Job 34
34
1Dangan nagsabi si Elihu:
2“Mga madodonong na lalaki, dangoga nindo an sakong itataram,
asin paghinanyog kamo sako, kamo na nakakaaram;
3huli ta binabalo kan talinga an mga tataramon
siring na ninanamitan kan dila an kakanon.
4Pilion ta an matanos; kita an magsabi kun ano an marahay.
5Huli ta nagtaram si Job, ‘Mayo akong sala,
asin hinale sako nin Dios an sakong katanosan;
6maski igwa ako nin deretso, ibinibilang akong putikon;
an sakong lugad dai nabobolong, maski mayo akong kasalan.’
7“Anong klaseng tawo an siring ki Job?
Dai nanggad siya minagalang sa Dios.
8Nakikiiba siya sa mga paragibo nin karatan
asin minalakaw sa kaibahan kan mga makasalan.
9Nagsasabi siyang, mayo nanggad nin pakinabang an tawo
kun siya magsunod sa kabotan nin Dios.
10“Kaya dangoga nindo ako, kamong mga lalaking may pakasabot!
Magibo daw an Makakamhan na Dios nin karatan?
11Binabalosan niya an tawo sosog sa saiyang gibo,
asin tinatratar sinda sosog sa maninigo.
12Sa katotoohan, an Dios dai magibo nin karatan,
an Makakamhan dai mabiko kan katanosan.
13Siisay an nagtao sa Dios nin kapangyarihan?
Siisay an nagbugtak saiyang pamayo kan kinaban?
14Kun bawion nin Dios an hinangos nin buhay,
15magagadan an gabos na nabubuhay
asin mabalik sa alpog na saiyang pinaghalean.
16“Kun igwa kamo nin pakasabot, dangoga ini; hinanyoga an sakong sasabihon.
17Maghahade daw an sarong naoongis sa hustisya?
Kokondenaron daw nindo an mapangyari asin matanos,
18na minasabi sa sarong hade, ‘Mayo kang halaga,’ asin sa mga pamayo,
‘Maraot kang tawo’;
19na dai nagpapahiling nin pagpapalaen sa mga prinsipe,
ni minapaorog sa mayaman ki sa dukha,
huli ta gabos sinda gibo kan saiyang mga kamot?
20Pwede sanang magadan nin hidali kun banggi an sarong tawo.
Hahampakon nin Dios an mga tawo dangan nawawara sinda;
mayo nin kapagalan na ginagadan niya an mga mapangyari.
21Huli ta nagmamasid siya sa mga gawe kan mga tawo,
asin nahihiling niya an gabos nindang lakad.
22Mayong limpoy o mahibog na kadikloman
na pwedeng tagoan kan paragibo nin karatan.
23Huli ta dai pa an Dios nagtalaan nin panahon
para sa kiisay man tanganing mag-atubang sa saiyang paghukom.
24Maski mayo nin pagsisiyasat, hinahale niya an mga tawong mapangyari,
dangan isinasalihid niya an iba sa lugar ninda.
25Kaya huli ta aram niya an saindang mga gibo
dinadaog niya sinda asin rinoronot pagkabanggi.
26Pinapadusahan niya an mga parakasala sa atubang nin kadaklan,
27huli ta nag-ontok sinda sa pagsunod saiya,
asin dai sinda nagkuyog kan gabos niyang pagboot.
28Sinda an nagin dahelan kan pag-agrangay sa Dios kan mga dukha,
asin nadangog niya an inagrangay kan mga nasasakitan.
29“Kun siya magtoninong, siisay an makondenar?
Kun tagoon niya an saiyang lalawogon,
siisay an makakahiling saiya, nasyon man o tawo?
30Mayo nin anoman na magigibo an mga nasyon
tanganing maolang an mga bakong diosnon sa pagsakop sainda.
31“Huli ta may nakapagsabi na daw sa Dios,
‘Nagtios na ako kan padusa; dai na ako magibo nin karatan;
32tukdoe ako kan dai ko nahihiling;
kun nakagibo ako nin karatan, dai ko na iyan gigibohon giraray’?
33Huli ta minasalungat ka sa ginigibo nin Dios,
maglalaom ka daw na gigibohon niya an boot mo?
An pagdesisyon nasa saimo, bakong sako;
tarami kami ngunyan kun ano an iniisip mo.
34“Masabi sako an mga lalaking may pakasabot,
asin mataram an madonong na makakadangog sako:
35‘Nagtataram si Job na mayo nin pakasabot,
an saiyang mga tataramon mayo nin kahulogan.’
36Isipa nindo an gabos na isinasabi ni Job;
mahihiling nindo na nagtataram siya siring sa sarong maraot na tawo.
37Huli ta an saiyang kasalan dinadagdagan niya nin pagtumang;
pinag-olog-olog niya an Dios sa satong atubang.”
Currently Selected:
Job 34: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
