Ane rom, echî 3

Nji Obhasi a chimî ane Jus, á bhó yoŋe

1Ka ejoóm nne Jus, nne a fôn mân bhaghé ekəp nji ane mba tat á ká fon? Nkîm nnyi ane Jus á kíma nná, a fonê bhaghé orʉrí kpá títí? 2Ekpatə́m ekəp é rî. Etî-etî orʉrí ó rî. Ejûm nji é fáŋe ofaŋ é rî sê, Obhasi a mághe mfoné otîp obhê ka obhô ábho.

3Kən é jóe sê etʉ̂ ane Jus á yóŋe ḿbə́ŋé nnyi á kíi na Obhasi aŋ, kə́n Obhasi a yóŋe ḿbə́ŋé eye a? 4Bhúghí-bhúghí! Obhasi á bhó yoŋe ḿbə́ŋé eye. Kpe ngun ndə́m á chə́bhe ane áfúbhí, Obhasi á bhó yoŋe nji a chimî se yê a kí yim. É rî ka ekpak nji á séŋe á kpê na Obhasi sê,

“Kpe bhaghé ejûm nji o chorê,

é kí joé fə́ne ka etʉri.

Kə́n kpe á kághe wâ ka esup,

esup áji é bhó gbo wâ.”#Nkôn 51.4.

5Nne kə́n a tô se, “Kən ájoé obhí obhə́ré ó kí toŋe ekpak Obhasi á yimá iyîm ka nnyen-i-mbá, kə́n e chôt mân sê jen? Sê Obhasi á ka fon ebhíbhím nne nnyo a yimî obhí a?” Ḿfa nâ íkíkéré ngun. 6Áno asík, ka é joé ka ekpak njí, Obhasi á ka bhik etáŋám ngun ndə́m.

7Nne kə́n a tô mân se, “Ka eji obhí obhámé ó kí toŋe ekpak Obhasi á yimá iyîm ka nnyen-i-mbá, ó kará yê ejík, Obhasi á ka fon ə̂m ebhíbhím se ń yim obhí.” 8Nâ é rî ekan-ékân etoóm se, “Deê nne a yim obhí kən ono ó tóp.” Ka etʉri, etʉ̂ ane á kí bhibhâ mbiŋ amé sê mme nâ ń səra ane ntʉ́ghi nchot nnyí. Obhasi a ri a bhíbhí ntʉ́ghi ane mbá ka ekpak a fonê ábho ebhíbhím.

Nne kpe yót cháŋ nnyo a fonê ekpin ka nnyen-i-mbá

9Nâ-ngá êt ane Jus mân kə́n e tô sê e ri nono ka ochî Obhasi e chíŋi ajéné a? Áfúbhí! Ka ekpak nji ń daŋ mbá ń chot bəre chénchén ane, kpe ó jóe Jus, kpe ó jóe njéné, o ri ka ńgyímí obhí eyimím. 10Á séŋe sê,

“Nne kpe yót cháŋ nnyo á ka yim obhí bhúghí-bhúghí.

11Kpe nne yót cháŋ fə́ne nnyo a tʉ́ri oməŋé achot Obhasi,

a kí nok se yê a tóp Obhasi.

12Chénchén ane á chəp njəm á kare Obhasi,

á kət chichi ane.

Kpe nne nno cháŋ ka nsi nnyí,

kpe yót cháŋ.#Nkôn 14.1-3; 53.1-3.

13Achot mma á fábha nne ka nnyo á rî noŋ egyʉ

nji é kí fap ka oyəm í nkə́bha-nsi mbi á maghe fóŋ.

Ó koŋ erə́bhe-nchot í nne, o tân mbá.

Nchot i mbí nnyi á fabha nne ka nnyo,

a bhíbhi noŋ nyui-nkə́m.#Nkôn 5.9; 140.3.

14Nji é fábha nne ka nnyo,

é ká chiŋi ekpatə́m atû na ekpatə́m oyámá-ḿbə́ŋé.#Nkôn 10.7.

15Oyúa-nne áfo na nne a ri ache.

16Kpe nne a jiî fan,

a kə́ bha yê na oseŋe na ógbó.

