Ane rom, echî 4

Ekpin Abraham é rî ka nnyen-i-mbá nan?

1É ko ên kpá Abraham, ńsé owəré éməné nnyo ndə́p-i-njû eyəré ane Jus. Bhaghé ejûm é fábhe na yê? 2Ebhú sê Obhasi a kóe yê se a fôn ekpin ka nnyen-i-mbá, a tʉ̂ yê a kâk ka biji, ka ono mbi Abraham a yimî, kə́n Abraham a sûm obhô ngaŋ. Kən á ka bhik esúmúm ka ochî Obhasi. 3Echî aŋ? Nwet Obhasi a sə́re se Abraham a kíi ḿbə́ŋé na yê. Ka ḿbə́ŋé nnyí, Obhasi fə́ne se ekpin Abraham é rî ka nnyen-i-mbá.#Eróghá 15.6; Gar 3.6.

4Nne nnyo a kí yim etûm mbâ nne, kpe bhaghé ntí mmi á kí karé yê, á bhó kep se ekəp. A kí kep se a ri nyúbhí eye. 5Kən ebhú nne á gyiní se yê a yîm etûm eno, a yûŋ ḿbə́ŋé a kî na Obhasi nnyo a kí ri nsôn a sû obhí ane, Obhasi a kí ko ḿbə́ŋé nnyi nne a kíi nná, a sə́re se nne a fôn ekpin ka nnyen-i-mbá. 6Debhit a chôt fə́ne nchot nnyí yə́t a kpê na ane mba á fon ogyebhá-ḿbə́ŋé ka Obhasi, a kô ekpin ábho se é rî ka nnyen-i-mbá, á ka kóŋ etûm nji á yími ka nsi nnyí. 7Á séŋe sê,

“Deê ogyebhá-ḿbə́ŋé ó jóe na ane

mba Obhasi a rî nsôn a sû obhí ábho,

a rô kpó ki echî ka ḿbə́ne.

8Deê ogyebhá-ḿbə́ŋé ó jóe na ane

mba Ńtâ Obhasi a jáne obhí ábho.”#Nkôn 32.1-2.

9Nâ-ngá ogyebhá-ḿbə́ŋé mbi Debhit á chorá nná ó kí joé ó káre a ri ane mba á kími nkîm ḿbáne-mbanê a? Áfúbhí! Ogyebhá-ḿbə́ŋé mbí ó kí joé ó káre ane chénchén kpe á kím nkîm na á kâ kîm. Ta é bhiŋ ka nwet Obhasi é səre ên sê, “Abraham a kíi ḿbə́ŋé na Obhasi. Ka obhô mbí, Obhasi a kô ekpin ejê se é rî ka nnyen-i-mbá.” 10Nchot Abraham nnyí a fábhe nná ebhú ta a kîm nkîm kən á ka kím? A fábhe ebhú Abraham a nyə́ne á ka kim nkîm. 11Nkîm eye a ri eriŋ nji é tóŋe sê Obhasi a kóe ekpin Abraham se é rî ka nnyen-i-mbá ka ḿbə́ŋé nnyi Abraham a kíi na yê ebhú a nyə́ne á ka kím nkîm. Nâ ńjə́ne Abraham a ri nâ ńsé ane fép mba Obhasi a kóe ekpin ábho se é rî ka nnyen-i-mbá ka ḿbə́ŋé nnyi á kíi na yê, nkîm á ká kim.#Eróghá 17.10. 12Abraham a ri ńsé fə́ne nnyo ane mba á kími nkîm sê á jíghí Obhasi. Á ka joé ńsé ábho ka á kími nkîm. A ri ńsé ábho ka á kíi ḿbə́ŋé noŋ yê ḿfoné nnyo a kíi ḿbə́ŋé na Obhasi kən a bhá kim nkîm.

