Job 30
30
1“Alagad ngunyan, pinag-oolog-olog ako
kan mga lalaking mas aki pa ki sa sako!
An saindang mga ama, danay na mayo nin halaga
kaya dai ko sinda tinugotan na makaiba kan sakong mga ayam sa pagbantay kan sakong mga karnero.
2Ano an sakong pakinabang sa saindang kosog,
sinda na mga maluya na ngunyan?
3Huli sa kadukhaan asin makuring gutom,
rinarangot ninda an mga alang na gamot.
4Binubulnot ninda an mga tanom sa kalangtadan dangan saindang kinakakan,
maski an mayong namit na gamot nin sarong kahoy!
5Pinapalayas sinda sa tahaw nin katawohan;
kinukurahawan sinda siring sa mga mahabon.
6Kaipuhan na mag-erok sinda sa mga lungib
sa mga labot na kinalot sa mga tampi nin mga ampas.
7Sa tahaw nin kalangtadan, garong mga hayop sindang nag-uungal;
sa irarom nin katonokan duman sinda nagsusurosoan.
8Sinda sarong grupo nin mayong halaga na mga tawo,
na pinalayas sa daga.
9“Ngunyan, ako an saindang nginingisihan,
ako an ginibo nindang subahan.
10Nauuyam asin naghaharayo sinda sako;
mayong pagduwa-duwang minakuspa pakahiling sako.
11Huli ta pinaluya ako nin Dios dangan ibinaba,
dai na sinda nag-aalangan sa sakong atubang.
12Sa too ko nagtitindog an grupong ini;
pinapalayas ninda ako; inaandam ninda an huri nindang salakay.
13Inaabongan ninda an gabos kong dulagan asin hinihingowa nindang gadanon ako;
mayo nin siisay man na makapugol sainda.
14Minadatong sinda na garong nag-aagi sa mahiwas na labot sa kudal;
sa tahaw kan linagabong padagos sindang minadatong.
15Nadadaog ako kan mga kahandalan;
arog sa doros na nag-agi an sakong onra,
asin garo sarong panganoron na nawara an sakong kauswagan.
16“Ngunyan madali na akong magadan;
mayo nin ranga para sa sakong kasakitan.
17Pagkabanggi, nagkukulog an gabos kong tolang;
an kulog na nagpapasakit sako dai nag-oontok.
18Pinupugol ako nin Dios sa sakong kwelyo;
asin ginugurumos an mga gubing ko.
19Itinatapok niya ako sa laboy
asin ako nagin arog sa alpog saka abo.
20“Nag-aagrangay ako saimo, O Dios, alagad dai mo ako sinisimbag;
asin kun ako namimibi, dai mo ako hinihinanyog.
21Nagin makuri ka sa sako;
sa paagi kan mapangyari mong kamot pinapasakitan mo ako.
22Tinutugotan mong ipadpad ako kan doros; pinapalunad mo ako diyan,
asin itinatapok mo sa tahaw kan makosog na bagyo.
23Aram kong dadarahon mo ako sa sakong kagadanan,
an huring padudumanan kan gabos na nabubuhay.
24Alagad, an yaon sa tambak nin mga gaba dai daw maitaas kan saiyang kamot,
asin sa saiyang kasakitan maghagad nin tabang?
25Dai daw ako naghibi para sa tawong nasasakitan?
Dai daw ako nagmondo para sa mga mayong sukat?
26Alagad kan maghanap ako kan marahay, nagdatong an karatan;
asin kan maghalat ako kan liwanag nag-abot an kadikloman.
27An sakong puso nariribong, asin dai nanggad natotoninong;
an mga aldaw nin kasakitan nagdadangadang sa pagsabat sako.
28Naglalakaw akong mamondo, asin mayong kaalingan;
nagtitindog ako sa tahaw nin katiriponan tanganing maghagad nin tabang.
29Ako tugang na lalaki kan mga lalaw na ayam,
asin danay na kaibahan kan mga darakulang gamgam.
30Malalata na an sakong kublit; halangkaw nin marahay an sakong kalentura.
31Kun kaidto nadadangog ko an maoogmang musika,
ngunyan, pagmomondo asin pagtatangis an nadadangog ko na sana.
Currently Selected:
Job 30: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
