Parahulit 5
5
Dai Basta Manuga sa Dios
1Mag-ingat ka kun minaduman ka sa Templo. An magrani tanganing maghinanyog mas marahay ki sa magdolot nin sakripisyo siring sa ginigibo kan mga lolong na tawo, na dai aram na naggigibo sinda nin maraot. 2Mag-isip ka ngona bago ka magtaram; dai ka tolos-tolos manuga sa Dios, huli ta an Dios nasa langit, mantang ika nasa daga. Kaya dai ka magtaram nin sobra sa dapat mong itaram. 3An dakul na kahaditan nagdadara nin dakul na maraot na pangatorogan; siring man an dakul na tataramon mabunga nin dakul na kalolongan. 4Kaya kun minagibo ka nin panuga sa Dios, otobon mo iyan tolos; huli ta dai niya nawiwilihan an mga lolong. Otoba an ipinanuga mong gigibohon. 5Mas marahay pang dai ka manuga, ki sa manuga ka dangan dai mo man gigibohon. 6Hare pagtugot na an saimong mga tataramon iyo an magdara saimo sa kasalan, tanganing dai ka magsabi sa sugo nin Dios na dai mo man idto tinutuyo. Tano ta papaanggoton mo an Dios asin ipaparaot mo saiya an saimong pinagpagalan? 7Maski gurano kadakul kan saimong pangatorogan asin kan saimong mga tataramon, kaipuhan galangan mo an Dios.
An Buhay Mayo nin Halaga
8Dai ka magngalas kun mahiling mo na an mga dukha inaapi kan gobyerno asin isinasayuma sainda an katanosan saka an saindang deretso; huli ta an lambang opisyal dinedepensahan kan mas halangkaw saiya, asin sindang duwa dinedepensahan man kan mas halangkaw pa sainda.
9Maski an hade minalaom sa bunga kan kaomahan.#5:9 Sa Hebreyo, an bersikulo 9 bakong malinaw.
10An namomoot sa kwarta, dai nanggad makokontento kaiyan. An namomoot sa kayamanan padagos na magpaparahanap kaiyan. Ini mayo man nin halaga. 11Kun mayaman ka na, dakul man an papakakanon mo. Mayo ka man nin pakinabang kundi an pakaaram na mayaman ka. 12An sarong trabahador marahay an torog, dikit man o dakul an saiyang kakanon; alagad an dakul na pagsadiri kan mayaman iyo an minapurisaw sa saiyang pagkatorog.
13Igwa akong nahiling na maraot na bagay sa kinaban: minatipon nin kwarta an tawo sa ikakaraot niya. 14Dangan an kwartang iyan nawawara sa negosyo na dai nag-uswag. An kataposan iyo an mayo siyang ikakawalat na pamana sa saiyang mga aki. 15An tawo huba kan maglaog sa kinaban; siring man, huba siyang mahale sa kinaban. Maski dakul an saiyang naginibo, mayo siyang madadara maski ano. 16Ini saro man na karatan! An tawo minahale siring kan saiyang pag-abot. Anong pakinabang an saiyang pagtrabaho, na arog man sana sa paglamag kan doros? 17An bilog niyang aldaw ipinapamuhay niya sa kadikloman, sa kamondoan, sa kahandalan, sa kaanggotan, asin sa kahelangan.
18Ini an nahiling kong marahay na gibohon nin tawo: an pagkakan, an pag-inom saka an pag-ogma sa gabos na pinagalan niya mantang dai pa natatapos an halipot na buhay na itinao nin Dios saiya. Ini an palad nin tawo. 19Kun an tawo tawan nin Dios nin kayamanan saka mga rogaring, asin kapangyarihan sa pag-ogma huli kaiyan, kaipuhan magpasalamat siya patin ipag-ogma an saiyang pinagalan. Iyan sarong regalo nin Dios. 20Huli ta tinugotan siya nin Dios na magin maogma, dai siya mapupurisaw nin marahay dapit sa kahalipotan nin saiyang buhay.
Currently Selected:
Parahulit 5: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
