Parahulit 3

May Panahon para sa Gabos

1An gabos na nangyayari digdi sa kinaban nangyayari sa panahon na pinili nin Dios:

2Panahon nin pagkamundag, asin

panahon nin pagkagadan;

panahon nin pagtanom, asin

panahon nin paggabot kan itinanom;

3panahon nin paggadan, saka

panahon nin pagpaomay;

panahon nin pagrumpag, saka

panahon nin pagtugdok;

4panahon nin pagtangis,

dangan panahon nin pagngisi;

panahon nin pagmondo,

dangan panahon nin pagsayaw;

5panahon nin pagtapok nin mga gapo,

asin panahon nin pagtipon kan mga iyan;

panahon nin pagkukugosan, asin

panahon sa pag-ontok sa pagkukugosan;

6panahon nin paghahanap, saka

panahon nin pagkakawara;

panahon nin pagsaray, saka

panahon nin pagtapok;

7panahon nin paggisi, dangan

panahon nin pagtahi;

panahon nin pag-alo, dangan

panahon nin pagtaram;

8panahon nin pagkamoot, asin

panahon nin pagkaongis;

panahon nin gera, asin

panahon nin katoninongan.

9Ano an pakinabang na makukua kan tawo sa saiyang pagpagal? 10Aram ko na magabat na mga pasanon an itinao nin Dios sa sato. 11An gabos na bagay tinawan nin talaan na panahon. Itinao niya sato an kamawotan para sa maabot na panahon, alagad dai niya kita tinatawan kan bilog na pakasabot kan saiyang ginibo poon sa kapinonan sagkod sa kataposan. 12Aram ko na mayo nin ibang marahay para sato kundi an mag-ogma saka maggayagaya mantang buhay pa kita. 13Regalo nin Dios sa tawo na siya magkakan asin mag-inom saka mag-ogma sa saiyang pinagpagalan.

14Aram kong nagdadanay sagkod pa man an gabos na ginibo nin Dios; dai iyan madudugangan o maiinaan. Ginibo niya iyan tanganing sa atubang niya magkatarakot an mga tawo. 15An nangyayari ngunyan o an mangyayari ngapit, nangyari na kaidto. An mga nakaagi ginigibo nin Dios na mangyari giraray.

Inhustisya sa Kinaban

16Laen pa kaini, embes na hustisya an mahiling ko sa kinaban, nahiling ko an karatan; embes na katanosan, an karatan. 17Nagsaboot ako, “Huhukoman nin Dios an mga matanos saka an mga maraot, huli ta nagtalaan siya nin panahon para sa gabos na bagay asin para sa gabos na gibo. 18Nagsaboot ako na binabalo kita nin Dios tanganing ipahiling na mayo man kita nin kalaenan sa mga hayop. 19Huli ta pareho an palad kan mga tawo asin kan mga hayop; pareho man sinda magagadan. Pareho man an saindang hinangos; mayo nin kalaenan an tawo sa hayop. Huli ta an buhay mayo nin halaga para sainda. 20Pareho man an saindang padudumanan—gikan sinda sa alpog asin sa alpog sinda mabalik. 21Siisay an nakakaaram kun an espiritu nin tawo minapaitaas asin an espiritu kan hayop minapairarom sa daga? 22Kaya nahiling ko na mayo nin marahay para sa tawo kundi an mag-ogma sa saiyang trabaho, huli ta iyan an saiyang palad. Mayo kita nin paagi tanganing maaraman ta an mangyayari pakatapos na kita magadan.

Currently Selected:

Parahulit 3: MBBBIK92

Highlight

Copy

Compare