Job 31
31
1“Nanuga ako na dai nanggad ako mahiling na may karigsokan sa sarong daraga.
2Ano an sakong magigin kahirasan hale sa Dios na nasa kaitaasan,
asin ano an sakong pamana sa Makakamhan?
3Bakong minaabot an kapahamakan sa mga bakong matanos,
asin an kasakitan sa mga paragibo nin karatan?
4Bakong hinihiling niya an sakong mga dalan,
asin binibilang an sakong mga lakad?
5“Minasumpa ako na dai ako nagin maraot
asin mayo akong dinaya.
6Timbangon logod ako sa bakong madayang timbangan,
asin maaraman logod nin Dios na mayo ako nin kasalan!
7Kun nagsuhay ako sa tamang dalan o nagpadagka sa karatan,
kun nadigtaan an sakong kamot nin kasalan,
8magkararaot logod an sakong mga inani
o kakanon logod nin iba an bunga kan sakong tinanom.
9“Kun an sakong puso nadagka sa sarong babae,
asin naghipa ako sa pintoan kan sakong kataed;
10magluto logod an sakong agom para sa ibang lalaki,
asin makidorog logod siya sa iba.
11Huli ta iyan sarong makaoongis na karatan,
sarong kasalan na dapat padusahan kan mga hukom;
12iyan garo kalayong nanghahalon sagkod sa Abaddon,
na masulo kan gabos kong nasasadirihan.
13“Kun dai ko minidbid an deretso kan sakong sorogoon na babae o lalaki,
kan magreklamo sinda laban sako,
14ano an magigibo ko kun maghukom na an Dios?
Kun siya magsiyasat, ano an isisimbag ko saiya?
15Bakong an Dios na naglalang sako iyo man an naglalang sa sakong sorogoon?
Bakong saro sana an naglalang samong duwa?
16“Dai ako nagsayuma na tabangan an dukha;
dai ako nagtugot na mamuhay sa kasakitan an mga babaeng balo
17ni pinabayaan na magutom an mga ilo mantang nagkakan ako.
18Inataman ko sinda sa bilog kong pagkabuhay.#31:18 Inataman ko…pagkabuhay; sa Hebreyo, bako ining malinaw.
19“Kun nakakanumpong ako nin sarong nangangaipo
na dai nakakabakal nin gubing,
20tinatawan ko siya nin gubing na gibo sa lana,
na gikan sa sadiri kong mga karnero.
Dangan inoomaw niya ako sa bilog niyang puso.
21“Kun may dinaya akong sarong ilo,
ta nahiling kong sa paaging ini manggagana ako sa husgado,
22matanggal logod sa sakong mga abaga an sakuyang mga takyag,
asin mabari logod an sakuyang takyag sa may ngalo-ngaloan.
23Huli ta natatakot ako sa padusa nin Dios,
dai ko nanggad magigibo an siring.
24“Kun nagsarig ako sa bulawan
o naglaom ako sa pinong bulawan;
25kun nag-orgulyo ako huli ta dakul an sakong kayamanan
o huli ta dakul an natipon kan sakong kamot;
26kun nagsamba ako sa aldaw kan iyan nagsirang,
o sa bulan na naghihiro sa kagayonan,
27asin hilom na nadagka an sakong puso,
patin hinadokan ko an sakong kamot sa pagtaong galang sa mga iyan;
28ini man sarong kasalan na dapat padusahan kan mga hukom,
huli ta dai ako nagin maimbod sa Dios na nasa kaitaasan.
29“Dai ako naogma kan magtios an sakong mga kaiwal,
ni nagngisi kan sinda napahamak;
30dai ako nagkasala huli ta dai ko hinagad na magadan sinda.
31Naaaraman kan sakong mga trabahador
na danay kong pinapasakat sa sakong harong an mga dayuhan.
32Inalok ko an parabyahe na magdagos sa sakong harong;
dai ko sinda pinatorog sa mga tinampo.
33Hiningowa kan ibang tawo na itago an saindang mga kasalan,
alagad dai ko ginibo iyan.
34Dai ako natakot sa anoman na sasabihon kan mga tawo;
dai ako nag-alo, ni nag-ontok sa laog kan harong
huli ta natakot ako kan saindang pag-olog-olog.
35“Igwa man logod nin magdangog sako!
Minasumpa ako na totoo gabos an itinaram ko.
Simbagon logod ako kan Makakamhan na Dios!
“Kun yaon kuta an sumbong laban sako
na sinurat kan sakong kaiwal,
36may orgulyong dadarahon ko iyan sa sakong abaga;
ibubugtak ko iyan sa sakong payo na garo sarong korona.
37Sasambiton ko sa Dios an gabos kong gibo,
asin dai ako masosopog na mag-atubang saiya.
38“Kun hinabonan an daga na sakong inooma
asin inagaw ko iyan sa tunay na kagsadiri—
39kun sakong kinakan an bunga kan tanom na nagtalubo diyan
alagad ginutom ko an mga paraoma na nagtanom kaiyan—
40kun siring, magtalubo logod an mga tonok embes na mga trigo,
asin an mga doot embes na mga sebada.”
Digdi natapos an mga tataramon ni Job.
Currently Selected:
Job 31: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
