Isaias 40
40
Mga Tataramon nin Paglaom
1“Rangaha nindo an sakong banwaan,” an sinasabi kan satong Dios. “Rangaha nindo sinda!
2Pakosoga nindo an boot kan mga tawo sa Jerusalem.
Sabihi nindo sinda na natapos na an saindang pagtios
asin pinatawad na an saindang mga kasalan.#40:2 asin pinatawad na an saindang kasalan; o nabayadan na ninda an saindang ginibo.
Pinadusahan ko na sinda nin doble para sa gabos nindang kasalan.”
3Sarong tingog an nagkukurahaw,
“Andama sa kalangtadan an dalan para sa Kagurangnan!
Tanosa sa desyerto an sarong tinampo para sa satong Dios!
4Tambonan an gabos na kababan;
pantayon an gabos na kabubuldan asin kabukidan.
Magigin patag an kabubuldan,
asin magigin sarama an mga lugar na bakong sarama.
5Dangan mahahayag an kamurawayan nin Kagurangnan,
asin mahihiling iyan kan gabos na katawohan.
An Kagurangnan mismo an nagtaram kaini.
6Sarong tingog an nagkukurahaw, “Ipahayag mo an sarong mensahe!”
“Anong mensahe an ipapahayag ko?” an hapot ko.
“Ipahayag mong an gabos na katawohan nakakaarog sa mga doot;
dai sinda nahahaloy siring sa mga burak sa kadlagan.
7Naluluyos an mga doot asin nawawara an mga burak,
kun sinusubol nin Kagurangnan an doros na naghuhuyop sa sainda.
An tawo nakakaarog sa mga doot.
8Iyo, naluluyos an mga doot asin nawawara an mga burak,
alagad an tataramon nin satong Dios magdadanay sagkod lamang.”
9Jerusalem, sumakat ka sa sarong halangkaw na bukid
asin ipahayag mo an marahay na bareta!
Magkurahaw ka sa makosog na tingog, Sion;
ibalangibog mo an marahay na bareta!
Magtaram ka asin dai ka matakot.
Sabihi an mga banwa nin Juda, “Uya na an saindong Dios!”
10Nagdadangadang an Kagurangnan Dios asin mapangyari siyang maghahade,
nagdadangadang na kaiba an mga tawong saiyang ilinigtas.#40:10 an mga tawong saiyang ilinigtas; o an mga premyo niya para sa saiyang banwaan.
11Aatamanon niya an saiyang mga hayop siring sa sarong pastor;
titiponon niya an mga kordero
asin kokogoson niya sinda;
luway-luway niyang pangengenotan an mga karnerong may ogbon.
An Daing Kaarog na Dios nin Israel
12Siisay na tawo an nakasukol kan katubigan sa paagi nin pagsaldok kaiyan sa saiyang palad
o nakasukol kan langit sa paagi nin pagdupa kan saiyang kamot?
May nakabugtak na daw kan daga kan kinaban sa sarong takadan,
o nakatimbang kan kabukidan saka kabubuldan sa mga timbangan?
13Siisay an nakasabi sa Kagurangnan kan dapat niyang gibohon?
Siisay an nakatukdo saiya o nakatao nin hatol?
14Siisay an dinolok nin Dios
tanganing maaraman saka masabotan
asin maadalan kun paano gibohon an anoman?
15Sa Kagurangnan, an mga nasyon mayo nin halaga,
arog sana sa sarong tagdo nin tubig;
an mga isla siring sa alpog kagian.
16An gabos na hayop sa kadlagan nin Lebanon
kulang na isakripisyo sa satong Dios,
asin an mga kahoy diyan kulang na igatong.
17An gabos na nasyon mayo nin halaga sa saiyang atubang.
18Sa kiisay nindo ikakabaing an Dios?
Paano nindo ilaladawan kun ano siya?
19Bako siya arog sa dios-dios na ginigibo nin mga tawo,
na pinapatos nin bulawan kan mga panday
asin ibinababaw sa patungtongan na plata.
20An tawong dai makakaagod nin plata o bulawan#40:20 Probableng teksto dai makakaagod…o bulawan; sa Hebreyo, bako ining malinaw.
minapili nin kahoy na dai malalapa.
Minahanap siya nin marahay na panday
tanganing gumibo nin ladawan na dai nagkikitongkitong.
21Dai nindo aram?
Dai kamo inosipan kaidtong panahon?
Dai nindo nadangog kun paano nagpoon an kinaban?
22Ginibo iyan kan nagtutukaw sa saiyang trono
sa itaas kan daga asin lampas pa sa langit;
an mga tawo sa daga arog na sana kasadit sa mga doron.
Inunat niya an langit siring sa sarong kurtina,
siring sa sarong eerokan na tolda.
23Ibinababa niya an mapangyaring prinsipe
asin hinahalean sinda nin halaga.
24Arog sinda sa mga saradit na mga tinanom,
na itinanom pa sana asin nagpopoon pa sanang maggamot.
Kun minasubol nin doros an Kagurangnan,
naaalang sinda asin ipinapalid arog sa dagami.
25Sa kiisay pwedeng ikabaing an Dios?
Igwa daw nin makakaarog saiya?
26Hilinga nindo an langit!
Siisay an naglalang kan mga bitoon na saindong nahihiling?
Siya na nangengenot sainda paluwas arog sa sarong hukbo,
siya an nakakaaram kan saindang bilang,
asin saro-saro niyang inaapod an saindang ngaran!
Dakulang marahay an saiyang kapangyarihan—
kaya mayong nawawara sainda maski saro man!
27Israel, tadaw ta nagrereklamo ka
na dai aram nin Kagurangnan an saimong kasakitan
o dai siya nagmamakulog kun ika nagtitios nin inhustisya?
28Dai nindo aram? Dai nindo nadangog?
An Kagurangnan iyo an mayong kataposan na Dios;
linalang niya an bilog na kinaban.
Dai siya napapagal o nanluluya.
Mayo nin siisay man na nakakasabot kan saiyang kaisipan.
29Pinapakosog niya an mga nanluluya asin napapagal.
30Manluluya maski an mga hoben pa;
sa kapagalan, an mga hoben matutumba.
31Alagad an mga nagsasarig sa tabang nin Kagurangnan
makakakua nin bagong kosog.
An kosog ninda makakaarog sa mayong kapagalan na mga pakpak nin agila;
madalagan sinda alagad dai mapapagal;
malakaw sinda alagad dai manluluya.
Currently Selected:
Isaias 40: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
