Job 33
33
1“Alagad ngunyan, Job dangoga nin marahay an gabos kong sasabihon.
2Andam na ako sa pagtaram kan nasa isip ko.
3Tudok sa sakong puso an gabos kong tataramon,
asin nagsasabi ako kan katotoohan.
4An espiritu nin Dios an naglalang sako
asin an hinangos kan Makakamhan an nagtao sako nin buhay.
5“Simbaga ako kun kaya mo; pakarahaya an saimong mga itataram.
6Ika asin ako pareho sana sa atubang nin Dios;
pareho kitang hinaman hale sa laboy.
7Kaya mayo nin dahelan na matakot ka sako;
dai taka dadaogon.
8“Sa katunayan, uya an mga nadangog ko saimo:
9‘Malinig ako, mayo nin kasalan;
dalisay ako, asin mayo nin ginibong karatan.
10Alagad nakakakuang mga dahelan an Dios tanganing salakayon ako,
asin ibinibilang niya ako na sarong kaiwal.
11An sakong mga bitis saiyang kinakadenahan,
asin minamasdan niya an gabos kong hiro.’
12“Alagad sinasabihan taka, Job, nasasala ka.
Mas dakula an Dios ki sa arin man na tawo.
13Tadaw ta nakikipasuhay ka saiya
sa pagsabing, ‘Dai niya sisimbagon an arin man sa sakong tataramon?’
14Huli ta an Dios nagtataram sa saro o sa duwang paagi,
maski dai iyan naaabot kan pag-isip nin tawo.
15Kun banggi mantang nagkakatorog an mga tawo,
minataram an Dios sa paagi nin mga pangatorogan asin mga bisyon.
16Ipinapadangog niya sainda an mga boot niyang itaram,
asin natatakot sinda sa saiyang mga patanid.
17An Dios nagtataram sainda tanganing paontokon sinda sa pagkakasala
asin ilikay sinda sa pagigin mapaabaw-abaw.
18Ilinilikay niya sa kagadanan an saindang kalag,
asin an saindang buhay sa pagkapahamak sa espada.
19An tawo sinasagwe nin Dios sa paagi nin helang,
asin nin kulog sa saiyang mga tolang;
20kaya ikinakauyam niya an tinapay,
asin mayo siyang gana maski sa masiram na pagkakan.
21Minaniwang siya nin marahay, kaya haros nahihiling na an saiyang mga tolang;
22madali na siyang magduman sa
kinaban kan mga gadan.
23“Tibaad may magdatong na anghel sa pagsurog saiya—
saro sa rinibong anghel nin Dios,
na nagpapagiromdom sa tawo kan saindang katongdan.
24Sa pagkaherak masabi an anghel, ‘Talingkasi siya!
Dai siya dapat magduman sa kinaban kan mga gadan.
Uya an pantubos tanganing makatalingkas siya.’
25Magigin hoben asin makosog giraray an saiyang hawak;
26kun siya mamibi, sisimbagon siya nin Dios;
may kaogmahan na masamba siya sa Dios;
tatanoson giraray nin Dios an gabos na bagay para saiya.
27Masabi siya sa atubang nin mga tawo, ‘Nagkasala ako.
Dai ako naggibo kan matanos alagad ilinigtas ako nin Dios.
28Dai niya itinugot na magduman ako sa kinaban kan mga gadan,
asin buhay ako sagkod ngunyan!’
29“Gigibohon nin Dios an gabos na ini sa sarong tawo, makaduwa o makatolong beses;
30iliniligtas niya an buhay nin sarong tawo
asin tinatawan siya kan kaogmahan nin pagkabuhay.
31“Paghinanyog, Job, dangoga ako;
pag-alo, asin mataram ako.
32Simbaga ako, kun igwa ka nin itataram;
pagtaram, huli ta boot kong tawan ka nin katanosan.
33Alagad kun dai, pagdangog sako;
pag-alo, asin tutukdoan taka kun paano magin madonong.”
Currently Selected:
Job 33: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
