Job 32
32
An mga Pahayag ni Elihu
(32:1–37:24)
1Dai na nagsimbag ki Job an tolong lalaki, huli ta bilog an panarig ni Job na mayo siyang sala. 2Alagad sarong nagmamasid na an ngaran Elihu an naanggot, huli ta tinatawan ni Job nin katanosan an saiyang sadiri asin binabasol an Dios. (Si Elihu aking lalaki ni Barakel, sarong kapagarakian ni Buz, asin gikan sa kamaganakan ni Ram.) 3Anggot man siya sa tolong katood ni Job, huli ta mayo sindang ikinakasimbag maski nagpahayag sindang nasasala si Job. 4Si Elihu an pinakaaki sa mga yaon duman, kaya hinalat niyang makatapos sa pagtaram an gabos. 5Naanggot siya kan mahiling niyang dai nakasimbag ki Job an tolong lalaki, 6kaya nagsabi siya:
“Aki pa ako, asin gurang na kamo,
kaya nagduwa-duwa ako saka natakot na magpahayag kan nasa isip ko.
7Nagsaboot ako na kamo an dapat na magtaram,
na kamo an maghiras nin kadonongan.
8Alagad an espiritu na yaon sa tawo, an hinangos nin Makakamhan,
iyo an nagpapasabot sa tawo.
9Bakong an mga gurang an mga madonong,
ni an mga may edad an nakakasabot kun ano an matanos.
10Kaya sinasabi ko, ‘Pagdangog kamo;
pabayaan nindo ako na magpahayag kan sakong nasasabotan.’
11“Maigot akong naghinanyog mantang kamo nagtataram
asin naghalat mantang kamo naghahanap nin kasabihan na may kadonongan.
12Naghinanyog ako saindo, asin uya, mayo kamong itinaram na nagpapatunay na sala si Job,
ni may nakasimbag saindo kan mga itinaram niya.
13Paano nindo masasabi na nakua nindo an kadonongan?
Kaipuhan simbagon nin Dios si Job, huli ta dai nindo siya nasimbag.
14Kamo an kaolay ni Job, bakong ako,
alagad dai ako masimbag saiya siring kan pagsimbag nindo.
15“Nadaog na sinda ni Job, dai na nakakasimbag;
mayo na sindang ikinakataram.
16Mahalat pa daw ako, huli ta dai sinda nagtataram,
huli ta nagtitindog sinda duman, asin dai nagsisimbag?
17Ako man an masimbag; ako man an mapahayag.
18Dai na ako makakatagal na dai magtaram.
Dai ko na mapupugolan an sakong mga tataramon.
19Kun dai ako makapagtaram, maputok ako
arog sa sarong laogan na anit na pano nin bagong arak.
20Dai ko na matatagalan; kaipuhan magtaram ako.
21Mayo ako nin kakampihan
ni oomawon na siisay man.
22Dai ako tataong magtao nin bakong totoong pag-omaw,
ta kun gibohon ko iyan, tibaad hidali sana akong gadanon kan sakong Kaglalang.
Currently Selected:
Job 32: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
