Parahulit 4
4
1Dangan hiniling ko giraray an gabos na inhustisya na ginigibo sa kinaban. Nagtatangis an mga inaapi asin mayo nin minaranga sainda, huli ta an mga nag-api sainda iyo an igwa nin kapangyarihan. 2Naghona ako na orog na paladan an mga gadan na ki sa mga buhay pa; 3alagad orog na paladan ki sa duwang ini an mga dai pa namundag saka dai pa nakahiling kan mga karatan na ginigibo sa kinaban. 4Nasabotan ko man an dahelan kun tano ta nagtatrabaho nin maigot an tawo; an dahelan iyo an pagkaori sa pagsadiri nin iba. Ini mayo nin halaga, asin garo man sana paglamag sa doros. 5Nagsasabi sinda na lolong an sarong tawo na magparapamungko asin ginagadan an sadiri sa gutom. 6Pwedeng tama iyan. Alagad mas marahay na igwa ka nin kadikit na nasasaray, na may katoninongan sa isip, ki sa padagos kang magpagal na garo man sanang paglamag sa doros.
7Nahiling ko pa sa kinaban an sarong bagay na mayo nin halaga. 8An sarong tawo na nabubuhay na solo-solo, mayo nin aki o tugang, alagad mayong kataposan an pagtrabaho niya, asin an saiyang mata nakukulangan pa kan saiyang kayamanan. Para kiisay an saiyang pagpagal saka pagsayuma niya nin kaogmahan sa sadiri? Ini man mayo nin halaga asin sarong mamondong kamugtakan.
9An duwa mas marahay ki sa saro, huli ta mas dakul an magigin marahay na bunga kan saindang kapagalan. 10Kun matumba an saro sainda, tatabangan siyang magtindog kan saro; alagad herak man sa nagsosolo-solo kun siya matumba, huli ta mayo nin matabang saiya na makatindog. 11Siring man kun malipot, an duwa pwedeng taed na maghigda tanganing magpahimbong; alagad paano an pagpahimbong kan nagsosolo sana? 12An saro pwedeng daogon nin saro katawo; alagad ini malalabanan nin duwa. Dai tolos mapapatod an linubid na tinolo-tolo.
13Mas marahay an sarong hoben na dukha alagad madonong ki sa sarong gurang nang hade alagad mangmang asin habo nang magpahatol, 14maski ngani hale siya sa kadukhaan dangan nagin hade nin saiyang banwaan, o gikan sa bilanggoan dangan nakamtan an trono. 15Nahiling ko an gabos na tawong nabubuhay sa kinaban, asin namidbid ko na kabilang sainda an sarong hoben na lalaki na iyo an magigin kasalihid kan hade. 16Maski dai mabilang an mga tawong nasasakopan kan hade, alagad pakagadan niya, dai siya pasasalamatan kan mga masurunod saiya. Ini mayo nin halaga asin garo man sanang paglamag sa doros.
Currently Selected:
Parahulit 4: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
