Job 28
28
Pag-omaw sa Kadonongan#An Hebreyong kasuratan, dai nagtatao nin tanda kun siisay an nagtataram sa kapitulong ini.
1“Sa katunayan igwa nin
mina nin plata, asin nin lugar saen linilinigan an bulawan.
2Kinukua hale sa daga an lansang
asin an bronse hale sa gapo na tinutunaw.
3An diklom sa kairaroman sinisiyasat nin mga tawo.
Sinisiyasat ninda an kairaroman kan daga
asin nagkakalot sinda nin mga gapo sa kadikloman.
4Harayo sa pinag-eerokan nin mga tawo
o sa lugar na dai pa lamang nabatoyan nin mga bitis,
nagmimina an mga tawo.
Mamondong nagtatrabaho sinda duman,
nagkukulambitay sa mga lubid sa laog kan mga kalot.
5Nagtatalubo sa daga an pagkakan,
alagad an irarom kaiyan garo binukag nin kalayo.
6An mga gapo kan daga igwa nin mga sapiro
asin an mga alpog igwa nin bulawan.
7Mayong gamgam na nakakaaram kan dalan pasiring sa mina,
asin mayo lamang nin bwitre na minalayog sa itaas kaiyan.
8Mayo pang leon o ibang lalaw na hayop na nag-agi sa mapungaw na mga dalan na idto.
9“Kinakalot nin tawo an pinakamatagas na gapo,
asin kinakalot an kabukidan magpoon sa pamitisan.
10Minagibo sinda nin mga agihan sa mga gapo,
asin nahihiling kan saindang mga mata an lambang mahalagang bagay.
11Sinulat ninda an mga ginigikanan kan mga katubigan,
tanganing dai na magtagdo,
asin dinadara ninda sa liwanag an bagay na natatago.
12Alagad saen makukua an kadonongan?
Saen kita makakanood nin pakasabot?
13“Dai naaaraman nin tawo an halaga nin kadonongan,
asin dai iyan nanunumpongan sa daga kan mga nabubuhay.
14‘Mayo iyan sako,’ an sabi kan kairaroman,
‘Mayo man iyan sako,’ an sabi kan kadagatan.
15Dai iyan mababakal nin plata o bulawan.
16An halaga kan kadonongan
dai mapapantayan kan pinakapurong bulawan o alahas.
17An kadonongan mas mahalaga ki sa bulawan,
ki sa bulawan na plorera o sa pinakamarahay na salming.
18An halaga kan kadonongan orog ki sa koral,
o sa kristal, o sa mga perlas.
19An topasyo nin Etiopia
dai pwedeng iagid sa kadonongan ni an pinakapurong bulawan.
20“Haen, kun siring, an ginigikanan nin kadonongan?
Haen an lugar nin pakasabot?
21Mayo pang nabubuhay na nakahiling kaiyan,
maski an naglalayog na mga gamgam.
22An Pagkaraot saka an Kagadanan nagsabi,
‘Huring-huding sana an nadangog nyamo dapit kaiyan.’
23“An Dios sana an nakakaaram kan dalan,
asin siya an tatao kun saen makukua an kadonongan.
24Huli ta nahihiling niya an mga poro kan kinaban,
asin an gabos na nasa irarom kan kalangitan.
25Kan itao nin Dios sa doros an kapangyarihan kaiyan
asin itinalaan an sukol kan katubigan;
26kan maggibo siya nin sarong pagboot para sa uran,
asin nin dalan para sa kikilat;
27dangan niya nahiling an kadonongan saka nabalo an halaga kaiyan—
naoyonan niya an kadonongan.
28“Sinabihan nin Dios an mga tawo,
‘Uya, an pagkaigwa nin takot sa Kagurangnan iyo an kadonongan.
An pagtalikod sa karatan iyo an pakasabot.’”
Currently Selected:
Job 28: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
