Isaias 47
47
An Paghukom sa Babilon
1Nagsasabi an Kagurangnan,
“Babilon, humilig ka sa saimong trono,
asin tumukaw ka sa alpog kan daga.
Kaidto nakakaagid ka sa sarong birhen, sarong syudad na dai nasakop,
alagad bako ka nang lumbod asin mabini!
Saro ka nang oripon ngunyan!
2Patalibonga an gilingan! Paggiling nin arina!
Halea an saimong belo! Hubaa an magayon mong gubing!
Itaasan an gayad kan saimong gubing sa pagbalyo mo nin mga salog.
3Mahihiling kan mga tawo na ika huba;
mahihiling nindang ibinaba ka na asin sinopog.
Mabalos ako, asin mayo nin siisay man na mapugol sako.”
4An banal na Dios nin Israel iyo an nagpapatalingkas samo—
Kagurangnan nin mga hukbo an saiyang ngaran.
5Sinasabihan nin Kagurangnan an Babilon,
“Tumukaw ka asin dai ka maggirong diyan sa diklom;
dai ka na aapodon na reyna nin mga nasyon!
6Naanggot ako sa sakong banwaan;
dai ko na sinda ibinilang na sadiri ko.
Itinao ko sinda sa saimong kamot,
asin dai mo sinda naherakan;
maski an mga gurang saimong sinakalan.
7Naghona ka na danay kang magigin reyna,
kaya dai mo naisip an mga bagay na ini
o nagiromdoman an magigin kataposan kaiyan.
8“Dangoga ini, ika na mamomoton sa kaogmahan,
na naghohonang ligtas ka saka matoninong.
Sinasabi mong arog ka kadakula sa Dios—
na mayong makakaarog sa saimo.
Naghona kang dai ka nanggad mababalo
o magagadanan nin mga aki.
9Alagad sa madaling panahon, sa laog nin sarong aldaw,
an duwang bagay na ini mangyayari.
Maski gamiton mo pa an gabos na salamangka,
mawawaraan ka nin agom asin mga aki.
10“Dai ka nag-alangan sa paggibo nin karatan;
naghona kang mayo nin makakahiling saimo.
Linagalag ka kan saimong kadonongan saka pakasabot,
asin nagsaboot kang ‘Ako an Dios—mayo nin ibang makakaarog sa sako.’
11Maabot saimo an kapahamakan,
asin an saimong salamangka dai makakapugol kaiyan.
Sa madali, maabot saimo an karatan—
karatan na dai lamang nag-abot sa isip mo!
12Padagosa an saimong mga panlulumay saka mga pangkukulam;
ginamit mo na iyan poon kan ika hoben pa.
Tibaad makatabang iyan saimo,
na matakot an mga kaiwal mo.
13Mayo ka nin nagiginibo maski kadakul na kan hatol saimo.
Padoloka an saimong mga astrologo asin magpatabang ka sainda—
sinda na nag-aadal kan mga bitoon,
na naggigibo nin mapa kan kalangitan
asin nagsasabi saimo bulan-bulan
kun ano an mangyayari saimo.
14“Makakaarog sinda sa mga kaputol na dagami,
asin matututong sinda sa kalayo!
Dai sinda makakaligtas sa sobrang init nin kalayo.
Bako ini an kalayo na pwede
sanang pagpahimbongan.
15Mayo nin itataong karahayan saimo an mga astrologo
na pinaghahagadan mo nin hatol sa bilog mong buhay.
Babayaan ka ninda asin malakaw sinda sa sadiri nindang dalan,
dangan mayo nin matatada na maligtas saimo.”
Currently Selected:
Isaias 47: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
