Job 38
38
Sinimbag nin Kagurangnan si Job
1Dangan hale sa sarong makosog na doros sinimbag nin Kagurangnan si Job:
2“Siisay ka, ika na mayong naaaraman,
na maghapot dapit sa sakong kadonongan?
3Tumindog ka siring sa sarong lalaki
asin simbagon mo an mga hapot ko.
4Haen ka kan ibugtak ko an pundasyon kan kinaban?
Kun talagang may naaaraman ka, tarami ako.
5Siisay an nagtalaan kan kadakulaan kan kinaban?
Siisay an nag-unat kan pansukol sa ibabaw kaiyan?
Aram mo an mga simbag kaiyan?
6Ano-ano an nagpupugol kan mga harigi kan daga?
Siisay an nagbugtak kan patugmadan kan kinaban?
7Kan kaagahon kan aldaw na idto, sarabay na nag-awit an mga bitoon,
asin nagkurahaw sa kaogmahan an langitnon na mga linalang.#38:7 LANGITNON NA MGA LINALANG: Hilingon sa 1:6.
8“Siisay an nagsera kan mga trangkahan tanganing pugolon an dagat
kan puminutok iyan sa tulak kan daga?
9Ako an nagtahob kan dagat nin mga panganoron
asin nagpatos kaiyan sa kadikloman.
10Ako an nagtalaan kan kasagkoran kaiyan
asin nagbugtak kan mga barat saka mga pintoan.
11Sinabihan ko an dagat, ‘Sagkod ka sana digdi, asin dai maglampas!
Digdi maontok an saimong darakulang mga alon.’
12Sa bilog mong buhay, Job,
nagboot ka na daw na magbanaag an sarong aldaw?
13Pinagbotan mo na daw an banaag na pugolon an daga
asin patalsikon an mga tampalasan sa pinagtatagoan ninda?
14Huli sa saldang kan aldaw nahahayag an mga bulod saka mga kapantayan
arog kan mga tiklop sa gubing,
malinaw siring kan marka nin sarong selyo na idinoon sa laboy.
15An saldang kan aldaw maliwanag nin marahay para sa mga tampalasan
asin nakakapugol sainda sa paggibo nin kadahasan.
16“Nakaduman ka na daw sa mga burabod kan dagat,
o nakalakaw sa pusod kan kairaroman?
17Nahiling mo na daw an mga trangkahan nin kagadanan,
o an mga trangkahan kan mahibog na kadikloman?
18Nasabotan mo na daw an kahiwasan kan kinaban?
Simbagon mo ako kun aram mo an gabos na ini.
19“Aram mo daw kun saen naghahale an liwanag
asin kun ano an ginigikanan kan kadikloman?
20Ikakatukdo mo daw sainda kun sagkod saen sinda maduman,
o ikakabalik mo daw sinda sa saindang pinaghalean?
21Aram mo iyan, huli ta gurang ka nang marahay
asin yaon ka duman kan lalangon an kinaban!
22“Nakalaog ka na daw sa mga sarayan kan nyebe,
o nahiling an mga sarayan kan uran nin yelo,
23na sakong itinagama sa panahon nin kasakitan,
para sa aldaw nin gera asin ralaban?
24Nakaduman ka na daw sa sinisirangan kan aldaw,
o sa pinaghahalean kan doros sa sirangan?
25“Siisay an nagkalot nin agihan para sa makosog na uran
asin nin dalan para sa kikilat,
26tanganing darahon an uran sa daga na mayo nin nag-eerok,
sa kalangtadan na mayo nin tawo;
27tanganing baribihon an mamara asin napapahang daga,
tanganing magtalubo sa daga an mga doot?
28May ama daw an uran
o tagdo kan ambon?
29Siisay an ina kan yelo
asin kan saradit na yelo nin langit,
30na nagpapatagas kan katubigan,
asin kan ibabaw kan dagat?
31“Mabubugkos mo daw an mga kadena kan Pleiades,
o mahahale an gakod nin Orion?
32Mapapangenotan mo daw an mga bitoon sa lambang panahon
o magigiyahan an Oso kaiba kan saiyang mga ogbon?
33Aram mo daw an mga katogonan kan kalangitan?
Magagamit mo daw iyan para sa kinaban?
34“Mapapagbotan mo daw an mga panganoron
tanganing tahoban ka kan baha nin katubigan?
35Masusugo mo daw an mga kikilat tanganing maglakaw sinda
asin magsabi saimo, ‘Andam kaming maglingkod saimo’?
36Siisay an nagbugtak nin kadonongan sa mga panganoron,
o nagtao nin pakasabot sa mga ambon?#38:36 Sa Hebreyo, an bersikulo 36 bakong malinaw.
37Siisay an madonong na makakabilang sa mga panganoron
asin makakabaliktad kaini tanganing umula an uran,
38uran na minagibo kan alpog na magin matagas na daga?
39“Makakakua ka daw nin pagkakan para sa mga leon,
o mababasog mo daw an saindang ogbon kun sinda magkagurutom,
40kun sinda minaukmo sa saindang mga lungib,
o minahipa sa saindang mga tagoan?
41Siisay an nagtataong kakanon sa uwak,
kun nalalagalag sinda sa kakulangan nin pagkakan,
kun minaagrangay sako an saindang mga ogbon?
Currently Selected:
Job 38: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
