Isaias 45
45
Pinili nin Kagurangnan si Ciro
1Pinili nin Kagurangnan si Ciro na magin hade.
Pinili niya ini nganing sakopon an mga nasyon;
sinusugo niya siya tanganing halean nin kapangyarihan an mga hade;
bubukasan nin Kagurangnan an mga trangkahan nin mga syudad para saiya.
Sinasabihan nin Kagurangnan si Ciro,
2“Ako mismo an maandam kan aagihan mo;
an kabukidan saka kabubuldan papantayon ko.
An mga bronseng trangkahan sakong gagabaon
asin an mga lansang na barat sakong babarion.
3An mga kayamanan hale sa madiklom saka tagong mga lugar itatao ko saimo,
dangan maaaraman mo na ako an Kagurangnan,
asin na inapod ka sa saimong ngaran kan Dios nin Israel.
4Pinipili taka tanganing tabangan mo an sakong sorogoon na Israel,
an banwaan na sakong pinili.
Tinawan taka nin dakulang onra, maski dai mo pa ako namimidbidan.
5“Ako an Kagurangnan; pwera sako mayo na nin ibang Dios.
Tatawan taka kan kosog na kaipuhan mo,
maski dai mo pa ako namimidbidan.
6Ginigibo ko ini tanganing an gabos magpoon sa sarong poro kan kinaban sagkod sa ibong na poro
makaaram na ako an Kagurangnan
asin pwera sako mayo na nin ibang dios.
7Linalalang ko an liwanag saka an kadikloman;
nagpapadara ako nin bendisyon saka kapahamakan.
Ako, an Kagurangnan, an naggigibo kan gabos na iyan.
8An kapangganahan ipapadara ko hale sa langit arog sa uran;
mabuka an daga tanganing akoon iyan,
dangan mamumunga nin hustisya saka katalingkasan.
Ako, an Kagurangnan, an magibong mangyari iyan.”
An Kagurangnan nin Linalang asin nin Kasaysayan
9Herak man sa nakikipasuhay sa kaggibo saiya,
an sarong koron sa paragibo nin koron!
Minahapot daw an laboy
sa paragibo nin koron kun ano an ginigibo kaini?
Minareklamo daw an koron na dai tatao an naggibo saiya?
10May nangahas na daw na maghapot sa saiyang mga magurang,
“Tadaw ta siring kaini an pagkagibo nindo sako?”
11An Kagurangnan, an banal na Dios nin Israel,
an nagtataong direksyon sa maabot pang panahon, nagsasabi:
“Mayo kamong deretso na maghapot sako dapit sa sakong mga aki
o magsabi sako kan dapat kong gibohon!
12Ako an naggibo kan kinaban
asin naglalang kan katawohan nganing mag-erok diyan.
Inunat ko an kalangitan huli sa sakong kapangyarihan;
pinagbobotan ko an aldaw, an bulan, asin an kabitoonan.
13Ako mismo an nag-apod ki Ciro tanganing otobon an sakuyang katuyohan
asin pakarahayon an gabos na bagay.
Tatanoson ko an lambang dalan na saiyang aagihan.
Hihirahayon niya an sakong syudad, an Jerusalem,
asin tatalingkasan niya an sakong banwaan
bakong huli sa bayad o sa suhol.”
An Kagurangnan nin mga hukbo an nagtaram.
14An Kagurangnan nagsasabi sa Israel,
“Mapapasaimo an kayamanan nin Egipto saka Etiopia,
asin magigin mga oripon mo an haralangkaw na lalaki nin Seba;
magsusunod sinda saimo na nakakadena.
Maluhod sinda sa atubang mo asin masabi,
‘An Dios kaiba mo—siya sana an Dios.
15An Dios nin Israel, na nagliligtas kan saiyang banwaan,
sarong Dios na dai nagpapahiling.
16An mga naggigibo nin mga ladawan mapapasopog
asin mawawaraan nin onra.
17Alagad ilinigtas nin Kagurangnan an Israel,
asin magdadanay sagkod lamang an saiyang kapangganahan;
dai nanggad siya mapapasopog asin mawawaraan nin onra sagkod pa man.’”
18Linalang nin Kagurangnan an kalangitan—
siya sana an Dios!
Pinorma niya asin ginibo an kinaban—
pinapusog niya iyan asin iyan magdadanay.
Dai niya iyan ginibong sarong lugar na mamondo,
kundi ginibo niyang sarong lugar na eerokan nin tawo.
Siya iyo an nagsasabing, “Ako an Kagurangnan,
asin pwera sako mayo na nin ibang dios.
19Bakong sa hilom kan ako magtaram
asin dai ko tinago an sakong katuyohan.
Dai ko hinagad sa banwaan nin Israel
na hanapon ako sa mamondong lugar.
Ako an Kagurangnan, asin nagsasabi ako kan katotoohan;
ipinapahayag ko kun ano an tama.”
An Kagurangnan kan Kinaban asin an mga Ladawan nin Babilon
20Nagsasabi an Kagurangnan,
“Magtiripon kamo asin madya, mga namamanwaan kan mga nasyon,
kamo gabos na nagkatarada kan marumpag an imperyo;
dumolok kamo sa hukoman!
An mga tawong nagpaparada kaiba an saindang mga ladawan na kahoy
asin namimibi sa mga dios-dios na dai makakaligtas sainda—
an mga tawong iyan mayong naaaraman!
21Madya asin daraha nindo an saindong kaso sa hukoman;
tugoteng magpaharapot-hapot an mga isinumbong.
Siisay kaidto an naghula kun ano an mangyayari?
Bakong ako, an Kagurangnan, an Dios na nagliligtas kan saiyang banwaan?
Pwera sako mayo na nin ibang dios.
22“Madya kamo sako ngunyan asin makakaligtas kamo,
mga tawo sa bilog na daga!
Huli ta ako an Dios, asin
pwera sako mayo na nin ibang dios.
23Totoo an sakong panuga, asin dai iyan maliliwat.
Tudok sa puso na nanunuga ako sa gabos:
Madolok an lambang saro asin maluhod sa sakong atubang
patin masumpa sa sako nin kaimbodan.
24“Masabi sinda na sa paagi ko sana
makukua an kosog saka an kapangganahan;
alagad magtitios nin kasosopgan an gabos na naoongis sako.
25Ako, an Kagurangnan, an maligtas sa gabos
na kapagarakian ni Jacob, asin oomawon ninda ako.
Currently Selected:
Isaias 45: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
