Job 29
29
An Huring Tataramon ni Job Dapit sa Saiyang Kaso
1Dangan pinadagos ni Job an saiyang pagtaram:
2“Kun ikakabalik ko sana an nakaaging mga aldaw,
mga aldaw kan an Dios ako inaataman;
3kan an saiyang ilaw iyo an
nagliliwanag kan ako naglakaw sa kadikloman;
4mga aldaw kan ako nasa kauswagan,
kan an pakipagkatood nin Dios nasa sakong harong.
5An Makakamhan na Dios yaon kaidto sa kaibahan ko,
asin nakapalibot sako an gabos kong kaakian.
6Dakul na gatas an itinao sako kan sakong mga kanding saka baka,
asin sa magapong daga nagtalubo an sakong mga oliba.
7Kun minatiripon an mga magurang kan syudad,
asin minatukaw ako sa kaibahan ninda,
8minagilid an mga hoben na lalaki pakahiling ninda sako,
dangan minatindog an mga gurang sa paggalang sako.
9Minaontok sa pagtaram an mga lider kan banwaan;
10maski an darakulang tawo minaalo.
11“Gabos na nakahiling asin nakadangog sako minasabing paladan ako.
12Minatabang ako sa mga dukha, kun sinda minaagrangay;
minatabang ako sa mga ilo na mayo nin makikilingan.
13Benebendisyonan ako kan tawong madali nang magadan,
asin ginigibo kong mag-awit sa kaogmahan an babaeng balo.
14Isinulot ko an katanosan, asin nagubingan ako kaiyan;
an sakong hustisya nakakaagid sa sarong abito saka sarong turban.
15Ako an nagin mata kan buta
asin an nagin mga bitis kan pilay.
16Ako an nagin ama kan dukha,
asin kinampihan ko an dayuhan sa saiyang kasakitan.
17Rinaot ko an kapangyarihan kan makuring mga tawo,
asin ilinigtas ko an saindang mga biktima.
18“Danay akong naglaom na mabuhay nin halawig
dangan magadan sa sadiring harong sa karangahan.
19Arog ako sa sarong kahoy na an mga gamot danay na may tubig,
na an mga sanga bilog na bangging igwa nin ambon.
20Danay akong inoomaw kan lambang saro
asin dai ako ipinasopog kan sakong kosog.
21Kun minatao ako nin hatol, an mga tawo minaalo,
asin maigot na minadangog sa sinasabi ko;
22mayo na sindang ikinadagdag pakatapos ko.
Nagsaromsom sainda siring sa uran an sakong mga tataramon;
23inako iyan kan lambang saro
siring kan pag-ako kan mga paraoma sa uran pakatapos kan tig-initan.
24Hinuyuman ko sinda kan mawaraan sinda nin pagsarig;
an magayagaya kong lalawogon iyo an nagpakosog kan boot ninda.
25Ako an namahala saka naggibo kan mga desisyon;
pinangenotan ko sinda arog kan pangengenot nin sarong hade sa saiyang hukbo,
asin rinanga ko sinda sa saindang kamondoan.
Currently Selected:
Job 29: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