Obhasi a timî Abraham onono ka ḿbə́ŋé nnyi Abraham a kíi na yê

13Obhasi a timî se ngun a kí joé nnyi Abraham na biyábhé-abhon ibhê, é ká dʉ sê ka Abraham a kíi ebhín. É dʉ̂ ka ḿbə́ŋé nnyi a kíi na yê, kən yê fə́ne a kô ekpin Abraham se é rî ka nnyen-i-mbá.#Eróghá 17.4-6; 22.17-18; Gar 3.29. 14Nan? Ájoé ngun a ri sê nnyi ane mba á kíi ebhín átíŋ, ḿbə́ŋé ekíím á ka kpó fon echî. Nji Obhasi a timî fə́ne é ká kpo fap ejûm.#Gar 3.16. 15Echî aŋ? Ebhín é jéna na akpəre. Ebhín é ro joé, ebhín egboóm fə́ne é bhó joé.

16Nâ ńjə́ne nji Obhasi a timî, a fî a kî noŋ ekəp onobhá-eji mbâ ane mba á kíi ḿbə́ŋé na yê. Ejûm njí é rî é káre biyábhé-abhon Abraham chénchén, cháŋ sê mba á fóne ebhín í Mosis átíŋ. É rî é káre eróŋ mba a kíi ḿbə́ŋé na Obhasi noŋ Abraham nnyo a ri nâ ńsé owəré chénchén.#Gar 3.7. 17Ka ekpak nji Obhasi a chorê ka nwet se, “We, Abraham, ń yim ane ka nték i ngun etî-etî á bhîŋ wâ se ńsé ábho.” Abraham a ri ńsé owəré ka ochî Obhasi nnyo yê a kíi ḿbə́ŋé. A ri Obhasi nnyó yót nâ a kí sʉk nne ka ekʉ̂. Yê nâ a kí ko eyum í nnyo ńjə́ne-njənê a chôt, ekpak ejûm nji nne á ka nok oyén, é fâp.#Eróghá 17.5.

Abraham a tóŋe ekpak á kîk ḿbə́ŋé na Obhasi

18Ane etî-etî kə́n á fûp, kən Abraham á ka fon efup kpe ofú bhə́t. A kâm na ḿbə́ŋé-a-ḿbə́ŋé se Obhasi tîk a yîm ejûm nji a chorê. Ka obhô mbí, a bhâ chə́bhe fə́ne ńsé ane ka nték i ngun etî-etî noŋ Obhasi a chimî. Obhasi a chimî yê se, “Abhon-í-njəm abhâ tîk á tî.”#4.18 Obhasi a chími Abraham ta ka Eróghá-ndə́p 15:5 se abhon-í-njəm abhê tîk a tî noŋ ńdʉnândʉ ka ósô.#Eróghá 15.5. 19Kpe na íkíkéré mfi se, “Na nyâ amé a kə́ bha osí nsam érôn, ń kui ń chiŋ, nkáé omé Sara fə́ne ngá a mân nne-nkáé nnyo a kí kpo fon mmon.” Abraham á ka yighí ḿbə́ŋé a to se nji Obhasi a timî é bhó fap.#Eróghá 17.17. 20Kən ka eji Obhasi a chimî, Abraham á ka fon efup. Ḿbə́ŋé nnyi a kíi nná, a káre yê ikom, a yimá yê fə́ne a kará ekûp na ejík mbâ Obhasi. 21Ḿbə́ŋé á ka rəm Abraham kpe mkpât, kən a kâm se Obhasi a bhîk eyimím nji a chimî. 22Ntʉ́ghi ḿbə́ŋé nnyí ekíím nâ a yimî áno Obhasi a kô ekpin Abraham se é rî ka nnyen-i-mbá. 23Nji Obhasi a chorê se, “Ń ko ekpin ejê bəre é rî ka nnyen-i-mbá,” á ka chot mbâ Abraham yê átíŋ. 24A chorê mbâ eyəré eróŋ se yê a kí ko ekpin ejə́ré se é rî ka nnyen-i-mbá. A ri êt mba e kíi ḿbə́ŋé na yê nnyo a yimî Ntûfâm owəré Jisos a nyə́me ka ekʉ̂. 25A ri Jisos nnyo a kpóe ekʉ̂ ka obhô obhí obhə́ré kən Obhasi a yîm yê a chə́bhe njəm ka ekpin se é fôn ekpin ka nnyen-i-mbá.#Asa 53.4-5.

Currently Selected:

Ane rom, echî 4: ETUNT

Highlight

Compare

Copy