Isaias 42
42
An Sorogoon nin Kagurangnan
1Nagsasabi an Kagurangnan,
“Uya an sakong sorogoon,
na sakong pinapakosog—
an sakong pinili, an sakong nawiwilihan.
Ibinugtak ko an sakong espiritu sa saiya,
asin siya an matao nin hustisya sa gabos na nasyon.
2Dai siya makurahaw o malangkaw kan saiyang tingog
o magibo nin makokosog na pahayag sa mga tinampo.
3Dai niya babarion an tiko nang bariw
o papalsokon an nagkikimatkimat nang ilaw.
Maimbod niyang papadanayon an hustisya.
4Dai siya mawawaraan nin paglaom o kosog nin boot;
papupusogon niya an hustisya sa kinaban.
Hinahalat kan mga harayong daga an saiyang katukdoan.”
5Linalang nin Dios an kalangitan dangan biniklad niya iyan;
siya an naggibo kan daga asin kan gabos na nag-eerok diyan;
siya an nagtaong buhay saka hinangos sa gabos na katawohan.
Ngunyan sinasabihan nin
Kagurangnan Dios an saiyang sorogoon,
6“Ako, an Kagurangnan,
an nag-apod saimo asin an nagtao saimo nin kapangyarihan
nganing papangyarihon mo an hustisya sa kinaban.
Sa paagi mo makikipagtipan ako sa gabos na banwaan;
huli saimo dadarahan ko nin liwanag an mga nasyon.
7Bubukasan mo an mga mata kan buta
asin tatalingkasan mo an mga nagtutukaw sa madiklom na mga bilanggoan.
8“Ako sana an Kagurangnan na saimong Dios.
Mayo nin ibang dios na pwedeng makihiras kan sakong kamurawayan;
dai ako matugot na mahirasan kan sakong kaomawan an mga ladawan.
9Nagkatotoo na an mga bagay na sakong itinaram.
Ngunyan sasabihan taka kan dapit sa bagong mga bagay
maski dai pa ini nangyayari.”
Sarong Awit nin Pag-omaw
10Awitan nindo nin bagong awit an Kagurangnan;
awita nindo an saiyang pag-omaw, bilog na kinaban!
Omawon nindo siya, gabos na linalang sa dagat.
Mag-awit kamo, mga harayong daga asin kamo gabos na nag-eerok diyan!
11Pag-omawon kan desyerto asin kan mga banwa kaiyan an Dios;
pag-omawon siya kan mga tawo sa Kedar!
An mga nag-eerok sa syudad nin Sela magkukurahaw sa kaogmahan
sa mga alitoktok kan kabukidan!
12Magtao nin pag-omaw saka kamurawayan sa Kagurangnan
an mga nag-eerok sa harayong mga daga!
13An Kagurangnan minaluwas siring sa sarong paralaban;
andam asin boot makigera.
Minakurahaw siya bilang tanda nin pagsalakay;
ipinapahiling niya an saiyang kapangyarihan laban sa saiyang mga kaiwal.
Nanunuga an Dios na Tatabangan an saiyang Banwaan
14Nagsasabi an Dios,
“Haloy nang panahon na dai ako naggirong;
dai ko sinimbag an sakong banwaan.
Alagad nag-abot na an oras tanganing ako maghiro.
Makurahaw ako siring sa babaeng nangangaki.
15Raraoton ko an kabubuldan saka kabukidan
asin papaalangon ko an mga doot saka kakahoyan.
Gigibohon kong mga desyerto#42:15 Probableng teksto mga desyerto; sa Hebreyo mga isla. an mga salog
asin papamarahon ko an mga sapa nin tubig.
16“Papangenotan ko an sakong butang banwaan
sa mga dalan na dai pa ninda inagihan.
Gigibohon kong liwanag an saindang kadikloman
asin sa saindang atubangan, sasaramahon ko an bakong saramang mga lugar.
Iyo ini an mga bagay na gigibohon ko,
asin dai ko iyan lilingawan.
17Masosopgan an gabos na nananarig sa mga dios-dios,
asin an mga nag-aapod sa mga ladawan bilang saindang mga dios.”
Dai Nakanood an Israel
18Nagsasabi an Kagurangnan,
“Pagdangog kamo, mga tawong bongog!
Pagmaan kamo nin marahay, kamo na mga buta!
19May makakaarog pa daw sa sakong sorogoon sa pagkabuta,
o sa sakong sinugo sa pagkabongog?
20Israel, kadakul kan saimong nahiling,
alagad ano an nagin kahulogan kaiyan saimo?
Igwa ka nin talinga tanganing gamiton sa pagdangog,
alagad ano mananggad an saimong nadangog?”
21An Kagurangnan sarong Dios na andam nanggad na magligtas,
kaya ilinakaw niya an saiyang mga togon saka mga katukdoan,
asin boot niyang galangan iyan kan saiyang banwaan.
22Alagad sinamsaman ngunyan an saiyang banwaan;
ibinilanggo saka tinago sa madiklom na mga bilanggoan.
Hinabonan saka sinamsaman sinda,
asin mayo nin siisay man na maligtas sainda.
23Igwa daw nin saro sainda na madangog kaini?
Mahinanyog na daw kamo nin marahay poon ngunyan?
24Siisay an nagtao kan Israel sa mga parasamsam?
Bakong an Kagurangnan mismo, na satong pinagkasalaan?
Habo tang mamuhay sosog sa saiyang kabotan
o magkuyog kan itinao niyang katukdoan.
25Kaya ipinamate niya sato an saiyang makuring kaanggotan, asin pinatios kan kadahasan nin gera.
Arog sa kalayo, an saiyang kaanggotan naglaad sa bilog na Israel,
alagad an nangyari dai ta nanggad aram;
mayo kitang nanodan hale diyan.
Currently Selected:
Isaias 42: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
