Job 37
37
1“Pinapakutabkutab an puso ko kan bagyo.
2Paghinanyog kamo gabos sa tingog nin Dios,
sa daguldol na naghahale sa saiyang ngoso.
3Isinusubol niya iyan sa ibaba kan bilog na kalangitan,
asin an saiyang kikilat sa mga poro kan kinaban.
4Dangan nadadangog an ragubrob kan saiyang tingog,
an magayon na tanog kan daguldol,
mantang daing ontok an pagsilyab kan kikilat.
5Sa pagboot nin Dios, nangyayari an makangangalas na mga bagay,
an mga darakulang bagay na dai nyato masasabotan.
6Huli ta sinasabihan niya an nyebe, ‘Maghugpa ka sa daga’;
asin an tagiti saka an uran, ‘Magin makosog ka.’
7Pinapaontok niya sa pagtrabaho an gabos na tawo,
tanganing mahiling ninda an gabos niyang gibo.
8Dangan minalaog sa saindang lungib an mga hayop
asin duman sinda minaontok.
9Naghahale sa habagat an makokosog na doros,
asin sa amihan an doros na sobra an lipot.
10An katubigan pinapatagas kan hinangos nin Dios,
asin ginigibo niya ining matagas na yelo.
11Minasilyab an kikilat hale sa mga panganoron,#37:11 Sa Hebreyo, an bersikulo 11 bakong malinaw.
12mantang naghihiro sinda sa pagboot nin Dios.
Ginigibo ninda an gabos na pagboot nin Dios
maski saen sa bilog na kinaban.
13An Dios minapadara nin uran tanganing baribihon an saiyang daga;
pwede niyang ipadara iyan sa pagpadusa sa mga tawo
o sa pagpahiling kan saiyang pagkamoot.
14“Hinanyoga ini, Job, pag-ontok asin horophoropa an
makangangalas na mga gibo nin Dios.
15Aram mo daw kun paano itinatao nin Dios an pagboot
asin minasilyab an kikilat sa mga panganoron?
16Aram mo kun paano naglalataw an mga panganoron sa kalangitan,
an bunga kan makangangalas na kakayahan nin Dios?
17Dai mo naaaraman iyan! An aram mo sana iyo an pagtios kan init
kun minahuyop sa daga an doros na gikan sa habagat.
18Matatabangan mo daw an Dios sa pagbiklad kan kalangitan
asin sa pagpatagas kaiyan siring sa pinakintab na metal?
19Tukdoe kami kun ano an samong sasabihon sa Dios;
mayo nin laog an samong isip; mayo kami nin masasabi.
20Dai ko hahagadon na makipag-olay ako sa Dios;
tadaw ta tatawan ko siya nin oportunidad na gadanon ako?
21“Ngunyan an liwanag sa kalangitan nakakasula,
dai ta kayang hilingon;
asin an langit nalinigan na kan doros.
22Nahihiling sa amihan an bulawan na kinang,
asin natatakot kita huli sa kamurawayan nin Dios.
23Dakula nin marahay an kapangyarihan nin Dios, kaya dai kita nakakadolok saiya;
matanos siya asin maimbod sa pagtratar kan katawohan.
24Kaya natatakot saiya an mga tawo; dai niya pinapahalagahan an siisay man na nagsasagin-sagin na madonong.”
Currently Selected:
Job 37: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
