Isaias 41
41
Tinawan nin Dios nin Kasigurohan an Israel
1Nagsabi an Dios,
“Pag-alo kamo asin pagdangog sako,
kamo na mga harayong daga!
Mag-andam kamo sa pagdara kan saindong kaso sa hukoman;
tatawan kamo nin panahon na magtaram.
Magtiripon kita tanganing maaraman ta kun siisay an tama.
2“Siisay an nagdara kan parasakop#41:2 PARASAKOP HALE SA SIRANGAN: Si Ciro, an emperador nin Persia (hilingon sa 45:1). hale sa sirangan,
asin nagtataong kapangganahan saiya saen man siya magduman?
Siisay an nagtatao saiya nin kapangganahan laban sa mga hade saka sa mga nasyon?
Sa wasiwas kan saiyang espada, nagkakawararak sindang garo alpog,
asin huli kan saiyang mga bosog, nagkakawararak sindang arog
sa dagaming ipinapalid kan doros.
3Linalamag niya sinda asin ligtas siyang minaagi;
marikas siya nin marahay na garong dai nagduduta sa daga an mga bitis niya!
4Siisay an nagboot na mangyari an siring?
Siisay an nagplano kan kasaysayan nin mga henerasyon?
Ako, an Kagurangnan, yaon duman sa kapinonan,
asin ako, an Kagurangnan, magigin yaon duman sa kataposan.
5“An mga tawo sa hararayong mga daga nakahiling kan sakong ginibo,
kaya pinagtarakigan sinda sa takot.
Nagtiripon sinda asin nagdirigdi sinda gabos.
6Nagtatarabangan an mga panday
asin pinapakosog ninda an boot kan lambang saro.
7Nagsasabi an karpintero sa alahero, ‘Marahay an saimong ginigibo!
An lalaking naglilinig kan ladawan nagpapakosog kan boot kan lalaking nagbibilog kaiyan.
Nagsasabi sinda, ‘Marahay an pakasolda’—
dangan ipinapako ninda an ladawan sa pamumugtakan kaiyan.
8“Alagad ika, Israel, na sakong sorogoon,
ika an banwaan na sakong pinili,
an kapagarakian ni Abraham, na sakong katood.
9Kinua taka hale sa mga poro kan daga;
inapod taka hale sa pinakaharayong mga kanto kaini
asin sinabihan, ‘Ika an sakong sorogoon.’
Dai taka isinikwal kundi pinili.
10Dai ka matakot—kaiba mo ako!
Ako an saimong Dios—dai ka dapat matakot sa anoman!
Papakosogon taka asin tatabangan;
iingatan taka asin ililigtas.
11“Mamamatean kan mga naaanggot saimo
an sosog nin pagkadaog.
An mga nakikilaban saimo magagadan
12asin mawawara sa daga.
13Ako an Kagurangnan na saimong Dios;
pinapakosog taka asin sinasabihan,
‘Dai ka matakot; tatabangan taka.’”
14Nagsasabi an Kagurangnan,
“Maski sadit asin maluya ka, Israel,
dai ka matakot; tatabangan taka.
Ako, an banal na Dios nin Israel, iyo an nagliligtas saimo.
15Gigibohon takang siring sa sarong ginikan,
na igwang bago saka matarom na mga ngipon.
Giginikon mo an kabukidan asin roronoton mo sinda;
magigin alpog an kabubuldan.
16Papatoronon mo sinda;
dadarahon sinda kan doros sa harayo,
asin iwawarak sinda kan bagyo.
Dangan magigin maogma ka huli ta ako an saimong Dios;
oomawon mo ako, an banal na Dios nin Israel.
17“Kun an sakong banwaan maghanap nin tubig dangan mayong makua,
kun magmara an saindang halonan sa paha,
ako, an Kagurangnan, an masimbag sainda;
ako, an Dios nin Israel, dai nanggad mapabaya sainda.
18Gigibohon kong magbulos an mga salog sa mga bulod na mayo nin mga kahoy
asin magbulos an mga burabod nin tubig sa mga kapantayan.
Gigibohon ko na an desyerto magin mga sapa nin tubig
asin an mamarang daga magin mga burabod na nagbubulos.
19Papataluboon ko sa desyerto an mga sedro,
an mga akasya, an mga mirto asin an mga oliba.
An kalangtadan gigibohon kong mga kadlagan,
kadlagan nin mga aguho, hunipero asin cipres.
20Mahihiling ini kan mga tawo asin maaaraman ninda
na ako, an Kagurangnan, an naggibo kaiyan.
Dangan masasabotan ninda
na an banal na Dios nin Israel an nagboot na mangyari iyan.”
An Angat nin Kagurangnan sa mga Bakong Totoong Dios
21An Kagurangnan, an hade nin Israel, nagsasabi kaini:
“Kamong mga dios-dios kan mga nasyon, sangatan nindo an saindong kaso.
Ipahayag nindo an saindong pinakamarahay na depensa!
22Madya kamo digdi asin isabi nindo an mangyayari,
tanganing mamidbid nyato iyan kun mangyari na.
Ipaliwanag nindo sa hukoman
an mga pangyayari kan nakaaging panahon,
dangan sabihi kami kun ano an saindang kahulogan.
23Sabihi kami kun ano pa an mangyayari—
dangan maaaraman mi na kamo mga dios!
Maggibo kamo nin sarong bagay na marahay o maraot man
nganing panluyahon kami asin pagtakigan!
24Kamo asin an gabos nindong gibo mayo nin halaga;
makauuyam an mga nagsasamba saindo!
25“Nagpili na ako nin sarong lalaki na nag-eerok sa sirangan;#41:25 SARONG LALAKI NA NAG-EEROK SA SIRANGAN: Hilingon sa 41:2.
pinapasalakay ko siya hale sa amihan.
Tinitimaktimakan niya an mga pamayo na garo sinda laboy,
siring kan paragibo nin koron na nagtitimaktimak kan laboy.
26Siisay saindo an nagsabi na mangyayari ini,
tanganing masabi mi na tama siya?
Mayo ni saro saindo na nagtaram dapit kaini;
mayo man lamang nin nakadangog na kamo nagtaram!
27Ako, an Kagurangnan, an enot na nagbareta sa Sion;
igwa ako nin sinugo sa Jerusalem nganing magsabing,
‘Nagdadangadang an saimong banwaan! Mapuruli na sinda sa saindang harong!’#41:27 Sa Hebreyo, an bersikulo 27 bakong malinaw.
28Kan maghiling ako sa mga dios-dios
mayo sinda nin ikinataram;
mayo sainda nin nakasimbag kan sakong mga hapot.
29Mayong kamugtakan an mga dios-dios na ini;
mayo sindang nagigibo—
maluluya saka mayo nin kapangyarihan an mga ladawan na ini.”
Currently Selected:
Isaias 41: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
