Isaias 54
54
An Pagkamoot nin Kagurangnan sa Israel
1Jerusalem, kaidto siring ka sa babaeng mayo nin aki,
alagad pwede ka nang mag-awit ngunyan asin magkurahaw sa kaogmahan.
Huli ta magkakaigwa ka na nin dakul na kaakian
ki sa babaeng igwa nin agom!
2Padakulaa an tolda na saimong pinag-eerokan;
sugponi an mga lubid asin pakosoga an mga taldok kaiyan!
3Huli ta papadakulaon mo an saimong daga sa gabos na direksyon;
makukua giraray kan saimong namamanwaan
an daga na sinakop kan ibang nasyon.
Mapapano nin tawo an mga syudad na mayo nin nag-eerok ngunyan.
4Dai ka matakot—dai ka na masosopgan giraray;
dai ka na mawawaraan nin onra.
Malilingawan mo nang dai ka nagin maimbod sa agom kan ika hoben pa.
Malilingawan mo an makuring kapongawan bilang sarong balo.
5An saimong Kaglalang magigin siring sa agom mo—
Kagurangnan nin mga hukbo an saiyang ngaran.
Ililigtas ka kan banal na Dios nin Israel—
siya an kagsakop kan bilog na kinaban.
6Israel, nakakaarog ka sa sarong hoben na agom,
na binayaan kan saiyang agom asin nagmomondo nin makuri.
Alagad inaapod ka giraray nin Kagurangnan na nagsasabi:
7“Sa kadikit na panahon binayaan taka;
sa dakulang pagkamoot kukuahon taka.
8Sa kaanggotan tinalikodan taka sa kadikit na panahon,
alagad ipapahiling ko saimo an sakong pagkamoot sagkod pa man.”
Iyan an sinasabi nin Kagurangnan na nagliligtas saimo.
9“Kan panahon ni Noe ako nanuga
na dai na nanggad magkakaigwa nin baha sa daga.
Ngunyan nanunuga ako na dai na nanggad ako maaanggot saimo;
dai ko na ika papadusahan.
10Pwedeng magkaroronot an kabukidan saka kabubuldan,
alagad an sakong pagkamoot saimo dai magkakaigwa nin kataposan;
an sakong panuga na katoninongan ootobon ko sagkod lamang.”
Iyan an sinasabi nin Kagurangnan na namomoot saimo.
An Jerusalem sa Maabot na Panahon
11Nagsasabi an Kagurangnan,
“O Jerusalem, nagtitios, makaheherak, asin mayong karangahan na syudad,
papupusogon ko giraray an saimong mga pundasyon
asin mahalagang bato an sakong gagamiton.
12Mga rubi an gagamiton ko sa pagpatindog kan saimong mga tore,
mga karbungko kan saimong mga trangkahan,
mahalagang mga bato kan kudal na nakapalibot saimo.
13“Ako mismo an matukdo sa saimong mga namamanwaan,
asin an matao nin kauswagan saka katoninongan.
14Papakosogon ka kan hustisya asin katanosan.
Magigin ligtas ka sa nang-aapi asin sa takot.
15Kun may magsalakay saimo
iyan bakong kabotan ko; madadaog an siisay man
na makikilaban saimo.
16“Ako an naglalalang kan panday,
na nagmamakot nin kalayo dangan minagibo nin mga armas.
Ako man an naglalalang kan soldados,
na naggagamit kan mga armas nganing manggadan.
17Alagad mayo nin armas na makakakulog saimo;
magkakaigwa ka nin kasimbagan sa gabos na mag-akusar saimo.
Susurogon ko an sakong mga sorogoon
asin tatawan ko sinda nin kapangganahan.”
An Kagurangnan an nagtaram.
Currently Selected:
Isaias 54: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
