Isaias 53
53
1Nagsimbag an mga tawo,
“Siisay daw an pwedeng
magtubod sa samong ibinabareta?
Siisay daw an pwedeng nakahiling kan kamot nin Kagurangnan sa nangyaring ini?
2Kabotan nin Kagurangnan na an saiyang sorogoon
magtalubo siring sa sarong tinanom na nagkakagamot sa mamarang daga.
Mayo siya nin porma o dignidad
tanganing madagka kitang hilingon siya;
mayo nin kagayonan tanganing mawoton ta siya.
3Pinag-olog-olog asin isinikwal ta siya;
tinios niya an sakit saka kulog.
Mayo man lamang nin boot na maghiling saiya—
pinag-olog-olog ta siya asin dai ginalangan.
4“Alagad tinios niya an sakit na kuta para sato,
an kulog na kita kuta an nagtios.
Naghona kita na an saiyang pagtios
sarong padusa na hale sa Dios.
5Alagad huli kan satong mga kasalan linugad siya,
huli kan ginibo tang karatan hinampak siya.
Nabolong kita huli kan padusa na saiyang tinios,
naomayan kita huli kan mga hampak na saiyang inako.
6Gabos kita siring sa karnero na nagkawarara,
an lambang saro sato naglakaw sa sadiring dalan.
Alagad sa saiya pinahugpa nin Kagurangnan an padusa,
an padusa na dapat kita kuta an mag-ako.
7“Pinasakitan siya nin makuri, alagad mapakumbabang tinios niya iyan;
dai lamang siya nagtaram nin anoman.
Siring sa kordero na dinadara sa bunoan,
siring sa karnero na guguntingan,
dai lamang siya nagtaram nin anoman.
8Dinakop siya asin sinentensyahan dangan dinara tanganing gadanon,
asin mayong nagmakulog kun ano an mangyayari saiya.
Ginadan siya para sa kasalan kan satong banwaan.
9Ilinubong siya sa lulubngan kan mga tampalasan,
ilinubong siya kaiba kan mayaman,
maski dai lamang siya nakagibo nin krimen o nin kaputikan.”
10Nagsasabi an Kagurangnan,
“Kabotan ko na siya magtios;
an saiyang kagadanan sarong sakripisyo na magdadara nin kapatawadan.
Halawig an saiyang magigin buhay,
kaya mahihiling pa niya an saiyang kapagarakian,
asin sa paagi niya maootob an sakong katuyohan.
11Pakatapos kan gabos niyang kasakitan, magkakaigwa giraray siya nin kaogmahan;
maaaraman niyang dai nasayang an saiyang pagtios.
An maimbod kong sorogoon, na sakong nawiwilihan,
iyo an mapasan kan padusa kan kadaklan
asin huli sa saiya sinda sakong papatawadon.
12Kaya tatawan ko siya nin kaomawan,
kaiba kan mga dakula saka mapangyaring mga tawo.
Idinusay niya an saiyang buhay
asin ibinilang siya sa kaibahan kan mga tampalasan.
Inako niya an kasalan kan kadaklan
asin ipinamibi niya na sinda patawadon.”
Currently Selected:
Isaias 53: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
