Popular Bible Verses from Isaias 43

Share

Magmasid kamo para sa bagong bagay na gigibohon ko. Nangyayari na ini—nahihiling na nindo ini ngunyan! Magibo ako nin sarong dalan sa kalangtadan asin tatawan ko kamo nin mga burabod nin tubig duman.

Kun mag-agi ka sa hararom na katubigan, kaibahan mo ako; dai ka madadaog kan saimong mga kasakitan. Kun mag-agi ka sa kalayo, dai ka masusulo; dai ka maaano kan mga masakit na pagbalo.

Alagad nagsabi an KAGURANGNAN, “Hare na nindo pagromdoma an mga pangyayari kan mga aldaw na nakaagi, ni horophoropon an mga bagay na nangyari haloy nang panahon.

Israel, an KAGURANGNAN na naglalang saimo nagsabi, “Dai ka matakot—ililigtas taka. Inapod taka sa saimong ngaran—sadiri taka.

Papabayaan ko an mga nasyon tanganing iligtas an saimong buhay, huli ta mahalaga ka sa sako, asin huli ta namomotan taka sako ginagalangan.

Huli ta ako an KAGURANGNAN na saimong Dios, an banal na Dios nin Israel, an nagliligtas saimo. Itatao ko an Egipto bilang pantubos sa saimo; an Etiopia saka an Seba, bilang karibay mo.

Dai ka matakot—kaiba mo ako! “Ipupuli ko saimo an saimong namamanwaan hale sa sirangan asin sa solnopan.

Alagad, ako an Dios na nagpapatawad kan saimong mga kasalan, asin ginigibo ko ini huli ta ako an Dios. Dai ko na gigiromdomon an saimong mga kasalan.

“Banwaan nin Israel, kamo an sakong mga saksi; pinili ko kamo nganing magin sorogoon ko, tanganing mamidbidan nindo ako asin magtubod kamo sa sako patin masabotan nindo na ako sana an Dios. Pwera sako, mayo na nin ibang dios; mayo nanggad kaidto asin dai nanggad magkakaigwa.

“Ako sana an KAGURANGNAN, asin pwera sako mayo na nin paraligtas.

Ako an Dios asin magdadanay na Dios sagkod pa man. Mayong makakadulag sa sakong kapangyarihan; mayong makakaliwat kan sakong ginigibo.”

Maski an mga lalaw na hayop magalang sako; an mga lalaw na ayam saka mga ostrits maomaw sako. Kun an mga salog pabuloson ko na sa desyerto tanganing tawan nin tubig an pinili kong banwaan. Sinda an banwaan na ginibo ko para sako, asin mag-aawit sinda sako nin mga pag-omaw!”

Tataraman ko an amihan na butasan sinda asin an habagat na dai sinda pagpugolon. Tugote nindong magbalik an sakong banwaan hale sa harayong mga daga, hale sa gabos na poro ka kinaban. Sinda an sadiri kong banwaan asin ako an naglalang sainda tanganing magdara sako nin kamurawayan.”

Kaidtong panahon an KAGURANGNAN naggibo nin sarong dalan sa dagat, sarong agihan sa dakulang katubigan. Pinangenotan niya an sarong mapangyaring hukbo pasiring sa kapahamakan, sarong hukbo nin mga karwahe saka mga kabayo. Nagkaturumba sinda asin dai na nakabangon, pinalsok sinda siring sa laad nin sarong ilawan.

Ako an KAGURANGNAN, an saindong banal na Dios. Ako an naglalang saimo, Israel, asin ako an saimong hade.”