Isaias 46
46
1“Iyo ini an kataposan kan mga dios-dios nin Babilon!
Sinamba kaidto si Bel saka si Nebo,
alagad ngunyan isinasakay na sinda sa mga asno,
sarong kagabatan sa likod kan pagal na mga hayop.
2Dai ikinakaligtas kan mga ladawan an saindang sadiri;
sinakop sinda saka binihag.
Iyo ini an kataposan kan mga dios-dios nin Babilon!
3“Dangoga nindo ako, mga kapagarakian ni Jacob,
gabos na natada sa sakong banwaan.
Inataman ko kamo poon kan kamo mamundag.
4Ako an saindong Dios asin aatamanon ko kamo
sagkod na kamo maggurang saka magputi an saindong buhok.
Ako an naggibo saindo asin ako an maataman saindo;
tatabangan ko kamo asin ililigtas ko kamo.
5“Sa kiisay nindo ako ibabaing?” an hapot nin Kagurangnan.
“Igwa daw nin saro na makakaarog sa sako?”
6Binubukasan kan mga tawo an saindang mga supot dangan inuula an bulawan;
minatimbang sinda nin plata sa mga timbangan.
Minatandan sinda nin alahero tanganing maggibo nin sarong dios;
dangan minaluhod sinda asin sinasamba iyan.
7Ibinubugtak ninda iyan sa saindang mga abaga asin dinadara;
ibinubugtak ninda iyan sa sadiring lugar asin duman sana iyan nagtitindog,
dai nakakahiro sa namumugtakan.
Kun igwang mamibi diyan, dai iyan nakakasimbag
o nakakaligtas saiya sa panahon nin kasakitan.
8“Giromdoma nindo ini, kamo na mga parakasala;
isipa nindo an sakong ginibo.
9Giromdoma kun ano an nangyari kaidtong panahon;
akoa nindo na ako sana an Dios
asin pwera sako mayo na nin ibang dios;
mayo na nin ibang arog sako.
10Poon sa kapinonan ipinahayag ko an kataposan;
haloy nang panahon na naghula ako kan mangyayari.
Nasambit kong mangyayari an sakong mga plano
asin ootobon ko an gabos kong katuyohan.
11Inaapod ko an sarong lalaki na magdigdi hale sa sirangan;
mananaklot siya siring sa sarong agila
asin ootobon niya an sakong katuyohan.
Ako an nagtaram, asin mangyayari iyan.
12“Dangoga nindo ako, mga tawong matagas an payo,
na nag-iisip na harayo pa an kapangganahan.
13Irinarani ko an aldaw nin kapangganahan—
bako na harayo iyan.
Dai na mahahaloy an sakong kapangganahan.
Ililigtas ko an Jerusalem
asin an Israel dadarahan ko duman nin kamurawayan.”
Currently Selected:
Isaias 46: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
