Job 35
35
1Nagsabi si Elihu ki Job:
2“Bakong matanos na ika magsabi
na mayo ka nin sala sa atubang nin Dios,
3o na maghapot sa Dios, ‘Ano an sakong papakinabangon?
Paano ako magin mas marahay ki sa kun ako nagkasala?’
4Sisimbagon taka asin an saimong mga katood.
5“Hilinga an kalangitan! Masdan mo an mga panganoron,
na mas halangkaw ki sa saimo.
6Kun nagkasala ka, naapektohan mo daw an Dios?
Kun nagdakul an saimong kasalan, nadigtaan mo daw siya?
7Natatabangan mo daw an Dios kun ika matanos?
Dai nangangaipo nin ano man an Dios hale saimo.
8An saimong karatan nakakaraot sa mga kapwa mo tawo,
asin an saimong katanosan nakakatabang sa sainda.
9“Huli sa pang-aapi, nag-aagrangay an mga tawo;
naghahagad sinda nin tabang tanganing ikaligtas sa mapang-api.
10Alagad mayo nin naghahapot, ‘Haen an Dios na sakong Kaglalang,
na nagtatao sako nin paglaom sa panahon nin kasakitan,
11na nagtutukdo sato nin orog ki sa mga hayop kan daga,
na nagpapadonong sato ki sa mga gamgam sa kalangitan?’
12Minaagrangay sinda, alagad dai siya minasimbag,
huli ta mapalangkaw sinda asin maraot na mga tawo.
13Totoong gayo na dai dinadangog an mayong halagang inagrangay;
dai sinda hihilingon ni dadangogon kan Makakamhan na Dios.
14“Nagsabi ka, Job, na an Dios dai mo nahihiling;
alagad maghalat ka sana huli ta aram niya an kamugtakan mo.
15Naghohona ka na dai nagpapadusa an Dios,
na dai niya pinapahalagahan an kasalan.
16Mayong mangyayari sa saimong katataram;
maliwanag na mayo kang naaaraman.”
Currently Selected:
Job 35: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
