Isaias 55
55
An Pagkaherak na Itinatao nin Dios
1Nagsasabi an Kagurangnan,
“Madya, kamo gabos na napapaha—
uya an tubig!
Madya, kamo na mayo nin kwarta—
bakal asin kakan!
Madya, bakal kamo nin arak saka gatas
alagad mayo ini nin bayad!
2Tadaw ta inuubos nindo an saindong kwarta para sa dai nakakabasog?
Tadaw ta inuubos nindo an saindong tandan
asin padagos pa kamong nagugutom?
Dangoga nindo ako asin giboha an sasabihon ko,
dangan mananamitan nindo an pinakamarahay sa gabos na kakanon.
3“Paghinanyog kamo, sakong banwaan, asin dumolok kamo sako;
madya kamo sako, asin magkakaigwa nin kapanoan an saindong buhay!
Magibo ako saindo nin tipan na daing kataposan
asin itatao ko saindo an mga bendisyon na ipinanuga ko ki David.
4Ginibo ko siyang lider asin pamayo nin mga nasyon,
dangan sa paagi niya ipinahiling ko sainda an sakong kapangyarihan.
5Ngunyan aapodon nindo an dayuhan na mga nasyon;
dai ninda kamo midbid kaidtong panahon
alagad ngunyan magdadalagan na mapasiring sinda saindo nganing makiapil!
Ako, an Kagurangnan na saindong Dios, an banal na Dios nin Israel,
iyo an magibo nin paagi tanganing mangyari ini;
itatao ko saindo an kaomawan asin kamurawayan.”
6Hanapa nindo an Kagurangnan mantang makukua siya,
pag-apod kamo saiya mantang harani siya.
7Pabayaan na kan tampalasan an maraot nindang pamumuhay
asin an biko nindang mga kaisipan.
Magbalik na sinda sa Kagurangnan, an satong Dios;
maheherakon siya asin madaling magpatawad.
8Nagsasabi an Kagurangnan,
“An sakong kaisipan bakong arog kan saindong kaisipan,
asin an sakong mga paagi iba man kan sa saindo.
9Kun paanong an kalangitan mas halangkaw ki sa daga,
siring man an sakong mga paagi sa saindong mga paagi
asin an sakong mga kaisipan sa saindong mga kaisipan.
10“An sakong tataramon siring sa nyebe saka sa uran,
na naghuhugpa hale sa langit, nganing biribihon an daga.
Pinapatalubo ninda an mga tinanom,
na minatao nin banhi na isasabwag asin minatao nin pagkakan.
11Siring man an tataramon na sakong sinasabi—
dai iyan mabalik sako na mayo nin bunga;
gigibohon kaiyan an gabos na sakong ipinapagibo.
12“May kaogmahan kamong mahale sa Babilon;
matoninong kamong papangenotan paluwas sa syudad.
Mag-aarawit an kabukidan saka an kabubuldan,
asin magkukurahaw an mga kahoy sa kaogmahan.
13Embes kan mga tonok matalubo an mga kahoy na sipres;
embes kan mga binit matalubo an mga marambong na kahoy.
Ini an magigin sarong tanda na magdadanay sagkod lamang,
sarong giromdom kan ginibo ko, an Kagurangnan.”
Currently Selected:
Isaias 55: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