17Á ká məŋé okumí ka ekone na ntem-nne.#Asa 59.7-8.

18Á bhó fup Obhasi kpe mkpât.”#Nkôn 36.1.

19É məŋe sê chénchén nji á séŋe nná ka ebhín Obhasi, é fíi é káre mbâ ane mba á fóne ńjə́ne. Nne á bhó kpo fon mân nnyo mmi a kí taŋ biji. É fap sê chénchén ane ka ngun nnyí, Obhasi tîk a tâŋ ábho. 20Nâ mân nne kpe yót cháŋ nnyo Obhasi a kí ko se a fôn ekpin ka nnyen-i-mbá nji nne á fi ebhín ńjə́ne-njənê. Obhasi a karê ebhín ejê se a nyáŋé nne a məŋé obhí mbi a yimî.#Nkôn 143.2; Gar 2.16.

Nne á joá ka nnyen-i-mbá na Obhasi nan?

21A ri mfá-mfá Obhasi a tóŋe ane mbá jáé nnyi á kí chiŋ kən a kó ekpin ábho se é rî ka nnyen-i-mbá. É ká joé ka ebhín efiím. Ebhín Obhasi na akará-otîp Obhasi á gyimi atî-isê mbá nnyí. 22Mbá nchane a ri ḿbə́ŋé ekíím na Jisos Krayis. Obhasi a kí ko chénchén ane mba á kíi ḿbə́ŋé na Jisos Krayis se á fon ekpin ka nnyen-i-mbá. A kí ko á bhó kep nne ka ochî.#Gar 2.16. 23Echî aŋ? Ngun ndə́m á yim obhí, á ká kpo bhik efonóm ejík ka ochî Obhasi. 24Kən Obhasi a tóŋe ngun onobhá-eji obhê, kpe ejûm á ka bhə́p. Na onobhá-eji obhê, a kí ko ane se á fon ekpin ka nnyen-i-mbá. Á yimá njí ka obhô Jisos Krayis nnyo á yimá êt e sémá. 25Obhasi a káre Jisos Krayis se, ka obhô agyʉ́ŋ ekʉ̂ Jisos, yê tîk a rî nne nsôn a sû obhí obhê. É kí dʉ ka ḿbə́ŋé nnyi nne a kíi na Jisos Krayis. Obhasi a yimî njí a tóŋé se yê a fôn ekpin ka nnyen-i-mbá. Éməné, Obhasi a kí kəp ḿbə́ŋé, a janá obhí ane. 26Kən mfá-mfá, a kí toŋe se yê á yimá iyîm ka nnyen-i-mbá. A kí toŋe fə́ne se yê a kí ko kpe énê nnyo a kíi ḿbə́ŋé na Jisos se a fôn ekpin ka nnyen-i-mbá.

27Kpe ejûm etat cháŋ mân nji nne a kí sum obhô ngaŋ. Echî é rî sê, Obhasi a kóe nne se a fôn ekpin ka nnyen-i-mbá, cháŋ ka ebhín ekíím. É dʉ̂ ka ḿbə́ŋé nnyi nne a kíi na Jisos Krayis. 28É məŋe sê Obhasi a kí ko se nne a fôn ekpin ka nnyen-i-mbá, cháŋ ka eyimím iyîm mbi ebhín é fíi, kən a ri ka obhô ḿbə́ŋé ekíím na Jisos Krayis. 29Obhasi á ka joé a káre ane Jus átíŋ, a ri Obhasi ane nték ajéné eróŋ, 30ka Obhasi a ri yót. Ájoé ane Jus na erû nkîm ábho á ki ḿbə́ŋé na Jisos Krayis, Obhasi a kí ko ekpin ábho se é rî ka nnyen-i-mbá. Ane nték ajéné fə́ne, kpe á ká fon erû njí, á kî ḿbə́ŋé, Obhasi a kí ko ábho ekan-ékân.#Otira 6.4; Gar 3.20. 31É ka to sê ḿbə́ŋé ekíím a yîm ebhín Obhasi é kət chichi ejûm. Áno asík. Ḿbə́ŋé ekíím a kí jeghé ebhín njí ojeghé.

Currently Selected:

Ane rom, echî 3: ETUNT

Highlight

Compare

Copy