Job 39
39
1Aram mo daw kun nuarin namumundag an lalaw na mga kanding?
Namasdan mo na daw an pag-ogbon kan usa?
2Aram mo daw kun pirang bulan an saindang pagbados,
asin an panahon nin saindang pag-ogbon?
3Aram mo daw kun nuarin sinda malukmo
asin mamumundagan kan saindang ogbon?
4Nagigin makosog an saindang mga ogbon, nagdadarakula sinda sa kaawagan;
minaralakaw sinda, asin dai na minabaralik sa saindang magurang.
5“Siisay an nagtao sa lalaw na asno kan saiyang katalingkasan?
Siisay an naghubad kan mga gapos kan asnong marikas,
6na tinawan ko kan kalangtadan nganing magin saiyang harong,
asin kan maasin na daga nganing magin saiyang erokan?
7Minaharayo siya sa maribok na mga syudad;
dai niya nadadangog an kinurahaw kan mga paraalaw.
8Linilibot niya an kabukidan bilang saiyang pasabsaban,
asin hinahanap niya an lambang berdeng bagay nganing saiyang makakan.
9“An lalaw na baka boot daw na maglingkod saimo?
Papalihison daw niya an sarong banggi sa saimong kwadra?
10Magagakodan mo daw siya tanganing mag-arado,
o susurodon daw niya an saimong mga oma?
11Magsasarig ka daw saiya huli ta makosog siya,
asin ipapaniwala mo daw saiya an saimong magabat na trabaho?
12Minatubod ka daw saiya na mabalik siya,
asin na dadarahon niya hale sa saimong ginikan an saimong trigo?
13“Marikas an pagkampay kan mga pakpak kan ostrits;
alagad dai iyan nakakalayog arog kan talaod.#39:13 Sa Hebreyo, an bersikulo 13 bakong malinaw.
14Huli ta binabayaan niya sa daga an saiyang mga sugok
asin pinapainitan iyan sa ibabaw kan daga.
15Dai niya iniisip na pwede ining maronot nin sarong bitis,
asin matimakan kan mga lalaw na hayop.
16Pinagmamakurihan niya an saiyang mga ogbon na garong bako saiya an mga ini;
maski masayang an saiyang kapagalan, alagad dai siya natatakot;
17huli ta ginibo ko na malingawan niya an kadonongan,
asin dai ko siya tinawan nin pakasabot.
18Alagad kun minapoon siyang magdalagan,
nginingisihan niya an kabayo asin an nakalunad diyan.
19“Job, ika daw an nagtao nin kosog sa kabayo?
Ika daw an nagtao nin haralabang buhok sa saiyang liog?
20Ika daw an nagpapalukso saiya siring sa doron?
Nakakatakot an pinugrot kan saiyang ngoso.
21Sa bilog niyang kosog minadalagan siya pasiring sa ralaban.
22Nginingisihan niya an takot
asin dai nanluluya an saiyang boot; mayo nin espada na nakakapasibog saiya.
23Sa ibabaw niya nagkakarantog an lalagan nin mga bosog,
an nagsisilyab na garod asin an bodyak.
24Marikas siyang nagdadalagan na haros halonon an daga;
dai siya napapatoninong sa tanog kan trompeta.
25Minapugrot siya sa pagtanog kan trompeta.
Harayo pa napaparong na niya an gera,
saka nadadangog an ribok asin an mga pagboot kan mga opisyal.
26“Huli daw sa saimong kadonongan kaya nakakalayog an lawin,
asin nakakaunat kan saiyang pakpak pasiring sa habagat?
27Sa pagboot mo daw kaya minaitaas an agila
asin minagibo nin salagan sa halangkaw na kabukidan?
28Minaerok siya sa gapo asin minagibo kan saiyang harong
sa mapapanas na alitoktok nin mga bukid.
29Hale duman minamasdan niya an saiyang magigin biktima;
harayo pa nahihiling na iyan kan saiyang mga mata.
30Nagsosopsop kan dugo an mga siwo niya
asin kun haen an mga gadan, yaon siya.”
Currently Selected:
Job 39: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
