Isaias 43
43
Nangangako an Dios na Ililigtas an Saiyang Banwaan
1Israel, an Kagurangnan na naglalang saimo nagsabi,
“Dai ka matakot—ililigtas taka.
Inapod taka sa saimong ngaran—sadiri taka.
2Kun mag-agi ka sa hararom na katubigan, kaibahan mo ako;
dai ka madadaog kan saimong mga kasakitan.
Kun mag-agi ka sa kalayo, dai ka masusulo;
dai ka maaano kan mga masakit na pagbalo.
3Huli ta ako an Kagurangnan na saimong Dios,
an banal na Dios nin Israel, an nagliligtas saimo.
Itatao ko an Egipto bilang pantubos sa saimo;
an Etiopia saka an Seba, bilang karibay mo.
4Papabayaan ko an mga nasyon tanganing iligtas an saimong buhay,
huli ta mahalaga ka sa sako,
asin huli ta namomotan taka sako ginagalangan.
5Dai ka matakot—kaiba mo ako!
“Ipupuli ko saimo an saimong namamanwaan
hale sa sirangan asin sa solnopan.
6Tataraman ko an amihan na butasan sinda
asin an habagat na dai sinda pagpugolon.
Tugote nindong magbalik an sakong banwaan
hale sa harayong mga daga, hale sa gabos na poro ka kinaban.
7Sinda an sadiri kong banwaan
asin ako an naglalang sainda tanganing magdara sako nin kamurawayan.”
An Israel an Saksi nin Kagurangnan
8Nagsabi an Dios,
“Paatubanga an sakong banwaan sa hukoman.
Igwa sinda nin mga mata, alagad mga buta;
mga bongog, maski igwang mga talinga!
9Apoda an mga nasyon nganing mag-atubang sa hukoman.
Arin sa saindang mga dios-dios an nakakaaram kan maabot na panahon?
Arin sainda an naghula kan nangyayari ngunyan?
Padarahan sa mga dios-dios na ini an saindang mga saksi
tanganing magpatotoo na tama sinda,
tanganing magsabi na totoo an saindang mga tataramon.
10“Banwaan nin Israel, kamo an sakong mga saksi;
pinili ko kamo nganing magin sorogoon ko,
tanganing mamidbidan nindo ako asin magtubod kamo sa sako
patin masabotan nindo na ako sana an Dios.
Pwera sako, mayo na nin ibang dios;
mayo nanggad kaidto asin dai nanggad magkakaigwa.
11“Ako sana an Kagurangnan,
asin pwera sako mayo na nin paraligtas.
12Hinulaan ko an mangyayari,
dangan nag-abot ako sa pagtabang saimo.
Mayo pang dayuhan na dios na naggibo kaini;
kamo an sakong mga saksi.
13Ako an Dios asin magdadanay na Dios sagkod pa man.
Mayong makakadulag sa sakong kapangyarihan;
mayong makakaliwat kan sakong ginigibo.”
An Pagdulag hale sa Babilon
14An banal na Dios nin Israel, an Kagurangnan na nagliligtas saindo, nagsasabi,
“Sa pagligtas saindo, mapadara ako nin hukbo laban sa Babilon;
gagabaon ko an trangkahan kan syudad,
asin an mga kinurahaw kan saiyang namamanwaan magigin pagtangis.
15Ako an Kagurangnan, an saindong banal na Dios.
Ako an naglalang saimo, Israel, asin ako an saimong hade.”
16Kaidtong panahon an Kagurangnan naggibo nin sarong dalan sa dagat,
sarong agihan sa dakulang katubigan.
17Pinangenotan niya an sarong mapangyaring hukbo pasiring sa kapahamakan,
sarong hukbo nin mga karwahe saka mga kabayo.
Nagkaturumba sinda asin dai na nakabangon,
pinalsok sinda siring sa laad nin sarong ilawan.
18Alagad nagsabi an Kagurangnan,
“Hare na nindo pagromdoma an mga pangyayari kan mga aldaw na nakaagi,
ni horophoropon an mga bagay na nangyari haloy nang panahon.
19Magmasid kamo para sa bagong bagay na gigibohon ko.
Nangyayari na ini—nahihiling na nindo ini ngunyan!
Magibo ako nin sarong dalan sa kalangtadan
asin tatawan ko kamo nin mga burabod nin tubig duman.
20Maski an mga lalaw na hayop magalang sako;
an mga lalaw na ayam saka mga ostrits maomaw sako.
Kun an mga salog pabuloson ko na sa desyerto
tanganing tawan nin tubig an pinili kong banwaan.
21Sinda an banwaan na ginibo ko para sako,
asin mag-aawit sinda sako nin mga pag-omaw!”
An Kasalan nin Israel
22Nagsasabi an Kagurangnan,
“Alagad napagal ka sako, Israel;
dai ka nagsamba sako.
23Dai ka nagdara sako kan saimong karnero para sa tinutong na atang;
dai mo ako inomaw kan saimong mga sakripisyo.
Dai taka pinagabatan huli sa mga dolot
ni pinagal huli sa paghagad nin insenso.
24Dai mo ako ibinakal nin insenso
o binasog kan mga taba kan saimong mga hayop.
Alagad pinagabatan mo ako kan saimong mga kasalan;
pinagal mo ako huli kan saimong kasombikalan.
25Alagad, ako an Dios na nagpapatawad kan saimong mga kasalan,
asin ginigibo ko ini huli ta ako an Dios.
Dai ko na gigiromdomon an saimong mga kasalan.
26“Maghampang kita sa hukoman; isangat mo an saimong kaso
asin patotoohan mo na tama ka!
27Nagkasala an naenot mong ginikanan;
nagkasala tumang sako an saimong mga lider,
28asin binasang-basang kan saimong mga pamayo an sakong santwaryo.
Kaya pinabayaan kong mapahamak an Israel;
itinugot kong pag-olog-ologon an sadiri kong banwaan.”
Currently Selected:
Isaias 43: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
