nin Refaim. 9Hale duman, minadagos iyan sa mga burabod nin Neftoa asin sa mga syudad na harani sa Bukid nin Efron. Dangan minaliko iyan pasiring sa Baala (o Kiriat-jearim), 10saen minalibot pasolnopan kan Baala pasiring sa mabulod na daga nin Edom, minaagi sa amihan na parte kan Bukid nin Jearim (o Kesalon), dangan minababa pasiring sa Bet-semes, asin minalampas sa Timna. 11Dangan an pagdolonan minapasiring sa bulod sa amihan kan Ekron, minaliko pasiring sa Sikkeron, minaagi sa Bukid nin Baala, padagos sa Jamnia, sagkod sa Dagat nin Mediteraneo, 12na iyo an pagdolonan sa solnopan.
Sa laog kan mga pagdolonan na ini nag-erok an mga pamilya kan tribu ni Juda.
Sinakop ni Caleb an Hebron asin an Debir
(Huk. 1:11-15)
13Siring sa ipinagboot nin Kagurangnan ki Josue, sarong parte kan daga ni Juda an itinao ki Caleb na aki ni Jefunne, na gikan sa tribu ni Juda. Napasaiya an Hebron, an syudad na sadiri ni Arba na ama ni Anak. 14Pinahale ni Caleb sa syudad an tolong aking lalaki ni Anak: si Sesai, Ahiman, asin Talmai. 15Hale duman, sinalakay niya an mga tawo na nag-erok sa Debir. (Kaidto an syudad na ini inapod Kiriat-sefer.) 16Nagsabi si Caleb, “Ipapakasal ko an aki kong si Acsa sa lalaking makakasakop kan Kiriat-sefer.” 17Si Otniel, na aki ni Kenaz na tugang ni Caleb, iyo an nakasakop kan syudad kaya ipinakasal ni Caleb si Acsa ki Otniel. 18Sa aldaw kan kasal, sinabihan ni Otniel si Acsa#15:18 Probableng teksto (hilingon sa Mga Hukom 1:14) sinabihan ni Otniel si Acsa; sa Hebreyo sinabihan ni Acsa si Otniel. na maghagad sa saiyang ama nin sarong oma. Nagbaba si Acsa sa asnong nalulunadan niya kaya hinapot siya ni Caleb kun ano an kaipuhan. 19Nagsimbag si Acsa, “Boot kong magkaigwa nin mga burabod nin tubig. An dagang itinao mo sako yaon sa habagat na parte kan Canaan.” Kaya itinao saiya ni Caleb an mga burabod sa itaas asin sa ibaba.
An mga Syudad ni Juda
20Ini an kahirasan na daga kan mga pamilya kan tribu ni Juda. 21An mga syudad na nasa porong habagat na sadiri ninda, idtong nasa harani kan pagdolonan nin Edom iyo an Kabzeel, Eder, Jagur, 22Kina, Dimona, Adada, 23Kedes, Hazor, Itnan, 24Zif, Telem, Bealot, 25Hazor-hadatta, Keriot-hezron (o Hazor), 26Amam, Sema, Molada, 27Hazar-gadda, Hesmon, Bet-pelet, 28Hazar-sual, Beer-sheba, Biziotia, 29Baala, Iim, Ezem, 30Eltolad, Kesil, Horma, 31Ziklag, Madmanna, Sansanna, 32Lebaot, Silhim, Ain, saka Rimmon; beynte y nuebeng syudad gabos, kaiba an mga banwa sa palibot kan mga iyan.
33An mga syudad sa kababan iyo an Estaol, Zora, Asna, 34Zanoa, Engannim, Tappua, Enam, 35Jarmut, Adullam, Soco, Azeka, 36Saaraim, Aditaim, Gedera, asin Gederotaim: katorseng syudad gabos, kaiba an mga banwa sa palibot kan mga iyan.
37Kairiba pa kan mga ini iyo an Zenan, Hadasa, Migdalgad, 38Dilean, Mizpa, Jokteel, 39Lakis, Bozkat, Eglon, 40Cabbon, Lamam, Kitlis, 41Gederot, Bet-dagon, Naama, asin Makkeda: dyes y seis na syudad gabos, kaiba an mga banwa sa palibot kan mga iyan.
42Kairiba pa kan mga ini iyo an Libna, Eter, Asan, 43Ifta, Asna, Nezib, 44Keila, Aczib, asin Maresa: siyam na syudad gabos, kaiba an mga banwa sa palibot kan mga iyan.
45Kaiba man an Ekron, dangan an mga banwa saka an mga baryo kaiyan, 46asin an gabos na syudad saka mga banwa na harani sa Asdod, magpoon sa Ekron sagkod sa Dagat nin Mediteraneo.
47Kairiba man an Asdod saka Gaza, dangan an mga banwa asin an mga baryo na abot sa sapa na nasa pagdolonan kan Egipto sagkod sa baybayon kan dagat nin Mediteraneo.
48Sa mga syudad sa mabulod na daga, kairiba an Samir, Jattir, Soco, 49Danna, Kiriat-sefer (o Debir), 50Anab, Estemoa, Anim, 51Gosen, Holon, asin Gilo: onseng syudad gabos, kaiba an mga banwa sa palibot kan mga iyan.
52Kairiba pa kan mga ini iyo an Arab, Duma, Esan, 53Janim, Bet-tappua, Afeka, 54Humta, Hebron, asin Zior: siyam na syudad gabos, kaiba an mga banwa sa palibot kan mga iyan.
55Kairiba man an Maon, Carmelo, Zif, Jutta, 56Jezreel, Jokdeam, Zanoa, 57Kain, Gibea, asin Timna: sampolong syudad gabos, kaiba an mga banwa sa palibot kan mga iyan.
58Kairiba pa an Halhul, Bet-zur, Gedor, 59Maarat, Bet-anot, asin Eltekon: anom na syudad gabos, kaiba an mga banwa sa palibot kan mga iyan.
60Kairiba man an Kiriat-baal (o Kiriat-jearim) asin an Rabba: duwang syudad, kaiba an mga banwa sa palibot kan mga iyan.
61Sa kalangtadan, nakaiba an Bet-araba, Middin, Secaca, 62Nibsan, an Syudad nin Asin, saka an Engedi: anom na syudad gabos, kaiba an mga banwa sa palibot kan mga iyan.
63Alagad dai napahale kan banwaan nin Juda an mga Jebuseo na nag-eerok sa Jerusalem. Sagkod ngunyan duman sinda nag-erok kaiba an mga tawo na gikan sa tribu ni Juda.
Currently Selected:
Josue 15: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
