Job 36
36
1Nagsabi pa si Elihu:
2“Maghalat ka pa nin kadikit
na panahon, asin ipapahiling ko saimo,
huli ta manongod sa Dios an sakong sasabihon.
3Dakul an sakong naaaraman; gagamiton ko gabos iyan tanganing ipahiling
ko na matanos an Dios, na sakong Kaglalang.
4Totoo an sakong mga tataramon,
huli ta an nahihiling mo sa saimong atubang sarong tawong madonong.
5“Uya, an Dios mapangyari, asin dai nagbabasang-basang sa kiisay man;
mayong anoman na dai niya nasasabotan.
6Dai niya tinutugotan na mabuhay an parakasala,
alagad tinatawan niya kan saindang deretso an daing sukat.
7Dai niya hinahale an pag-ingat sa mga matanos,
pinapatukaw niya sinda sa trono siring sa mga hade,
asin tinatawan nin kaomawan sagkod pa man.
8Alagad kun sinda nakakadenahan
asin nagagakodan nin mga pisi nin kasakitan,
9ipinapahayag niya sainda an saindang mga kasalan saka kapaabaw-abawan.
10Ginigibo niyang magdangog sinda sa saiyang mga patanid,
na magbakle sa saindang kasalan.
11Kun magkuyog sinda asin maglingkod saiya,
sa kauswagan matatapos an saindang mga aldaw, asin an saindang mga taon sa karahayan.
12Alagad kun dai sinda maghinanyog, mapapara sinda huli sa dahas,
asin magagadan na mayong pakaaram.
13“An mga bakong diosnon nagpapadagos sa pagigin anggot,
asin dai minahagad nin tabang maski pinapadusahan.
14Nagagadan sinda na hoben pa,
asin an saindang buhay natatapos sa kasosopgan.
15Alagad tinutukdoan nin Dios an tawo sa paagi nin pagtios,
asin ginagamit an kawaraan nin paglaom sa pagpahiling
sainda kan katotoohan.
16“Hinale ka nin Dios sa kasakitan,
asin pinapagmate nin katiwasayan;
asin saimong lamesa pinano nin pagkakan.
17Alagad ngunyan pinapadusahan ka sosog sa maninigo saimo.
18Mag-ingat ka na dai ka madaya kan mga suhol,
ni malagalag kan kayamanan.
19An saimong paghagad nin tabang mayo nin itataong karahayan;
an bilong mong kosog dai makakatabang sa saimo ngunyan.
20Dai mo pagmawoton na an banggi dumatong,
an panahon na mapapara an mga nasyon.
21Pag-ingat, dai ka magkiling sa karatan;
itinao saimo an kasakitan tanganing ilikay ka sa kasalan.
22“An Dios ilinangkaw sa saiyang kapangyarihan;
siisay na paratukdo an makakaarog saiya?
23Siisay an nagtalaga para sa saiya kan saiyang dalan,
o siisay an makakasabi, ‘Guminibo ka nin karatan’?
24Giromdomon mong ilangkaw an saiyang gibo,
na inawit kan mga tawo.
25Nahiling iyan kan gabos na tawo;
pwede tang masdan iyan sa harayo.
26Dai ta nanggad siya mamimidbidan,
ni mabibilang an saiyang mga taon.
27“Huli ta siya an minapaitaas kan mga tubig hale sa daga,
asin ginigibo niya ining mga tagdo nin uran.
28Pinapabulos niya an uran hale sa mga panganoron,
asin pinapahugpa sa katawohan.
29May makakasabot daw kan paglakop kan mga panganoron,
kan pagdaguldol hale sa kalangitan na saiyang pinag-eerokan?
30Winawarak niya an saiyang kikilat sa palibot niya,
alagad danay na madiklom an kairaroman kan dagat.
31Huli sa mga paaging ini hinuhukoman niya an mga nasyon;
minatao siya nin labi-labing pagkakan.
32Pinupugol niya an kikilat,
asin pinagbobotan kun arin an boot niyang patamaan.
33An tanog kaiyan iyo an nagpapahayag dapit saiya,
na anggot na nag-iimon laban sa karatan.
Currently Selected:
Job 36: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
